സംരക്ഷണമൊരുക്കുകയാണെന്ന വ്യാജേനെ മുറിയില് അടച്ചിട്ടിരിക്കുന്നതായി കൂട്ടബലാത്സംഗ ഇരയായ പെണ്കുട്ടി
പച്ചവെള്ളംപോലും നല്കാതെ ഹോട്ടല് മുറിയില് ജില്ലാ മജിസ്ട്രേറ്റ് അപ്രഖ്യാപിത തടങ്കലിലാക്കിയിരിക്കുകയാണെന്ന് ഉന്നാവോ കൂട്ടബലാത്സംഗക്കേസിലെ ഇരയായ പെണ്കുട്ടി. ബി.ജെ.പി. എം.എല്.എ കുല്ദീപ് സിങ് സെന്ഗാറിന്റെ സഹോദരന്റെ മര്ദനമേറ്റ് പിതാവു മരിച്ചതിനുപിന്നാലെയാണ് സംരക്ഷണമൊരുക്കുകയാണെന്ന വ്യാജേനെ തന്നെ തടങ്കലിലാക്കിയതെന്ന് പെണ്കുട്ടി പറയുന്നു.
കുടിവെള്ളംപോലും നല്കാതെ ജില്ലാ മജിസ്ട്രേറ്റിന്റെ നിര്ദേശപ്രകാരം തന്നെ മുറിയില് അടച്ചിട്ടിരിക്കുകയാണ്. കുറ്റവാളിയെ പിടികൂടി ശിക്ഷിക്കുന്നതിനുപകരം ഇരയെ വീണ്ടും പീഡിപ്പിക്കുന്നതിനു സമാനമാണ് ഇത് പെണ്കുട്ടി പറഞ്ഞു. തനിക്കു നീതി ലഭ്യമാക്കാന് നടപടി സ്വീകരിക്കണമെന്നു പതിനെട്ടുകാരിയായ പെണ്കുട്ടി ഉത്തര്പ്രദേശ് മുഖ്യമന്ത്രി യോഗി ആദിത്യനാഥിനോട് അഭ്യര്ഥിച്ചു. പുതിയ സംഭവവികാസങ്ങള്ക്കുശേഷം കഴിഞ്ഞ തിങ്കളാഴ്ച മുതല് പെണ്കുട്ടിയും കുടുംബാംഗങ്ങളും ഉന്നാവോയിലെ ഹോട്ടല് മുറിയിലാണു താമസം. ഇരയായ പെണ്കുട്ടിയുടെ പിതാവിന്റെ മൃതദേഹം സംസ്കരിക്കരുതെന്നു അലാഹബാദ്ഹൈക്കോടതി ഉത്തരവിട്ടു.
ബി.ജെ.പി. എം.എല്.എയും സഹോദരനും കൂട്ടാളികളും ചേര്ന്നു മാനഭംഗപ്പെടുത്തിയെന്നു പതിനെട്ടു വയസുകാരിയായ പെണ്കുട്ടി ആരോപിച്ചതിനു പിന്നാലെയാണ്, കുട്ടിയുടെ പിതാവ് തിങ്കളാഴ്ച പോലീസ് കസ്റ്റഡിയില് മരിച്ചത്. മൃതദേഹം ഇതുവരെ സംസ്കരിച്ചിട്ടില്ലെങ്കില്, ഇപ്പോള് സംസ്കാരം നടത്തരുതെന്നാണു കോടതി ഉത്തരവ്. സംഭവത്തെപ്പറ്റി മുതിര്ന്ന അഭിഭാഷകനായ ഗോപാല് സ്വരൂപ് ചതുര്വേദി വിശദമായ റിപ്പോര്ട്ട് നല്കിയതിനു പിന്നാലെയാണ് അലഹബാദ്ഹൈക്കോടതി സംസ്കാരം തടഞ്ഞത്.
ഇതിനിടെ, കൂട്ടമാനഭംഗക്കേസ് സി.ബി.ഐ. അന്വേഷിക്കണമെന്നാവശ്യപ്പെട്ടുള്ള ഹര്ജിയില് സുപ്രീം കോടതി അടുത്തയാഴ്ച വാദം കേള്ക്കും. കുട്ടിയുടെ പിതാവിനെ പോലീസ് കസ്റ്റഡിയില് ക്രൂരമായി മര്ദിച്ചെന്നും അഭിഭാഷകനായ മനോഹര് ലാല് ശര്മ നല്കിയ ഹര്ജിയില് പറയുന്നു.
ഭര്ത്താവ് കുറ്റക്കാരനാണെന്നു തെളിഞ്ഞാല് കുടുംബം കൂട്ടആത്മഹത്യ ചെയ്യുമെന്നു കുറ്റാരോപിതനായ ബി.ജെ.പി.എം.എല്.എ കുല്ദീപ് സിങ് സെന്ഗാറിന്റെ ഭാര്യ സംഗീത ലഖ്നൗവില് ഡി.ജി.പിയുമായി നടത്തിയ കൂടിക്കാഴ്ചയ്ക്കുശേഷം മാധ്യമങ്ങളോടു വ്യക്തമാക്കി.
ചെയ്യാത്ത കുറ്റത്തിന്റെ പേരില് പഴികേട്ട് ഭര്ത്താവ് കടുത്ത മാനസിക സമ്മര്ദം അനുഭവിക്കുകയാണ്. അദ്ദേഹത്തെയും പരാതിക്കാരിയായ പെണ്കുട്ടിയെയും അവരുടെ അമ്മാവനെയും നാര്ക്കോ അനാലിസിസ് ടെസ്റ്റിനു വിധേയരാക്കാനും സംഗീത വെല്ലുവിളിച്ചു. പരാതിക്കാരിയുടെ മൊഴിയില്െവെരുദ്ധ്യമുണ്ട്. തങ്ങളുടെ കുടുംബത്തിനെതിരേ രാഷ്ട്രീയ ഗൂഢാലോചന നടക്കുന്നതായി സംശയിക്കുന്നു. സംഭവത്തിന്റെ നിജസ്ഥിതി തെളിയണമെങ്കില് കേസ് സി.ബി.ഐ. അന്വേഷിക്കണം സംഗീത പറഞ്ഞു.
ഭര്ത്താവ് നിരപരാധിയാണ്. സംഭവത്തില് ഉള്പ്പെട്ടിട്ടുണ്ടെന്നതിനു യാതൊരു തെളിവും ഇതുവരെയില്ല. 15 വര്ഷമായി രാഷ്ട്രീയ രംഗത്തുള്ള അദ്ദേഹത്തെ പീഡനവീരനെന്നു വിളിച്ച് ആക്ഷേപിക്കരുത്. ഇപ്പോഴത്തെ സംഭവവികാസങ്ങള്ക്കുശേഷം പെണ്മക്കള്ക്കു പഠനത്തില് ശ്രദ്ധിക്കാന്പോലും കഴിയുന്നില്ല. കുറ്റം തെളിയുന്നതിനുമുമ്ബേ എം.എല്.എ. സ്ഥാനം രാജിവയ്ക്കേണ്ട ആവശ്യമില്ലെന്നും അവര് പറഞ്ഞു.
https://www.facebook.com/Malayalivartha
