ഇന്ധനവില കുറക്കാന്‍ എക്‌സൈസ് തീരുവ കുറക്കില്ലെന്ന സൂചന നല്‍കി കേന്ദ്രം. പെട്രോളിയം ഉല്‍പന്നങ്ങളെ ചരക്കുസേവന നികുതി സമ്പ്രദായമായ ജി.എസ്.ടിക്കു കീഴില്‍ കൊണ്ടുവരുകയാണ് വേണ്ടതെന്ന് വകുപ്പു മന്ത്രി ധര്‍മേന്ദ്ര പ്രധാന്‍ അഭിപ്രായപ്പെട്ടു.
കേന്ദ്രസംസ്ഥാന ധനമന്ത്രിമാര്‍ ഉള്‍പ്പെട്ട ജി.എസ്.ടി കൗണ്‍സില്‍ ഇക്കാര്യം പരിഗണിക്കണമെന്ന് അദ്ദേഹം ആവശ്യപ്പെട്ടു.പെട്രോളിയം ഉല്‍പന്നങ്ങളുടെ വില കുറക്കാന്‍ ജി.എസ്.ടിക്കു കീഴില്‍ കൊണ്ടുവരുന്നത് സഹായിക്കും. എന്നാല്‍, അതിനു കേന്ദ്രം മുന്‍കൈയെടുക്കുന്നില്ല. വരുമാനനഷ്ടമുള്ള സംസ്ഥാനങ്ങള്‍ തയാറാകുന്നുമില്ല. ഇതിനിടയിലാണ് മന്ത്രിയുടെ പരാമര്‍ശം.

ഇന്ധനവില നാലു വര്‍ഷത്തിനിടയിലെ ഏറ്റവും ഉയര്‍ന്ന തോതിലെത്തിച്ചത് എക്‌സൈസ് തീരുവയാണെന്ന് ചൂണ്ടിക്കാണിക്കപ്പെടുന്നുണ്ട്. അന്താരാഷ്ട്ര വിപണിയില്‍ അസംസ്‌കൃത എണ്ണക്ക് ഉണ്ടായ വിലവര്‍ധനയല്ല, കേന്ദ്രസര്‍ക്കാര്‍ പലപ്പോഴായി തീരുവ ഉയര്‍ത്തിയതാണ് ജനത്തിന് പോക്കറ്റടിയായി മാറുന്നത്.ഇന്ധനവില കുറഞ്ഞുനിന്ന ഘട്ടത്തില്‍ അതിന്റെ പ്രയോജനം ജനങ്ങള്‍ക്കു കൈമാറുകയല്ല മോദിസര്‍ക്കാര്‍ ചെയ്തത്. പകരം എക്‌സൈസ് തീരുവ ഉയര്‍ത്തി ഖജനാവിലേക്കുള്ള വരുമാനം വര്‍ധിപ്പിക്കുകയായിരുന്നു. മോദിസര്‍ക്കാര്‍ അധികാരത്തില്‍ വന്നതിനു തൊട്ടുപിന്നാലെ തന്നെ രാജ്യാന്തര തലത്തില്‍ അസംസ്‌കൃത എണ്ണവില ഇടിഞ്ഞു.
എന്നാല്‍, ഡ്യൂട്ടി പലവട്ടം ഉയര്‍ത്തിയതിനാല്‍ ഇടിവിന്റെ പ്രയോജനം ഉപയോക്താക്കളിലേക്ക് പകര്‍ന്നുകിട്ടിയില്ല. എണ്ണവില അന്താരാഷ്ട്ര തലത്തില്‍ ഉയര്‍ന്നപ്പോള്‍ നേരിയ തീരുവയിളവു മാത്രമാണ് സര്‍ക്കാര്‍ വരുത്തിയത്.അതിന്റെ ചുവടുപിടിച്ച് സംസ്ഥാനങ്ങള്‍ നികുതി ഇളവുചെയ്യണമെന്ന ആവശ്യവും മുന്നോട്ടുവെച്ചു. എന്നാല്‍, കേന്ദ്രം വലിയ തോതില്‍ ഡ്യൂട്ടി വര്‍ധിപ്പിച്ചിരിക്കെ, തങ്ങളുടെ വരുമാനത്തില്‍ കുറവുവരുത്തുന്ന തീരുമാനമെടുക്കാന്‍ സംസ്ഥാനങ്ങള്‍ തയാറായില്ല.

2014 മേയ് മുതല്‍ 2017 സെപ്റ്റംബര്‍ വരെയുള്ള കാലയളവില്‍ പെട്രോളിന്റെ എക്‌സൈസ് തീരുവ 54 ശതമാനം കൂടി. വാറ്റ് 46 ശതമാനവും ഡീലര്‍മാരുടെ കമീഷന്‍ 73 ശതമാനവുമാണ് വര്‍ധിച്ചത്.