പട്ടികജാതിക്കാരനായ അഭിഭാഷകനെ പ്രണയിച്ചതിന് മകളെ വീട്ടുതടങ്കലിലാക്കി ജഡ്ജി ;സ്വമേധയാ കേസെടുത്ത് ഹൈക്കോടതി
പട്ടികജാതിക്കാരനായ അഭിഭാഷകനെ പ്രണയിച്ചതിന് മകളെ വീട്ടുതടങ്കലിലാക്കിയ ജഡ്ജിക്കെതിരെ പറ്റ്ന ഹൈക്കോടതി സ്വമേധയാ കേസെടുത്തു.ഇരുപത്തിനാലുകാരിയായ മകളെ അകാരണമായി വീട്ടുതടങ്കലിലാക്കിയതിന് ഘഗാരിയ ജില്ലാ കോടതി ജഡ്ജി സുഭാഷ് ചന്ദ്ര ചൗരസ്യക്കെതിരെയാണ് കോടതി സ്വമേധയാ കേസെടുത്തത്. സിദ്ധാര്‍ഥ് ബന്‍സാല്‍ എന്ന സുപ്രീം കോടതി അഭിഭാഷകനുമായുള്ള മകളുടെ പ്രണയം അറിഞ്ഞതിനെത്തുടര്‍ന്നാണ് ചൗരസ്യ മകളെ വീട്ടുതടങ്കലിലാക്കിയത്.
നാളെ ഉച്ചയോടുകൂടി പെണ്‍കുട്ടിയെ ചീഫ് ജസ്റ്റിസിന്‍റെ ചേംബറില്‍ ഹാജരാക്കാന്‍ ജസ്റ്റിസ് രാജേന്ദ്ര മേനോന്‍, ജസ്റ്റിസ് രാജീവ് രഞ്ജന്‍ എന്നിവരടങ്ങിയ ബഞ്ച് ഉത്തരവിട്ടു. ജഡ്ജിയും ഭാര്യയും കോടതിയിലെത്തണമെന്നും ഹൈക്കോടതി നിര്‍ദ്ദേശിച്ചിട്ടുണ്ട്.
അഭിഭാഷകനായ സിദ്ധാര്‍ത്ഥ് ബന്‍സാല്‍, പറ്റ്നയിലെ വീട്ടിലെത്തി ജഡ്ജിയുടെ മകളെ കാണാന്‍ ശ്രമിച്ചപ്പോള്‍ മകളെ കല്യാണം കഴിക്കണമെങ്കില്‍ ജഡ്ജിയാകുകയോ അല്ലെങ്കില്‍ സിവില്‍ സര്‍വീസില്‍ കയറുകയോ ചെയ്യണമെന്ന് സിദ്ധാര്‍ഥിനോട് ചൗരസ്യ പറഞ്ഞു.
പഠനത്തിന്‍റെ ഭാഗമായി ഡല്‍ഹിയിലെത്തിയ ജഡ്ജിയുടെ മകള്‍ 2012ലാണ് സിദ്ധാര്‍ത്ഥിനെ പരിചയപ്പെടുന്നത്. പരിചയം പതിയെ പ്രണയമായി മാറി. കഴിഞ്ഞ മാസം ഡല്‍ഹി ജുഡീഷ്യല്‍ സര്‍വീസസ് പരീക്ഷയെഴുതാന്‍ അമ്മയോടൊപ്പം ഡല്‍ഹിയിലെത്തിയ മകള്‍ സിദ്ധാര്‍ഥിനെ നേരില്‍ കണ്ടിരുന്നു.പ്രണയവിവരം അറിഞ്ഞ അമ്മ മകളെ പരീക്ഷയെഴുതാന്‍ അനുവദിക്കാതെ നാട്ടിലേക്ക് മടങ്ങിപ്പോവുകയായിരുന്നു.
വീട്ടിലെത്തിയ പെണ്‍കുട്ടിയെ അച്ഛന്‍ മര്‍ദ്ദിക്കുകയും മുറിയില്‍ പൂട്ടിയിടുകയും ചെയ്തു. മാതാപിതാക്കള്‍ സിദ്ധാര്‍ഥിനെ വിളിച്ച് കരച്ചില്‍ കേള്‍പ്പിച്ചതായും റിപ്പോര്‍ട്ടുണ്ട്. തുടര്‍ന്ന് സുഹൃത്തിനൊപ്പം സിദ്ധാര്‍ഥ് ഡിജിപി കെ. എസ് ദ്വിവേദിയുടെ അടുത്തെത്തി പരാതി നല്‍കുകയായിരുന്നു.
https://www.facebook.com/Malayalivartha
