കാര്‍ഷിക ഉത്പന്നങ്ങള്‍ക്ക് വില വര്‍ധന ആവശ്യപ്പെട്ട് 104 കര്‍ഷക സംഘടനകളുടെ സംയുക്ത സമരസമിതിയുടെ ആഭിമുഖ്യത്തില്‍ നടത്തുന്ന സമരം മാധ്യമ ശ്രദ്ധനേടാനുള്ള വേലയാണെന്ന് കേന്ദ്ര കൃഷിമന്ത്രി രാധാ സിങ് ആരോപിച്ചു. എന്നാല്‍ സമരത്തെ അവമതിക്കുന്ന തരത്തില്‍ കേന്ദ്രമന്ത്രി നടത്തിയ പരാമര്‍ശം രൂക്ഷ വിമര്‍ശനത്തിന് ഇടയാക്കി. മന്ത്രിയുടെത് അനവസരത്തിലുള്ള പരാമര്‍ശമാണെന്ന് കോണ്‍ഗ്രസ് വിമര്‍ശിച്ചു. 

ഹരിയാന മുഖ്യമന്ത്രി മനോഹര്‍ ലാല ഖട്ടറും സമരം ചെയ്യുന്ന കര്‍ഷകരെ പരിഹസിച്ചു. ഒരു പ്രശ്‌നവും ഇവിടെയില്ലെന്നും കര്‍ഷക സമരം അനാവശ്യമാണെന്നും മുഖ്യമന്ത്രി പറഞ്ഞു. കാര്‍ഷികോല്‍പ്പന്നങ്ങള്‍ വില്‍ക്കുന്നില്ലെങ്കില്‍ കര്‍ഷകര്‍ക്ക് തന്നെയായിരിക്കും നഷ്ടമെന്നും അദ്ദേഹം കൂട്ടിച്ചേര്‍ത്തു.

മധ്യപ്രദേശ്, ഉത്തര്‍പ്രദേശ്, പഞ്ചാബ്, രാജസ്ഥാന്‍, ഹരിയാന, മഹാരാഷ്ട്ര എന്നിവിടങ്ങളില്‍ സമരം ശക്തിപ്പെട്ടതോടെ ഡല്‍ഹി അടക്കമുള്ള നഗരങ്ങളില്‍ പഴങ്ങള്‍ക്കും പച്ചക്കറികള്‍ക്കും വില കുതിച്ചുയര്‍ന്നിട്ടുണ്ട്. എന്നാല്‍, സമരക്കാരുമായി ചര്‍ച്ച നടത്തുന്നതിന് പകരം എതിര്‍പ്രചാരണവുമായി അതിനെ നേരിടാനാണ് കേന്ദ്ര സര്‍ക്കാറിന്റെ ശ്രമം.കര്‍ഷകര്‍ അവരുടെ ഉത്പന്നങ്ങള്‍ നാഗരകേന്ദ്രങ്ങളിലേക്ക് അയക്കാന്‍ വിസമ്മതിച്ചും പാലും പച്ചക്കറികളും റോഡിലൊഴുക്കിയുമാണ് സമരം നടത്തുന്നത്.

സമരം രണ്ടാം ദിവസത്തിലേക്ക് കടന്നതോടെ പാല്‍, പഴം, പച്ചക്കറി വിതരണം തടസ്സപ്പെട്ട് ചന്തകള്‍ അടച്ചു തുടങ്ങി. രാഹുല്‍ ഗാന്ധി, കമല്‍നാഥ് അടക്കമുള്ള കോണ്‍ഗ്രസ് നേതാക്കള്‍ പിന്തുണ പ്രഖ്യാപിച്ചതോടെ കോണ്‍ഗ്രസ് സ്‌പോണ്‍സര്‍ ചെയ്യുന്ന സമരമാണെന്ന ആരോപണവുമായി കേന്ദ്ര ആഭ്യന്തര മന്ത്രി രാജ്‌നാഥ് സിങ് രംഗത്തുവന്നിരുന്നു.

കാര്‍ഷിക കടങ്ങള്‍ എഴുതിത്തള്ളണമെന്നും സ്വാമിനാഥന്‍ കമ്മിറ്റി ശിപാര്‍ശകള്‍ നടപ്പാക്കണമെന്നും ആവശ്യപ്പെട്ട് 'രാഷ്ട്രീയ കിസാന്‍ മഹാസംഘ്' ആണ് 10 ദിവസത്തെ സമരത്തിന് ആഹ്വാനം ചെയ്തത്. 10 ലക്ഷത്തോളം കര്‍ഷകര്‍ അംഗങ്ങളായുള്ള 'കക്കാജി' എന്നറിയപ്പെടുന്ന ശിവകുമാര്‍ ശര്‍മയുടെ നേതൃത്വത്തിലുള്ള ഭാരതീയ കിസാന്‍ മസ്ദൂര്‍ സംഘ് ആണ് സമരരംഗത്തുള്ള സംഘടനകളില്‍ ഏറ്റവും ശക്തമായത്. ഭരതീയ കിസാന്‍ യൂനിയന്റെ പഞ്ചാബ്, ഹരിയാന ഘടകങ്ങളും സമരത്തിനൊപ്പമുണ്ട്. കര്‍ഷക മുന്നേറ്റം, ദേശീയ കര്‍ഷക സമാജം, മലനാട് കര്‍ഷക രക്ഷാസമിതി, കര്‍ഷക സേന എന്നിങ്ങനെ നാല് കര്‍ഷക സംഘടനകളാണ് കേരളത്തില്‍നിന്ന് ഇതുവരെ സമരത്തിന് പിന്തുണ പ്രഖ്യാപിച്ചിരിക്കുന്നത്.