കര്ഷകര് രാജ്യവ്യാപകമായി തുടരുന്ന പ്രക്ഷോഭത്തിന്റെ അവസാന ദിവസമായ ഈ മാസം 10ന് ഭാരത് ബന്ദ് ആചരിക്കുമെന്ന് കര്ഷക സംഘടനകള്
കര്ഷകര് രാജ്യവ്യാപകമായി തുടരുന്ന പ്രക്ഷോഭത്തിന്റെ അവസാന ദിവസമായ ഈ മാസം 10ന് ബന്ദ് ആചരിക്കുമെന്ന് സമര രംഗത്തുള്ള കര്ഷക സംഘടനകള് വാര്ത്തസമ്മേളനത്തില് അറിയിച്ചു. ഇതുവരെ നഗരങ്ങളിലേക്കുള്ള പാലും പച്ചക്കറിയുമാണ് തടസ്സപ്പെടുത്തിയിരുന്നത്. തിങ്കളാഴ്ച ഗ്രാമങ്ങളിലും അവ മുടക്കും. അതേസമയം ജൂണ് ഒന്നിന് ആരംഭിച്ച സമരം പഞ്ചാബില് ആറിന് സമാപിക്കും.
കോണ്ഗ്രസ് അധ്യക്ഷന് രാഹുല് ഗാന്ധി അടക്കമുള്ളവര് പിന്തുണ പ്രഖ്യാപിച്ച സമരത്തിനു പിന്നില് കോണ്ഗ്രസ് ആണെന്ന് ആരോപിക്കുന്നത് കര്ഷകരെ അപമാനിക്കലാണെന്ന് മധ്യപ്രദേശില് നിന്നുള്ള കര്ഷക നേതാവ് ശിവകുമാര് ശര്മ പറഞ്ഞു.
കര്ഷകരെ ഭിന്നിപ്പിച്ച് സമരം പൊളിക്കാനാണ് സര്ക്കാര് ശ്രമിക്കുന്നത്. ബി.ജെ.പി ഭരിക്കുന്ന സംസ്ഥാനങ്ങളിലെല്ലാം കര്ഷകര്ക്ക് തെരുവിലിറങ്ങേണ്ട സാഹചര്യം സൃഷ്ടിച്ചത് ആരാണെന്ന് ശര്മ തിരിച്ചുചോദിച്ചു. സമരരംഗത്തുള്ള കര്ഷക സംഘടനകളുമായി സംസാരിക്കാന് പോലും തയാറാകാത്ത സമീപനമാണ് മോദി സര്ക്കാര് സ്വീകരിക്കുന്നതെന്ന് രാഷ്ട്രീയ സ്വാഭിമാന് ആന്ദോളന് നേതാവ് ബാസവ രാജ് പാട്ടീല് കുറ്റപ്പെടുത്തി.
കഴിഞ്ഞ ഒരു വര്ഷമായി നിരന്തരം സര്ക്കാറുമായി ചര്ച്ച നടത്തിയിട്ടും ഫലമില്ലാതെ വന്നപ്പോഴാണ് സമരത്തിനിറങ്ങിയതെന്നും അദ്ദേഹം പറഞ്ഞു.
https://www.facebook.com/Malayalivartha
