ലാലു പ്രസാദ് യാദവിന് ശിക്ഷ വിധിച്ച സി.ബി.ഐ കോടതി ജഡ്ജി ആത്മരക്ഷയ്ക്ക് തോക്ക് ലൈസന്സിന് അപേക്ഷ നല്കി
900 കോടിയുടെ കാലിത്തീറ്റ കുംഭകോണക്കേസില് ആര്.ജെ.ഡി അദ്ധ്യക്ഷനും ബീഹാര് മുന് മുഖ്യമന്ത്രിയുമായ ലാലു പ്രസാദ് യാദവിന് ശിക്ഷ വിധിച്ച സി.ബി.ഐ കോടതി ജഡ്ജി ആത്മരക്ഷയ്ക്ക് തോക്ക് ലൈസന്സിന് അപേക്ഷ നല്കി. തനിക്കും രണ്ട് മക്കള്ക്കും പേഴ്സണല് റിവോള്വര് ഉപയോഗിക്കുന്നതിനുള്ള ലൈസന്സ് അനുവദിക്കണമെന്നാണ് ജസ്റ്റിസ് ശിവപാല് സിംഗ് ആവശ്യപ്പെട്ടിട്ടുള്ളത്.
കേസിന്റെ വിചാരണ നടക്കുന്നതിനിടെ കഴിഞ്ഞ വര്ഷം ഒക്ടോബറിലാണ് തോക്ക് ലൈസന്സ് അനുവദിക്കണമെന്ന് അപേക്ഷ സമര്പ്പിച്ചത്. ഇതിന് വേണ്ടി ആയിരം രൂപ വീതം ഫീസും കെട്ടിവച്ചിട്ടുണ്ട്. ആത്മരക്ഷയ്ക്ക് വേണ്ടിയാണ് ആയുധമെന്നാണ് അപേക്ഷയില് പറഞ്ഞിരിക്കുന്നത്. ലാലു പ്രസാദ് യാദവിനെതിരെയുള്ള അഴിമതിക്കേസില് കഴിഞ്ഞ ജൂണില് വാദം കേള്ക്കാന് ആരംഭിച്ചപ്പോഴാണ് ജസ്റ്റിസ് ശിവപാല് സിംഗ് വാര്ത്തകളില് എത്തിയത്.
രണ്ട് മാസങ്ങള്ക്ക് ശേഷം കേസ് ശിവപാല് സിംഗിന്റെ കോടതിയില് നിന്നും മാറ്രണമെന്നും ലാലു പ്രസാദ് യാദവ് അപേക്ഷ സമര്പ്പിച്ചിരുന്നു. ജനുവരി 6നാണ് കേസില് ലാലു പ്രസാദ് യാദവിന് മൂന്നരവര്ഷത്തെ ജയില് ശിക്ഷയും പത്തു ലക്ഷം രൂപ പിഴയും കോടതി വിധിച്ചത്. വിധി പ്രസ്താവത്തിന് രണ്ട് ദിവസം മുമ്പ് ലാലുവിന്റെ അനുയായികള് തന്നെ ഫോണില് വിളിച്ച് ഭീഷണിപ്പെടുത്തിയതായും നിയമത്തില് വിട്ടുവീഴ്ച്ചയ്ക്ക് താന് തയ്യാറല്ലെന്നും ശിവപാല് സിംഗ് വ്യക്തമാക്കിയിരുന്നു.
https://www.facebook.com/Malayalivartha