പടിഞ്ഞാറ് ദര്‍ശനമുള്ള ഭൂമി ദോഷം ചെയ്യുമെന്ന് കണ്ടതിനെ തുടര്‍ന്ന് കര്‍ണാടക സര്‍ക്കാര്‍ അനുവദിച്ച ആ ഭൂമി യേശുദാസ് സ്വീകരിച്ചില്ല. യേശുദാസിന്റെ അഭ്യര്‍ത്ഥനയെ തുടര്‍ന്ന് പകരം ഭൂമി നല്‍കാന്‍ കര്‍ണാടക സര്‍ക്കാര്‍ തീരുമാനിച്ചു. യേശുദാസ് കര്‍ണാടകയില്‍ പുതുതായി സ്ഥാപിക്കാന്‍ പോകുന്ന സംഗീത വിദ്യാലയത്തിന് വേണ്ടിയാണ് സര്‍ക്കാര്‍ ഭൂമി അനുവദിച്ചത്. എന്നാല്‍ പടിഞ്ഞാറ് ദര്‍ശനം വാസ്തുശാസ്ത്ര പ്രകാരം തെറ്റാണെന്ന് കണ്ടു. തുടര്‍ന്നാണ് യേശുദാസ് സര്‍ക്കാരിനെ സമീപിച്ചത്.

2008 ല്‍ ബി.എസ്. യെദ്യൂരപ്പ മുഖ്യമന്ത്രിയിരുന്നപ്പോള്‍, യേശുദാസിന് ബാംഗ്ലൂരില്‍ ഭൂമി അനുവദിച്ചിരുന്നു. പഴയ വിമാനത്താവളത്തിനടുത്ത് ജി വിഭാഗത്തില്‍ പെട്ട ഭൂമിയാണ് നല്‍കിയത്.

ഗുരുകുലം മാതൃകയിലുള്ള സംഗീതവിദ്യാലയം സ്ഥാപിക്കാനാണ് യേശുദാസിന്റെ പദ്ധതി. കെട്ടിടത്തിന്റെ മുഖം കിഴക്കോട്ടോ വടക്കോട്ടോ ആകണം എന്നായിരുന്നു യേശുദാസിന്റെ ആഗ്രഹം. എന്നാല്‍ ഈ സ്ഥലത്ത് കെട്ടിടത്തിന്റെ ദര്‍ശനം പടിഞ്ഞാറോട്ടായിരിക്കും. ഇക്കാരണത്താലാണ് പുതിയ ഭൂമിക്ക് യേശുദാസ് അപേക്ഷിച്ചത്.
ബാംഗ്ലൂര്‍ വികസന അതോറിറ്റി വിതരണം ചെയ്യുന്ന സ്ഥലങ്ങളെ എ മുതല്‍ ജി വരെ തരംതിരിച്ചിട്ടുണ്ട്. മുഖ്യമന്ത്രിയുടെ നിര്‍ദേശപ്രകാരം വിതരണം ചെയ്തിരുന്ന 30 ശതമാനമാണ് ജി വിഭാഗം. എന്നാല്‍ ഇവിടത്തെ ഭൂമി വിവാദ വിഷയമാകുകയും ഭൂമി അനുവദിക്കുന്നതിന് കോടതി വിലക്കും വന്നിരുന്നു. യേശുദാസിന് ജി വിഭാഗത്തില്‍ സ്ഥലമനുവദിക്കാന്‍ എസ്.എം. കൃഷ്ണ മന്ത്രിസഭ 2003 ല്‍ തീരുമാനിച്ചിരുന്നതാണ്. എന്നാല്‍, കുറഞ്ഞത് പത്തുകൊല്ലമായി കര്‍ണാടകത്തില്‍ താമസിക്കുന്ന ആള്‍ക്കേ ഈ വിഭാഗത്തില്‍ ഭൂമി കൊടുക്കാന്‍ വ്യവസ്ഥയുള്ളൂ. യേശുദാസിനുവേണ്ടി ഈ വ്യവസ്ഥയില്‍ സര്‍ക്കാര്‍ ഇളവുവരുത്തി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha