ഐ .പി.എൽ ക്രിക്കറ്റ്​ വാതുവെപ്പ്​ കേസിൽ പ്രശസ്​ത ബോളിവുഡ്​ നടനും നിർമാതാവുമായ അർബാസ്​ ഖാൻ കുറ്റം സമ്മതിച്ചു. വാതു വെപ്പിൽ ഏർപ്പെട്ടതായി താനെ ആൻറി എക്​സ്​ടോർഷൻ സെല്ലിന്​(എ.ഇ.സി) മുമ്പാകെയാണ്​ ഖാൻ കുറ്റസമ്മതം നടത്തിയത്​. അദ്ദേഹത്തെ മൊഴി രേഖപ്പെടുത്താനായി ഇന്ന്​ വിളിച്ചു വരുത്തിയിരുന്നു.അർബാസ്​ ഖാ​ന്റെ വാതുവെപ്പ് സംഘവുമായുള്ള ബന്ധത്തെ കുറിച്ച്​ നേരത്തെ​ അറസ്​റ്റിലായ രാജ്യത്തെ കുപ്രസിദ്ധ വാതുവെപ്പുകാരൻ സോനു ജലാൻ ​അന്വേഷണ ഉദ്യോഗസ്​ഥരോട്​ വെളിപ്പെടുത്തിയിരുന്നു. ഇതേ കുറിച്ചറിയാൻ​ വെള്ളിയാഴ്​ച മുതൽ അർബാസ് ഖാനെ ചോദ്യം ചെയ്​തു വരികയായിരുന്നു​.​ പൊലീസ്​ സ്​റ്റേഷനിൽ ഖാനെയും ജലാനേയും മുഖാമുഖം ഇരുത്തിയാണ്​ ചോദ്യം ചെയ്​തത്​.അധോലോക രാജാവ്​ ദാവൂദ്​ ഇബ്രാഹിമുമായി ബന്ധമുള്ളയാളാണ്​ ജലാനെന്ന്​ സൂചനയുണ്ട്​.​. ജലാൻ ഉ​ൾപ്പെടെ രാജ്യാന്തര വാതുവെപ്പു സംഘത്തിലെ നാലു പേർ മെയ്​ 15നാണ്​​ എ.ഇ.സിയുടെ വലയിലാകുന്നത്​. തുടർന്നു നടത്തിയ അന്വേഷണത്തിലാണ്​ ജലാനും അർബാസും തമ്മിലുള്ള ബന്ധം പുറത്താവുന്നത്​.

തങ്ങൾക്ക്​ അഞ്ചു വർഷത്തോളമായി പരസ്​പരം അറിയാമെന്ന്​ ഇരുവരും പറഞ്ഞു .ഐ .പി.എൽ ടീമുകൾക്കു വേണ്ടിയും കളിക്കാർക്കു വേണ്ടിയും വാതുവെപ്പിലേർപ്പെട്ട പല പ്രമുഖരുടെ പേരു വിവരങ്ങളും സോനു ജലാൻ വെളിപ്പെടുത്തിയിട്ടുണ്ടെന്ന് താനെ ക്രൈം ബ്രാഞ്ചിലെ ആൻറി എക്​സ്​ടോർഷൻ സെൽ ഒാഫീസർ പറഞ്ഞു.ജലാ​ന്റെ മൊഴി അയാളുടെ കൈപ്പടയിലെഴുതിയ സ്വകാര്യ ഡയറിയിലെ കുറിപ്പുകളുമായി തട്ടിച്ച്​ സ്​ഥിരീകരിച്ചിട്ടു​ണ്ട്​. ഇൗ ഡയറി പൊലീസി​ന്റെ കൈവശമാണുള്ളത്​. അതേ സമയം ഒന്നിലധികം ഫോൺകോളുകൾ വിളിക്കാൻ സാധിക്കുന്ന ‘ലൈൻ ഹോൾഡിങ്​ മെഷീൻ’ ജലാ​ന്റെ വീട്ടിൽ നിന്ന്​ പൊലീസ്​ പിടിച്ചെടുത്തിട്ടുണ്ട്​.കഴിഞ്ഞ ഐ .പി.എൽ സീസണുകളിലൊന്നിൽ ഖാൻ ജലാനുമായി ചേർന്ന്​ വാതുവെപ്പിൽ പങ്കാളിയായിരുന്നതായി പൊലീസ്​ പറഞ്ഞു. വലിയ പണം കൈമാറ്റം ഖാനും ജലാനുമായുണ്ടായി. എന്നാൽ കോടികൾ നൽകിയില്ലെങ്കിൽ​ ഖാന്റെ വാതുവെപ്പ്​ സ്വാഭാവം പുറം ലോകത്തെ അറിയിക്കുമെന്ന​ ഭീഷണി ഉയർന്നു. മൂന്നു കോടിയോളം രൂപയുടെ ഇടപാട്​ ജലാനുമായി അർബാസ്​ ഖാൻ നടത്തിയതായാണ്​ പൊലീസ്​ വൃത്തങ്ങൾ നൽകുന്ന സൂചന. 2013ൽ മലയാളി ക്രിക്കറ്റ്​ താരം ശ്രീശാന്ത്​ അകപ്പെട്ട വാതുവെപ്പ്​ കേസി​​െൻറ സൂത്രധാരനും സോനു ജലാൻ ആയിരുന്നു