യുജിസിയ്ക്കു പകരം ഇനി ഉന്നത വിദ്യാഭ്യാസ കമ്മീഷന്‍...
സര്‍വകലാശാല ധനസഹായ കമീഷന് (യു.ജി.സി) നിര്‍ത്തലാക്കി ഉന്നത വിദ്യാഭ്യാസ കമീഷന് കൊണ്ടുവരുന്നു. ഉന്നത വിദ്യാഭ്യാസ സ്ഥാപനങ്ങള്‍ക്ക് ധനസഹായം നല്‍കാനുള്ള അധികാരം ഈ സ്വയംഭരണ സ്ഥാപനത്തില്‍നിന്ന് മാനവശേഷി വികസന മന്ത്രാലയം ഏറ്റെടുക്കും.കലാലയ രംഗത്തെ പ്രവര്‍ത്തനങ്ങളുടെ ഘടനയില്‍ വലിയ തോതില്‍ മാറ്റം വരുത്തുന്ന ഹയര്‍ എജുക്കേഷന്‍ കമീഷന് ഓഫ് ഇന്ത്യ 2018ന്റെ കരടു ബില്‍ മാനവശേഷി വികസന മന്ത്രാലയം പൊതുജനാഭിപ്രായത്തിനായി പുറത്തിറക്കി. ഭേദഗതികളോടെ പാര്‍ലമന്റെിന്റെ വര്‍ഷകാല സമ്മേളനത്തില്‍ അവതരിപ്പിക്കാനാണ് ഉദ്ദേശിക്കുന്നത്. സര്‍വകലാശാലകളുടെ പ്രവര്‍ത്തനത്തില്‍ ആശയപരമായും ധനപരമായും കൈകടത്താന്‍ സര്‍ക്കാറിന് കൂടുതല്‍ അവസരവും അധികാരവും ലഭിക്കാന്‍ വഴിതുറക്കുന്നതാണ് ബില്‍.
1956ലെ യു.ജി.സി നിയമത്തിനു പകരം വെക്കുന്നതാണ് പുതിയ നിയമനിര്‍മാണം. സ്ഥാപനങ്ങള്‍ക്ക് അനുമതി നല്‍കുക, അക്കാദമിക നിലവാരം ഉയര്‍ത്തല്‍, അധ്യാപകരുടെയും വിദ്യാഭ്യാസ സ്ഥാപനങ്ങളുടെയും നിലവാര നിര്‍ണയം, പരിശീലനം, വ്യാജ സ്ഥാപനങ്ങള്‍ക്കെതിരായ നിയമനടപടി തുടങ്ങിയ ചുമതലകള്‍ മാത്രമായിരിക്കും പുതിയ കമീഷന് (എച്ച്.ഇ.സി.ഐ) ഉണ്ടാവുക. വിദ്യാര്‍ഥികളുടെ സ്‌കോളര്‍ഷിപ്, സ്ഥാപന ധനസഹായം തുടങ്ങി യു.ജി.സിക്ക് ഇപ്പോഴുള്ള സാമ്പത്തിക അധികാരങ്ങള്‍ സര്‍ക്കാര്‍ ഏറ്റെടുക്കും.
ഐ.ഐ.ടി, എന്‍.ഐ.ടി, ഐ.ഐ.എസ്.ഇ.ആര്‍ തുടങ്ങിയവയെ ഉള്‍പ്പെടുത്തിയുള്ള അഖിലേന്ത്യാ സാങ്കേതിക വിദ്യാഭ്യാസ കൗണ്‍സിലിന്റെ (െഎ.ഐ.സി.ടി) മാതൃകയിലേക്ക് യു.ജി.സിയിലും പൊളിച്ചെഴുത്ത് നടത്തുന്നതാണ് സര്‍ക്കാര്‍ പദ്ധതി. ഉന്നത വിദ്യാഭ്യാസത്തില്‍ ജനകീയതയും സുതാര്യതയും കൊണ്ടുവരുകയാണ് പുതിയ പരിഷ്‌ക്കാരത്തിന്റെ ലക്ഷ്യമെന്ന് മന്ത്രി പ്രകാശ് ജാവ്‌ദേക്കര്‍ വിശദീകരിച്ചു. ഉന്നത വിദ്യാഭ്യാസ മേഖലയിലെ നിയന്ത്രണ സ്ഥാപനങ്ങളെ ഒരു കുടക്കീഴില്‍ കൊണ്ടുവരുകയെന്ന ആശയം മാറ്റിവെച്ചാണ് യു.ജി.സിക്ക് ബദല്‍ കമീഷന് കൊണ്ടുവരുന്നത്.
https://www.facebook.com/Malayalivartha
