കാവേരി മാനേജ്മന്റെ് ബോര്ഡ് രൂപവത്കരണ ആവശ്യമുന്നയിച്ച് തമിഴ്നാട്ടില് പ്രതിഷേധം തുടരുന്നു
കാവേരി മാനേജ്മെന്റ് ബോര്ഡ് രൂപവത്കരണ ആവശ്യമുന്നയിച്ച് തമിഴ്നാട്ടില് പ്രതിഷേധം തുടരുന്നു. ഡി.എം.കെ സഖ്യത്തിന്റെ ആഭിമുഖ്യത്തില് തിങ്കളാഴ്ച നിയമസഭ മണ്ഡലങ്ങള് കേന്ദ്രീകരിച്ച് പ്രതിഷേധം അരങ്ങേറി. ചെന്നൈ, കോയമ്പത്തൂര് തുടങ്ങിയ മുഴുവന് നഗരങ്ങളിലും റോഡ്ട്രെയിന് തടയല് നടന്നു. ആയിരക്കണക്കിന് പ്രവര്ത്തകരാണ് അറസ്റ്റു വരിച്ചത്. ചെന്നൈയില് മാത്രം മുപ്പതിടങ്ങളിലാണ് റോഡ് തടയല് സമരം നടത്തിയത്. കോയമ്പത്തൂരില് സിംഗാനല്ലൂര് റെയില്വേ സ്റ്റേഷനില് ഡി.എം.കെ ജില്ല സെക്രട്ടറിയും എം.എല്.എയുമായ കാര്ത്തിക്കിന്റെ നേതൃത്വത്തിലാണ് ട്രെയിന് തടഞ്ഞത്. ഇവരെ അറസ്റ്റ് ചെയ്ത് നീക്കി. കോയമ്പത്തൂര് പീളമേട് ഭാഗത്ത് നടന്ന സമരത്തിനിടെ രണ്ടുപേര് ദേഹത്ത് തീകൊളുത്താന് നടത്തിയ ശ്രമം പൊലീസ് തടഞ്ഞു.
പെരിയാര് ദ്രാവിഡ കഴകം, മേയ് 17, പുതിയ തമിഴകം തുടങ്ങിയവയും വിദ്യാര്ഥി സംഘടനകളും പ്രതിഷേധവുമായി രംഗത്തിറങ്ങി. പലയിടങ്ങളിലും സമരക്കാരും പൊലീസും തമ്മില് സംഘര്ഷമുണ്ടായി. സേലം ഉളുന്തൂര്പേട്ടയില് ടോള് പ്ലാസ അടിച്ചുതകര്ത്ത കേസില് 15 വാഴ്വുരിമൈ കക്ഷി പ്രവര്ത്തകര് അറസ്റ്റിലായി. ഈറോഡില് പെരിയാര് ദ്രാവിഡ കഴകം പ്രവര്ത്തകര് ഹെഡ്പോസ്റ്റാഫിസിന് പൂട്ടിട്ടത് പരിഭ്രാന്തി പരത്തി. പൊലീസെത്തിയാണ് ജീവനക്കാരെ മോചിപ്പിച്ചത്. പ്രധാന കേന്ദ്ര സര്ക്കാര് ഓഫിസുകള്ക്കും സ്ഥാപനങ്ങള്ക്കും പൊലീസ് കാവലേര്പ്പെടുത്തി. ചൊവ്വാഴ്ച തമിഴ്നാട്ടില് അണ്ണാ ഡി.എം.കെയുടെ നേതൃത്വത്തില് ഉപവാസ സമരം നടക്കും. സംയുക്ത വ്യാപാരി സമിതി കടയടപ്പു സമരവുമുണ്ടാകും. ഏപ്രില് അഞ്ചിന് ഡി.എം.കെ മുന്നണിയുടെ ആഭിമുഖ്യത്തില് ഹര്ത്താലിന് ആഹ്വാനം ചെയ്തിട്ടുണ്ട്.
ബോര്ഡ് രൂപവത്കരണം യാഥാര്ഥ്യമാവുന്നതുവരെ പാര്ലമന്റെ് നടപടി തടസ്സപ്പെടുത്തി പ്രതിഷേധം തുടരുമെന്ന് അണ്ണാ ഡി.എം.കെ നേതാവും ലോക്സഭ ഡെപ്യൂട്ടി സ്പീക്കറുമായ ഡോ. തമ്പിദുരെ അറിയിച്ചു. രാജ്യസഭാംഗത്വം രാജിവെക്കുമെന്നറിയിച്ച അണ്ണാ ഡി.എം.കെയിലെ മുത്തുകറുപ്പന് തീരുമാനം പിന്നീട് മാറ്റി. സംസ്ഥാനത്തെ ക്രമസമാധാനനില സംബന്ധിച്ച് ഗവര്ണര് ബന്വാരിലാല് പുരോഹിത് ചീഫ് സെക്രട്ടറി ഗിരിജ വൈദ്യനാഥന്, ആഭ്യന്തര സെക്രട്ടറി നിരഞ്ജന്മാര്ഡി, ഡി.ജി.പി ടി.കെ. രാജേന്ദ്രന് തുടങ്ങിയവരെ അടിയന്തരമായി വിളിപ്പിച്ച് ചര്ച്ച നടത്തിയതായും റിപ്പോര്ട്ടുണ്ട്.
അതിനിടെ, ഹര്ത്താല് പോലുള്ള സമരപരിപാടികള് നിരോധിക്കണമെന്നാവശ്യപ്പെട്ട് സമര്പ്പിച്ച ഹരജി മധുര ഹൈകോടതി ബെഞ്ച് തിങ്കളാഴ്ച തള്ളി. കാവേരി മാനേജ്മന്റെ് ബോര്ഡ് രൂപവത്കരണവുമായി ബന്ധപ്പെട്ട് കേന്ദ്ര സര്ക്കാറിനെതിരെ തമിഴ്നാട് സര്ക്കാര് സമര്പ്പിച്ച കോടതിയലക്ഷ്യ കേസ് സുപ്രീം കോടതി ഏപ്രില് ഒമ്പതിലേക്ക് മാറ്റിവെച്ചു.
https://www.facebook.com/Malayalivartha
