ഒരു കാര്‍ വാങ്ങണമെന്ന ബെംഗളൂരു സ്വദേശികളുടെ സ്വപ്‌നം സഫലമാകണമെങ്കില്‍ ഒരു കടമ്പ കൂടി ഇനി കടക്കണം. പുതുതായി കാര്‍ വാങ്ങണമെങ്കില്‍ അത് പാര്‍ക്ക് ചെയ്യുന്നതിനുള്ള സ്ഥലം കൂടി വേണം. ഇന്നലെ കര്‍ണാടക ഗതാഗത മന്ത്രി ഡി.സി തമ്മണ്ണയാണ് ഇത്തരത്തില്‍ ഒരു നിര്‍ദ്ദേശം പരിഗണിച്ചുവരികയാണെന്ന് പറഞ്ഞത്.

നഗരത്തിലെ വര്‍ദ്ധിച്ചുവരുന്ന ഗതാഗതകുരുക്കാണ് ഇത്തരത്തില്‍ ഒരു തീരുമാനമെടുക്കുന്നതിന് കാരണമായത്. പാര്‍ക്കിങ് സ്ഥലം ഇല്ലാത്തവര്‍ പാതയോരത്ത് വാഹനം ഇടുന്നത് നഗരത്തിലെ ഗതാഗതകുരുക്ക് രൂക്ഷമാക്കുവാന്‍ കാരണമാകും. അതാണ് ഇത്തരത്തില്‍ ഒരു നിര്‍ദ്ദേശിത്തിന് പിന്നിലെന്നും കോണ്‍ഗ്രസ് മന്ത്രി മാധ്യമങ്ങളോട് വ്യക്തമാക്കി.

ഇത് മൂലം ആളുകള്‍ കൂടുതല്‍ പൊതുഗതാഗത സൗകര്യത്തെ ഉപയോഗപ്പെടുത്തുമെന്നും മന്ത്രി പ്രതീക്ഷിക്കുന്നത്. ഇതിന് പുറമെ നഗരത്തില്‍ ഡീസല്‍ വാഹനത്തിനും നിയന്ത്രണം ഏര്‍പ്പെടുത്താനുള്ള പദ്ധതിയുണ്ട്. ഇതു കൂടാതെ വാഗ്ദാനം ചെയ്ത സൗജന്യ ബസ് പാസ് നല്‍കുന്നത് സംബന്ധിച്ച് മുഖ്യമന്ത്രി കുമാരസ്വാമി പ്രഖ്യാപനം നടത്തുമെന്നും ഗതാഗത മന്ത്രി വ്യക്തമാക്കി. ഏതാണ്ട് 19.6 ലക്ഷം വിദ്യാര്‍ത്ഥികളാണ് ഇതിന്റെ പ്രയോജനം ലഭിക്കുക.