കര്‍ണാടകയില്‍ സ്ഥാനാര്‍ഥി മരിച്ചതിനെ തുടര്‍ന്ന് മാറ്റിവെച്ച ജയനഗര്‍ മണ്ഡലത്തിലെ വേട്ടെടുപ്പ് തുടങ്ങി. മണ്ഡലത്തിലെ ബി.ജെ.പി എം.എല്‍.എ ബി.എന്‍. വിജയകുമാറിന്റെ മരണത്തെ തുടര്‍ന്നാണ് തെരഞ്ഞെടുപ്പ് മാറ്റിവെച്ചത്. മെയ് നാലിന് തെരഞ്ഞെടുപ്പ് റാലിക്കിടെ കുഴഞ്ഞു വീണതിനെ തുടര്‍ന്നാണ് അദ്ദേഹം മരിച്ചത്. ിജയകുമാറിന്റെ സഹോദരന്‍ ബി.എന്‍. പ്രഹ്‌ളാദാണ് ഇവിടെ ബി.ജെ.പി സ്ഥാനാര്‍ഥി.

അതേസമയം, തങ്ങളുടെ സ്ഥാനാര്‍ഥിയായ കാലെഗൗഡയെ പിന്‍വലിച്ച് കോണ്‍ഗ്രസ് സ്ഥാനാര്‍ഥി സൗമ്യ റെഡ്ഡിക്ക് സഖ്യകക്ഷിയായ ജെ.ഡി.എസ് പിന്തുണ നല്‍കിയിട്ടുണ്ട്. 224അംഗ നിയമസഭയിലെ 222 സീറ്റുകളിലേക്കുള്ള വോട്ടെണ്ണല്‍ മെയ്15ന് നടന്നിരുന്നു. 104 സീറ്റു നേടി ബി.ജെ.പി വലിയ ഒറ്റകക്ഷിയായെങ്കിലും 78 സീറ്റു ലഭിച്ച കോണ്‍ഗ്രസും 37 സീറ്റു ലഭിച്ച ജെ.ഡി.എസും ചേര്‍ന്ന് സര്‍ക്കാറുണ്ടാക്കുകയായിരുന്നു. ജയനഗര്‍ മണ്ഡലത്തില്‍ നിന്ന് രണ്ടു തവണ എം.എല്‍.എയായി വിജയകുമാര്‍ തെരഞ്ഞെടുക്കപ്പെട്ടിട്ടുണ്ട്.