കഴിഞ്ഞ ദിവസം ആര്‍.എസ്.എസ് പരിപാടിയില്‍ പങ്കെടുക്കുകയും പ്രസംഗിക്കുകയും ചെയ്ത മുന്‍ രാഷ്ട്രപതി പ്രണബ് മുഖര്‍ജിയെ പ്രശംസിച്ച് മുതിര്‍ന്ന ബി.ജെ.പി നേതാവ് എല്‍.കെ അദ്വാനി രംഗക്കെത്തി. ഇന്ത്യന്‍ ദേശീയതയുടെ ശ്രേഷ്ഠമായ ആശയങ്ങള്‍ വിവരിച്ചുകൊണ്ട് പ്രണബ് നടത്തിയ പ്രസംഗം ചരിത്രസംഭവമാണൊണ്് അദ്വാനി പറഞ്ഞത്. പ്രത്യയശാസ്ത്ര ഭിന്നതകള്‍ക്കും സമാനതകള്‍ക്കും അതീതമായ ആശയസംവാദത്തിന്റെ പ്രശംസനീയമായ ഉദാഹരണമാണ് പ്രണബിന്റെ പ്രസംഗമെന്നും അദ്വാനി പറഞ്ഞു.

തുറന്ന മനോഗതിയുടേയും പരസ്പര ബഹുമാനത്തിന്റേയും അടിസ്ഥാനത്തിലുള്ള ആശയവിനിമയങ്ങള്‍ സഹിഷ്ണുതയും സഹവര്‍ത്തിത്വവും വര്‍ധിപ്പിക്കും. ഇന്ത്യയുടെ പൊതുവായ സ്വപ്നങ്ങള്‍ യാഥാര്‍ത്ഥ്യമാക്കുന്നതിന് സഹിഷ്ണുതയുടേതായ ആശയസംവാദങ്ങള്‍ ഇക്കാലത്ത് അനിവാര്യമാണെന്നും അദ്വാനി കൂട്ടിച്ചേര്‍ത്തു. നാഗ്പൂരില്‍ ആര്‍.എസ്.എസ് ആസ്ഥാനത്ത് നടന്ന പരിപാടിയിലേക്ക് മുന്‍ രാഷ്ട്രപതിയെ ക്ഷണിച്ച ആര്‍.എസ്.എസ് അധ്യക്ഷനേയും ക്ഷണം സ്വീകരിച്ച പ്രണബിനേയും അദ്വാനി അഭിനന്ദിച്ചു.

ശക്തമായ പ്രതിഷേധങ്ങള്‍ മറികടന്നാണ് ആസ്ഥാനത്ത് നടന്ന പരിപാടിയില്‍ പ്രണബ് മുഖര്‍ജി പങ്കെടുത്തത്. തൃതീയ വര്‍ഷ സംഘ് ശിക്ഷ വര്‍ഗ് എന്ന പരിപാടിയിലാണ് പ്രണബ് മുഖര്‍ജി പങ്കെടുത്തത്. ആര്‍.എസ്.എസ് ആസ്ഥാനം സന്ദര്‍ശിച്ച പ്രണബ് മുഖര്‍ജി ആര്‍.എസ്.എസ് സ്ഥാപകന്‍ കെ.ബി ഹെഗ്‌ഡേവാര്‍ ഭാരതത്തിന്റെ മഹാനായ പുത്രനാണെന്ന് പ്രണബ് പുകഴ്ത്തി. ആര്‍.എസ്.എസ് ആസ്ഥാനത്തെ സന്ദര്‍ശക ഡയറിയിലാണ് പ്രണബ് തന്റെ അഭിപ്രായം രേഖപ്പെടുത്തിയത്.