രാജ്യത്ത് വില്‍ക്കുന്ന എല്ലാ മരുന്നുകളെയും വിലനിയന്ത്രണ പട്ടികയില്‍ ഉള്‍പ്പെടുത്താനൊരുങ്ങി കേന്ദ്രസക്കാര്‍ ഇതിനായി നിലവിലുള്ള മരുന്നുവില നിയന്ത്രണ ചട്ടങ്ങളില്‍ ഭേദഗതികള്‍ കൊണ്ടുവരാനാണ് കേന്ദ്ര ആരോഗ്യമന്ത്രാലയം ശ്രമം തുടങ്ങിയിരിക്കുന്നത്.ജൂണ്‍ അവസാനത്തേടെ തന്നെ പുതിയ സംവിധാനം അവതരിപ്പിക്കാനാണ് കേന്ദ്രസര്‍ക്കാരിന്റെ ശ്രമം. നിലവില്‍ 850 അവശ്യ മരുന്നുകള്‍ മാത്രമാണ് വിലനിയന്ത്രണ പട്ടികയില്‍ ഉള്ളത്. ഇവയുടെ വില സമയോചിതമായി പരിഷ്‌കരിക്കാന്‍ ദേശീയ മരുന്നുവില നിയന്ത്രണ അതോറിറ്റിയും കേന്ദ്രസര്‍ക്കാര്‍ കൊണ്ടുവന്നിരുന്നു. 

അതോറിറ്റിയുടെ പട്ടികയില്‍ ഇല്ലാത്ത മരുന്നുകള്‍ക്ക് എല്ലാവര്‍ഷവും 10 ശതമാനം വരെ വര്‍ധിപ്പിക്കാന്‍ മരുന്നുകമ്പനികള്‍ക്ക് അനുവാദമുണ്ടായിരുന്നു. എല്ലാമരുന്നുകളെയും ഉള്‍പ്പെടുത്തി വിലനിയന്ത്രണ സൂചിക കേന്ദ്രസര്‍ക്കാര്‍ പുറത്തിറക്കും. മരുന്നുകമ്പനികള്‍ക്ക് ഇവയുടെ വില വര്‍ധിപ്പിക്കണമെങ്കില്‍ ഈ സൂചികയുടെ അടിസ്ഥാനത്തില്‍ മാത്രമേ സാധിക്കുകയുള്ളു. സ്വാഭാവികമായും മരുന്നു കമ്പനികള്‍ സര്‍ക്കാര്‍ നീക്കത്തിനെതിരെ രംഗത്ത് വന്നേക്കും.

കേന്ദ്ര ഫാര്‍മസ്യൂട്ടിക്കല്‍ വകുപ്പിന്റെ ശുപാര്‍ശ ആരോഗ്യ മന്ത്രാലയത്തിന്റെ പരിഗണനയിലാണ്. ഇതിന്മേലുള്ള അവസാനവട്ട നടപടികള്‍ പൂര്‍ത്തിയായാല്‍ ജൂണ്‍ അവസാനം പുതിയ മരുന്നുവില നിയന്ത്രണ നയം നിലവില്‍ വരുമെന്നാണ് സൂചന.മരുന്നുകളുടെ മൊത്തവില്പ്പന വില കണക്കാക്കിയാണ് വിലനിയന്ത്രണം കൊണ്ടുവരുന്നത്. 

നീതി ആയോഗിന്റെ നിര്‍ദ്ദേശപ്രകാരമാണ് പുതിയ തീരുമാനം. 2013 ല്‍ മരുന്നുവില നിയന്ത്രണം കൊണ്ടുവന്നതും നീതി ആയോഗിന്റെ ശുപാര്‍ശ പ്രകാരമായിരുന്നു. ഒരുലക്ഷം കോടിയുടെ മരുന്നുവിപണിയാണ് രാജ്യത്തുള്ളത്. ഇതില്‍ 17 ശതമാനം മരുന്നുകളില്‍ മാത്രമാണ് നിലവിലെ വിലനിയന്ത്രണം ബാധകമായിട്ടുള്ളത്.