കന്നുകാലികളെ കശാപ്പിനായി വില്‍ക്കരുതെന്ന് കാണിച്ച് കഴിഞ്ഞ വര്‍ഷം മേയില്‍ ഇറക്കിയ വിജ്ഞാപനത്തില്‍ ഭേദഗതി വരുത്തി കേന്ദ്ര സര്‍ക്കാര്‍ പുതിയ കരട് വിജ്ഞാപനം പുറത്തിറക്കി
കന്നുകാലികളെ കശാപ്പിനായി വില്‍ക്കരുതെന്ന് കാണിച്ച് കഴിഞ്ഞ വര്‍ഷം മേയില്‍ ഇറക്കിയ വിജ്ഞാപനത്തില്‍ ഭേദഗതി വരുത്തി കേന്ദ്ര സര്‍ക്കാര്‍ പുതിയ കരട് വിജ്ഞാപനം പുറത്തിറക്കി. മുന്‍ വിജ്ഞാപനത്തിലെ കശാപ്പ് എന്ന വാക്ക് 2018ലെ കരട് വിജ്ഞാപനത്തില്‍ നിന്ന് ഒഴിവാക്കിയിട്ടുണ്ട്.
മുന്‍ വിജ്ഞാപനത്തിലെ പ്രായവും ആരോഗ്യവും കുറഞ്ഞ കന്നുകാലികളെ കശാപ്പ് ചെയ്യരുതെന്ന വാചകം മാത്രമാണ് കേന്ദ്ര വനം, പരിസ്ഥിതി മന്ത്രാലയം പുറത്തിറക്കിയ പുതിയ വിജ്ഞാപനത്തില്‍ നിലനിറുത്തിയിട്ടുള്ളത്. മൃഗങ്ങള്‍ക്കെതിരെയുള്ള ക്രൂരത തടയല്‍ നിയമം 2017 എന്നപേരില്‍ ഇറക്കിയ വിജ്ഞാപനത്തില്‍ കന്നുകാലികളെ കൊല്ലുകയില്ല എന്ന സത്യവാങ്മൂലം നല്‍കാതെ വില്‍പനയ്ക്കായി പോലും എത്തിക്കരുതെന്നും കന്നുകാലികളെ വാങ്ങുന്നയാള്‍ കര്‍ഷകനാണെന്ന് ഉറപ്പ് വരുത്തണമെന്നും നിര്‍ദ്ദേശിച്ചിരുന്നു. ഈ വ്യവസ്ഥയും പൂര്‍ണമായും ഒഴിവാക്കി.
2017ല്‍ ഇറക്കിയ വിജ്ഞാപനത്തിന്റെ നേര്‍പകുതി മാത്രമാണ് ഇപ്പോഴത്തെ വിജ്ഞാപനം. കന്നുകാലി വില്‍പന കേന്ദ്രങ്ങള്‍ പരിശോധിച്ച് അംഗീകാരം നല്‍കുന്നതിന് പുതിയ കമ്മിറ്റിയെ നിയോഗിക്കാനും കരട് വിജ്ഞാപനത്തില്‍ വ്യവസ്ഥയുണ്ട്. വില്‍പന സംബന്ധിച്ച രേഖകള്‍ സൂക്ഷിക്കണം, വില്‍പന കേന്ദ്രങ്ങളില്‍ നല്ല ജീവിത സാഹചര്യങ്ങളുണ്ടാവണം എന്നീ വ്യവസ്ഥകളും ഉള്‍പ്പെടുത്തി.
https://www.facebook.com/Malayalivartha
