ജയിലിലേക്കുള്ള ഹെലികോപ്റ്റര്‍ യാത്രയില്‍ ഗുര്‍മീതിനെ അനുഗമിച്ചവരുടെ കൂട്ടത്തിലാണ് ഹണിപ്രീതിന്റെ സാന്നിധ്യം ജനം ശ്രദ്ധിക്കുന്നത്. ദേരാ സച്ചാ സൗധ സാമ്രാജ്യത്തിന് പരിചിതമായ നാമമാണ് ഹണിപ്രീതെങ്കിലും രാജ്യം ഒന്നടങ്കം ആ പേരിലേക്ക് ഉറ്റു നോക്കുന്നത് ആ ഹെലികോപ്റ്റര്‍ യാത്രയിലാണ് . ഗുര്‍മീതിന്റെ ദത്തുപുത്രിയെന്ന് പറയപ്പെടുന്ന ഹണിപ്രീതിനെ ഗുര്‍മീതിനൊപ്പം ജയില്‍ വരെ അകമ്പടി സേവിക്കാന്‍ അനുവദിച്ച ഹരിയാന സര്‍ക്കാര്‍ വലിയ വിമര്‍ശനങ്ങളാണ് ഏറ്റു വാങ്ങേണ്ടി വന്നത്. 

എന്നാല്‍ ഈ വിവാദങ്ങള്‍ക്ക് ശേഷവും ഹണിപ്രീതിനെ തനിക്കൊപ്പം ജയിലില്‍ കഴിയാന്‍ അനുവദിക്കണമെന്ന ആവശ്യവും ഗുര്‍മീത് ഉന്നയിച്ചുവെന്നാണ് പുറത്ത് വരുന്ന വാര്‍ത്തകള്‍ വ്യക്തമാക്കുന്നത്. ആവശ്യം ഉന്നയിച്ച് ഗുര്‍മീത് നേരിട്ട് പാഞ്ച്കുള സി.ബി.ഐ കോടതിയെ സമീപിച്ചിരുന്നു. അതേസമയം അഭിഭാഷകന്‍ വഴിയാണ് ഹണിപ്രീത് കോടതിയെ സമീപിച്ചത്. 

ബലാത്സംഗക്കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന വ്യക്തിക്ക് കൂട്ടിനു ആളെ വേണമോ വേണ്ടയോ എന്ന വിഷയം കോടതി പരിഗണനയില്‍ വരുന്നതല്ലെന്നായിരുന്നു ഹര്‍ജിയോട് സിബിഐ കോടതിയുടെ പ്രതികരണം. ജയില്‍ അധികാരികളോ സര്‍ക്കാരോ ആണ് ഇക്കാര്യത്തില്‍ തീരുമാനമെടുക്കേണ്ടത് എന്നായിരുന്നു കോടതി പറഞ്ഞത്.

ഗുര്‍മീത് പുറം വേദനയും കടുത്ത തലവേദനയും ഉള്ള ആളാണെന്നും അതിനാല്‍ അക്യുപ്രഷര്‍ വിദഗ്ദയായ തന്റെ സഹായം വേണമെന്നുമാണ് അഭിഭാഷകന്‍ മുഖേന നല്‍കിയ ഹര്‍ജിയില്‍ ഹണിപ്രീത് പറഞ്ഞത്. ഇതേ ആവശ്യവുമായി ജയിലധികൃതരെ ഗുര്‍മീത് സമീപിച്ചെങ്കിലും സ്ത്രീ കൂട്ടാളിയെ പുരുഷ തടവുകാരന് ഒപ്പം അനുവദിക്കുന്ന രീതി ജയിലിലില്ല എന്ന് ജയിലധികൃതര്‍ വ്യക്തമാക്കി. ഇതിന് ഗുര്‍മീത് ജയിലധികൃതരെ ഭീഷണിപ്പെടുത്തി എന്നാണ് റിപ്പോര്‍ട്ടുകള്‍.