റെസ്റ്റോറന്റ്  ആണ് എന്ന് തെറ്റിദ്ധരിപ്പിച്ച് ബാർ ഉദ്​ഘാടനം ചെയ്യിപ്പിച്ചുവെന്ന ആരോപണവുമായി ബി.ജെ.പി എം.പി സാക്ഷി മഹാരാജ്​ രംഗത്ത്. താന്‍ ഉദ്​ഘാടനം ചെയ്​ത നൈറ്റ്​ ക്ലബ്ബിനെതിരെ നടപടി സ്വീകരിക്കണമെന്നാവശ്യപ്പെട്ടുകൊണ്ട് അദ്ദേഹം പൊലീസിന്​ കത്തയച്ചു. തെറ്റിദ്ധരിപ്പിച്ചാണ്​ തന്നെ നൈറ്റ്​ ക്ലബ്ബ്​ ഉദ്​ഘാടനത്തിന്​ കൊണ്ടുപോയതെന്ന്​ അദ്ദേഹം കത്തില്‍ പറയുന്നു.

ഡല്‍ഹിയിലേക്ക്​ വിമാനം കയറേണ്ട തിരക്കിലായതിനാല്‍ താന്‍ രണ്ട്​- മൂന്ന്​ മിനുട്ടിനുള്ളില്‍ റിബ്ബണ്‍ മുറിച്ച്‌​ ഉദ്​ഘാടനം നടത്തുകയും ചെയ്​തു. പിന്നീട്​ മാധ്യമങ്ങളിലൂടെയാണ്​ അത്​ റെസ്റ്റോറന്റല്ല നൈറ്റ്​ ക്ലബ്ബാണ്​ എന്ന്​ തിരിച്ചറിഞ്ഞത്. അത്​ മദ്യശാലയാണെന്നും ചിലര്‍ പറഞ്ഞറിയാന്‍ കഴിഞ്ഞു. ഇതേതുടര്‍ന്ന്​ താന്‍ റെസ്റ്റോറന്റിന്റെ ലൈസന്‍സ്​ ആവശ്യപ്പെട്ടപ്പോള്‍ ഉടമസ്​ഥര്‍ അത്​ കാണിച്ചു തന്നില്ല. അതിനര്‍ഥം എല്ലാകാര്യങ്ങളും അവര്‍ ഗൂഢാലോചന നടത്തി നടപ്പാക്കുകയായിരുന്നു എന്നാണ്.

സ്വന്തം മണ്ഡലമായ ഉന്നാവോയിലെ അഭിഭാഷകന്‍ രാജന്‍ സിങ്​ ചൗഹാന്‍ ലക്​നോ അലിഗഞ്ചിലെ റസ്​റ്ററന്‍റ്​ ഉത്‌ഘാടനത്തിനാണ് എന്ന് ​ തെറ്റിദ്ധരിപ്പിച്ചാണ് ​​ ​തന്നെ കൂട്ടിക്കൊണ്ടുപോയത്​. റെസ്റ്റോറന്റ് ഉടമകളായ സുമിത്​ സിങ്ങും അമിത്​ ഗുപ്​തയും ഉദ്​ഘാടനത്തിന്​ താന്‍ തന്നെ വേണമെന്ന്​ നിര്‍ബന്ധം പിടിച്ചതായി രാജന്‍ സിങ്​ ചൗഹാന്‍ തന്നോട്​ പറഞ്ഞു.

തന്റെ പവിത്രമായ പ്രതിഛായക്ക്​ കളങ്കം വരുത്തുന്നതായിരുന്നതാണ്​ ഇൗ സംഭവം. റസ്​റ്ററന്‍റ്​ എന്ന വ്യാജേന നടത്തുന്ന ഇൗ ബാറിനെ കുറിച്ച്‌​ പൊലീസ്​ അന്വേഷിക്കണമെന്നും. നിയമപരമായി എന്തെങ്കിലും തെറ്റായ പ്രവര്‍ത്തികള്‍ ഇവിടെ നടന്നിട്ടുണ്ടെങ്കില്‍ ഈ സ്​ഥാപനം അടച്ചു പൂട്ടണമെന്നും തട്ടിപ്പു​കാര്‍ക്കെതിരെ ശക്തമായ നടപടി സ്വീകരിക്കണമെന്നും സാക്ഷി മഹാരാജ്​ ആവശ്യപ്പെട്ടു.