ഭവന പദ്ധതിക്കായി ഡല്‍ഹിയില്‍ മരം മുറിക്കുന്നത് ഹൈക്കോടതി തടഞ്ഞു. കേന്ദ്ര സര്‍ക്കാര്‍ ജീവനക്കാരുടെ താമസസ്ഥലങ്ങളുടെ നവീകരണവും വികസനവും നടപ്പിലാക്കുന്നതിന്റെ ഭാഗമായാണ് ഡല്‍ഹിയില്‍ മരങ്ങള്‍ മുറിക്കുന്നത്. 17,000 മരങ്ങള്‍ മുറിക്കാനായിരുന്നു നീക്കം. മരങ്ങള്‍ മുറിക്കരുതെന്ന് ഉത്തരവിട്ട കോടതി ജൂലൈ രണ്ട് വരെ പദ്ധതി നിര്‍ത്തിവയ്ക്കണമെന്നും ഉത്തരവിട്ടു. 1,500 മരങ്ങള്‍ ഇതിനകം മുറിച്ചു കഴിഞ്ഞു. ആയിരക്കണക്കിന് മരങ്ങള്‍ മുറിച്ച് നീക്കുന്നത് പരിസ്ഥിതിക പ്രശ്‌നങ്ങള്‍ ഉണ്ടാക്കുമെന്ന് ചൂണ്ടിക്കാട്ടി ഡോ. കൗശല്‍ കാന്ത് മിശ്ര നല്‍കിയ ഹര്‍ജിയിലാണ് കോടതി വിധി.

മുറിക്കുന്ന മരങ്ങള്‍ക്കു പകരം പുതിയ മരങ്ങള്‍ വയ്ക്കുന്നത് പ്രയോജനം ചെയ്യില്ലെന്നും മിശ്ര ഹര്‍ജിയില്‍ ചൂണ്ടിക്കാട്ടിയിരുന്നു. നവ്‌റോജി നഗര്‍, നേതാജി നഗര്‍, സരോജിനി നഗര്‍ തുടങ്ങിയ സ്ഥലങ്ങളിലെ വലിയ മരങ്ങള്‍ മുറിച്ച് നീക്കാനാണ് പദ്ധതി. മുറിക്കുന്ന ഒരു മരത്തിനു പകരം പത്ത് മരങ്ങള്‍ വീതം വച്ചുപിടിപ്പിക്കുമെന്നാണ് അധികൃതര്‍ അറിയിച്ചത്. പദ്ധതിക്കെതിരെ വന്‍ പ്രതിഷേധമാണ് ഡല്‍ഹിയില്‍ അരങ്ങേറിയത്.