രാജ്യത്തെ വർധിച്ചുവരുന്ന ഊർജോപയോഗം കുറയ്ക്കാൻ പുതിയ നിർദ്ദേശവുമായി കേന്ദ്ര സർക്കാർ. രാജ്യത്തെ എയർകണ്ടീഷണറുകളിലെ താപനില ഇരുപത്തിനാല് ഡിഗ്രി സെൽഷ്യസായി ക്രമീകരിക്കാനുള്ള നിർദ്ദേശമാണ് കേന്ദ്രസർക്കാർ മുന്നോട്ട് വയ്ക്കുന്നത്. ഇക്കാര്യം പരിഗണിക്കുന്നതാണ് എന്ന് ഊർജമന്ത്രി ആർ കെ സിങ് പറഞ്ഞു.

ഇത്തരം നീക്കത്തിലൂടെ വർധിച്ച് വരുന്ന ഊർജോപയോഗം കുറയ്ക്കാൻ സാധിക്കും. താപനില ക്രമീകരണം ഇരുപത്തിനാല് ഡിഗ്രി സെൽഷ്യസ് മുതൽ ഇരുപത്തി ആറ് ആക്കാനാണ് ആലോചനയെന്ന് എ സി നിർമാതാക്കളുമായുള്ള കൂടിക്കാഴ്ചയിൽ അദ്ദേഹം പറഞ്ഞു. പുതിയ നിബന്ധന നടപ്പിലാക്കിയാൽ പരിസ്ഥിതിക്ക് ദോഷകരമായ ഹരിത ഗൃഹവാതകങ്ങൾ പുറംതള്ളപ്പെടുന്നതും കുറയ്ക്കാൻ സാധിക്കും. പതിനെട്ട് മുതൽ ഇരുപത്തിയൊന്ന് ഡിഗ്രി സെൽഷ്യസിലാണ് ഇപ്പോൾ പലയിടത്തും എ സി പ്രവർത്തിക്കുന്നത്. ഇത് മനുഷ്യന്റെ ആരോഗ്യം നശിപ്പിക്കുന്നതിനും കാരണമാകും. പൊതുജനങ്ങളിൽ അഭിപ്രായ സർവ്വേ നടത്തി നിബന്ധനകൾ പ്രാവർത്തികമാക്കാനാണ് തീരുമാനം.