എച്ച്.ഡി. കുമാരസ്വാമിയുടെ നേതൃത്വത്തിലുള്ള കോണ്‍ഗ്രസ് ജനതാദള്‍ എസ് സഖ്യ സര്‍ക്കാറിന്റെ ആദ്യഘട്ട മന്ത്രിസഭാ വികസനവും സത്യപ്രതിജ്ഞാ ചടങ്ങും ബുധനാഴ്ച നടക്കും. രാജ്ഭവനില്‍ ഉച്ചക്ക് 2.12ന് നടക്കുന്ന ചടങ്ങില്‍ കോണ്‍ഗ്രസിന്റെ 13ഉം ജെ.ഡി.എസിന്റെ ഒമ്പതും എം.എല്‍.എമാര്‍ മന്ത്രിമാരായി സത്യപ്രതിജ്ഞ ചെയ്‌തേക്കും. മുഴുവന്‍ മന്ത്രിമാരുടെയും സത്യപ്രതിജ്ഞക്കുശേഷമേ വകുപ്പുകള്‍ സംബന്ധിച്ച തീരുമാനമുണ്ടാകൂ. ഇന്ന് ആരൊക്കെ സത്യപ്രതിജ്ഞ ചെയ്യുമെന്ന വിവരവും ഇരു പാര്‍ട്ടികളും പുറത്തുവിട്ടിട്ടില്ല. മേയ് 23ന് മുഖ്യമന്ത്രി എച്ച്.ഡി. കുമാരസ്വാമിയും ഉപമുഖ്യമന്ത്രി ജി. പരമേശ്വരയും സത്യപ്രതിജ്ഞ ചെയ്തിരുന്നു.

സര്‍ക്കാര്‍ രൂപവത്കരിച്ചിട്ടും ഐക്യമില്ലായ്മ കാരണം മന്ത്രിസഭ വികസനം വൈകുന്നുവെന്ന ബി.ജെ.പിയുടെ വിമര്‍ശനത്തെ മറികടക്കാനാണ് മന്ത്രിമാരുടെ ലിസ്റ്റ് പൂര്‍ത്തിയാവും മുമ്പേ ആദ്യഘട്ട സത്യപ്രതിജ്ഞ നടത്തുന്നത്. സഖ്യധാരണ പ്രകാരം, 34 അംഗ മന്ത്രിസഭയില്‍ കോണ്‍ഗ്രസിന് 24ഉം ജെ.ഡി.എസിന് മുഖ്യമന്ത്രിപദമടക്കം 12ഉം സ്ഥാനങ്ങളാണുള്ളത്

മന്ത്രിസഭ വികസനവുമായി ബന്ധപ്പെട്ട് ചൊവ്വാഴ്ച ജനതാദള്‍ എസ് നിയമസഭ കക്ഷി യോഗം ചേര്‍ന്നു. ആദ്യഘട്ട മന്ത്രിസഭ വികസനത്തില്‍ ചുരുങ്ങിയത് ഒമ്പതുപേരെയെങ്കിലും ഉള്‍പ്പെടുത്തുമെന്ന് മുഖ്യമന്ത്രി എച്ച്.ഡി. കുമാരസ്വാമി പറഞ്ഞു.

കോണ്‍ഗ്രസ് മന്ത്രിമാരുടെ ലിസ്റ്റുമായി കെ.പി.സി.സി അധ്യക്ഷനും ഉപമുഖ്യമന്ത്രിയുമായ ജി. പരമേശ്വര, കോണ്‍ഗ്രസ് നിയമസഭ കക്ഷിനേതാവ് സിദ്ധരാമയ്യ, കോണ്‍ഗ്രസ് ലോക്‌സഭ കക്ഷിനേതാവ് മല്ലികാര്‍ജുന്‍ ഖാര്‍ഗെ, കര്‍ണാടക കോണ്‍ഗ്രസിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറി കെ.സി. വേണുഗോപാല്‍ എം.പി തുടങ്ങിയവര്‍ ചൊവ്വാഴ്ച രാഹുല്‍ ഗാന്ധിയുമായി നടത്തിയ ചര്‍ച്ച രാത്രിവരെ നീണ്ടു.