മഹാരാഷ്ട്രയിലെ റെയ്ഗാര്‍ഡിലെ പ്രാണ്ട്യാ എന്ന് വിളിക്കപ്പെടുന്ന ജ്യോതി സുരേഷ് സര്‍വേശ് എന്ന 28-കാരി വീട്ടമ്മയുടെ കറുത്ത നിറത്തെക്കുറിച്ചും പാചകം അറിയാത്തതിനെക്കുറിച്ചും ബന്ധുക്കളും വീട്ടുകാരും മറ്റുള്ളവരുടെ സാന്നിദ്ധ്യത്തില്‍ പരിഹസിക്കുന്നത് പതിവായിരുന്നു.

'കറുമ്പി' യെന്ന വിളി അസഹനീയമായതോടെ യുവതി കടുംകൈ പ്രയോഗിക്കാന്‍ തീരുമാനം എടുത്തു. മഹദ് ഗ്രാമത്തില്‍ ജൂണ്‍ 18-ന് നടന്ന പുര വാസ്തുബലി ചടങ്ങിന് വിളമ്പിയ ആഹാരത്തില്‍ വിഷം കലര്‍ത്തി അവര്‍ കുടുംബാംഗങ്ങള്‍ക്ക് കൊടുത്തു. അഞ്ചു പേര്‍ വിഷാംശം അകത്തു ചെന്ന് മരണമടയുകയും നൂറിലധികം പേര്‍ക്ക് ഭക്ഷ്യവിഷബാധയേല്‍ക്കുകയൂം ചെയ്തു. 7-നും 13- നും ഇടയില്‍ പ്രായമുള്ള നാലു കുട്ടികളും ഒരു മുതിര്‍ന്നയാളുമാണ് മരണത്തിന് കീഴടങ്ങിയത്.

വിരുന്നിന് വിളമ്പിയ ഭക്ഷണത്തില്‍ ഇവര്‍ കീടനാശിനി കലര്‍ത്തുകയായിരുന്നു. ആഹാരം കഴിച്ച 58-കാരന്‍ സുരേഷ്മാനേയും നാലു മക്കളുമാണ് മരണമടഞ്ഞത്. ഭക്ഷ്യ വിഷബാധയെ തുടര്‍ന്ന് ആഹാരം കഴിച്ച 80 പേര്‍ആശുപത്രിയിലാണ്. മൊത്തം 120 പേര്‍ക്കാണ് വിഷബാധയേറ്റത്.

വിരുന്നിന് വിളമ്പിയ പരിപ്പുകറിയിലാണ് അവര്‍ കീടനാശിനി കലര്‍ത്തിയത്. ഭക്ഷ്യവിഷബാധയെ തുടര്‍ന്ന് ആള്‍ക്കാര്‍ ആശുപത്രിയിലായതോടെ പോലീസ് ഭക്ഷ്യശകലം പരിശോധനയ്ക്ക് അയയ്ക്കുകയും കീടനാശിനി അംശം കണ്ടെത്തുകയുമായിരുന്നു. കൊലപാതകവും കൊലപാതകശ്രമവും ഉള്‍പ്പെടെയുള്ള കുറ്റമാണ് ചുമത്തിയിരിക്കുന്നത്.