മോദി സര്‍ക്കാരിന്റെ നാലുവര്‍ഷത്തെ ഭരണം ഇന്ത്യന്‍ സമ്പദ് വ്യവസ്ഥയും ജനങ്ങളുടെ സൈ്വര്യ ജീവിതവും എങ്ങനെ തച്ചുടച്ചെന്ന് തുറന്നുകാട്ടി സിപിഐ എം ലഘുലേഖകള്‍ പ്രകാശനം ചെയ്തു. 'മോദി സര്‍ക്കാരിന്റെ നാലുവര്‍ഷത്തെ ജനദ്രോഹ ഭരണം; എന്തുകൊണ്ട് അവസാനിക്കണം' എന്ന് ചൂണ്ടിക്കാട്ടുന്ന നാലു ഭാഗമാണ് ജനറല്‍ സെക്രട്ടറി സീതാറാം യെച്ചൂരിയും പൊളിറ്റ്ബ്യൂറോ അംഗം ബൃന്ദ കാരാട്ടും ചേര്‍ന്ന് പ്രകാശനം ചെയ്തത്.

നല്‍കിയ വാഗ്ദാനങ്ങള്‍ എല്ലാം ലംഘിച്ച്, വര്‍ഗീയ ധ്രുവീകരണത്തിലൂടെ രാജ്യത്തെ ഐക്യം തകര്‍ക്കുകയാണ് മോദി സര്‍ക്കാര്‍ ചെയ്തതെന്ന് ലഘുലേഖകള്‍ വ്യക്തമാക്കുന്നു. സമ്പാദ്യ വ്യസ്ഥയുടെ തകര്‍ച്ച, വാഗ്ദാനങ്ങള്‍ ലംഘിച്ച് ജനങ്ങളെ വഞ്ചിച്ചു, ഭരണഘടനാ അവകാശങ്ങള്‍ നിഷേധിച്ചും വെള്ളംചേര്‍ത്തും തകര്‍ത്തും നടപ്പാക്കിയ അട്ടിമറികള്‍, ജനങ്ങളുടെ ജീവിതവും ഭാവിയും അപകടത്തിലാക്കി തുടങ്ങി സമസ്ഥമേഖലകളിലെയും സ്ഥിതി ലഘുലേഖയില്‍ വിവരിക്കുന്നു. ഗ്രാമീണ തൊഴിലുറപ്പ് പദ്ധതിയടക്കം മികച്ച നിലയില്‍ നടന്നിരുന്ന നിരവധി പദ്ധതികള്‍ സര്‍ക്കാര്‍ അട്ടിമറിച്ചു. സമൂഹത്തിലെ ഐക്യം ഇല്ലാതാക്കാനുള്ള ശ്രമം ശക്തമായി അക്രമി സംഘങ്ങള്‍ നടപ്പാക്കുന്നു. എല്ലാ ജനാധിപത്യ സംവിധാനങ്ങളും ഫെഡറല്‍ തത്വങ്ങളും അട്ടിമറിക്കപ്പെട്ടു. ധനകമീഷന്റെ പരിഗണനാ വിഷയങ്ങള്‍ ചെറിയ സംസ്ഥാനങ്ങള്‍ക്ക് എതിരാണ്. ജിഎസ്ടി നടപ്പാക്കിയതോടെ സംസ്ഥാനങ്ങളുടെ സാമ്പത്തിക സ്ഥിതി കൂടുതല്‍ മോശമാക്കി.

എല്ലാമേഖലയും തച്ചുതകര്‍ത്ത് ജനങ്ങളുടെ ജീവിതം ദുസ്സഹമാക്കിയിരിക്കുകയാണ്. ഇന്ത്യന്‍ ജനതയുടെ നിലനില്‍പ്പുതന്നെ അപകടത്തിലാക്കിയ ബിജെപി സര്‍ക്കാര്‍ തൂത്തെറിയപ്പെടേണ്ടതാണെന്ന് ലഘുലേഖ ചൂണ്ടിക്കാട്ടുന്നു.