ഉത്തര്‍പ്രദേശിലെ ആളില്ലാ ലെവല്‍ക്രോസില്‍ ട്രെയിനിടിച്ച്് 13 സ്‌കൂള്‍ കുട്ടികള്‍ അതിദാരുണമായി മരിച്ച സംഭവത്തെ തുടര്‍ന്ന് വിരമിച്ച റെയില്‍വേ ജീവനക്കാരെ ആളില്ലാ ലെവല്‍ ക്രോസുകളില്‍ അടിയന്തരമായി നിയമിക്കാന്‍ റെയില്‍വേ തീരുമാനം. ഇവരുടെ നിയമന പ്രക്രിയ വേഗത്തില്‍ പൂര്‍ത്തീകരിക്കാന്‍ പ്രത്യേകത കമ്മിറ്റിയും രൂപവത്കരിച്ചു. ഉത്തര്‍പ്രദേശിലെ കുശിനഗര്‍ ജില്ലയിലെ ആളില്ലാ ലെവല്‍ക്രോസില്‍ കഴിഞ്ഞമാസം സ്‌കൂള്‍ വാനില്‍ പാസഞ്ചര്‍ ട്രെയിനിടിച്ചാണ് 13 കുട്ടികള്‍ മരിക്കുകയും എട്ടു പേര്‍ക്ക് പരിക്കേല്‍ക്കുകയും ചെയ്തത്. 
ഡിവൈന്‍ മിഷന്‍ സ്‌കൂളിലെ 20 കുട്ടികളുമായി പോയ വാനാണ് അപകടത്തില്‍ പെട്ടത്. രാജ്യത്തെമ്പാടുമായി 5792 ആളില്ലാ ലെവല്‍ക്രോസുകളാണുള്ളത്. ഇതില്‍ 3479 എണ്ണം ബ്രോഡ് ഗേജ് പാതയിലാണ്. ഗുജറാത്തിലാണ് ഏറ്റവും കൂടുതല്‍ ഇത്തരം ലെവല്‍ ക്രോസുകള്‍. 1700 എണ്ണം. ഉത്തര്‍പ്രദേശില്‍ 912ഉം ബിഹാറില്‍ 742ഉം രാജസ്ഥാനില്‍ 464ഉം പശ്ചിമ ബംഗാളില്‍ 314ഉം മധ്യപ്രദേശില്‍ 255ഉം ലെവല്‍ ക്രോസുകളില്‍ കാവലിന് ആളില്ല. 

ദുരന്തങ്ങള്‍ ആവര്‍ത്തിക്കാതിരിക്കാന്‍ ആദ്യം ബ്രോഡ്‌ഗേജ് പാതയിലെ 3479 ലെവല്‍ക്രോസുകളിലാണ് ജീവനക്കാരെ നിയമിക്കുക. ഇത്തരം ആളില്ലാ ലെവല്‍ക്രോസുകള്‍ക്ക് സുസ്ഥിര പരിഹാരമായ ഉയരം കുറഞ്ഞ സബ് വേകള്‍, മേല്‍പാതകള്‍, അടിപ്പാതകള്‍ എന്നിവ നിര്‍മിക്കുന്നതുവരെ ജീവനക്കാരെ നിയമിക്കാനാണ് തീരുമാനമെന്ന് മുതിര്‍ന്ന റെയില്‍വേ ഉദ്യോഗസ്ഥന്‍ അറിയിച്ചു. ജീവനക്കാരുടെ കുറവുള്ളതുകൊണ്ടാണ് സമാന ജോലി ചെയ്ത് റെയില്‍വേയില്‍ നിന്ന് വിരമിച്ചവരെ വീണ്ടും നിയമിക്കാന്‍ തീരുമാനിച്ചത്. ഇതിനായി മുതിര്‍ന്ന ഉദ്യോഗസ്ഥനെ എക്‌സിക്യൂട്ടിവ് ഡയറക്ടര്‍ പദവിയില്‍ നിയമിച്ചുകൊണ്ട് പ്രത്യേക കമ്മിറ്റിയും റെയില്‍വേ രൂപവത്കരിച്ചു. 2019-20ഓടെ രാജ്യത്ത് ആളില്ലാ ലെവല്‍ ക്രോസുകള്‍ ഇല്ലാതാക്കുമെന്നും റെയില്‍വേ മന്ത്രി പിയൂഷ് ഗോയല്‍ അറിയിച്ചു.