അടുത്തിടെ കേരളം ഏറെ ശ്രദ്ധിക്കപ്പെട്ടു കൊണ്ടിരിക്കുന്ന വസ്തുതയാണ് കണ്ണൂര്‍ വിമാനതാവളം വഴിയുള്ള സ്വര്‍ണ്ണക്കടത്തും, കടത്തിയ സ്വര്‍ണ്ണം വെട്ടിച്ചെടുക്കുന്നതും. കേരളത്തില്‍ ഏറ്റവുമധികം സ്വര്‍ണ്ണം എത്തിക്കുന്ന എയര്‍പോര്‍ട്ടെന്ന ഖ്യാതിയാണ് കണ്ണൂരിനുള്ളത്. മറ്റ് എയര്‍പോര്‍ട്ടിനെ അപേക്ഷിച്ച് ഇത്രയധികം സ്്വര്‍ണ്ണം കണ്ണൂരിലെത്തുന്നത് എങ്ങനെയെന്ന ഉത്തരം തേടുമ്പോഴാണ് സിപിഎം കണ്ണൂര്‍ ലോബിയുടെ നേര്‍ക്ക് വിരല്‍ എത്തുന്നത്. കണ്ണൂരും പരിസര പ്രദേശത്തുമുള്ള സിപിഎം, ഡിവൈ എഫ് ഐ നേതാക്കള്‍ക്ക് സ്വര്‍ണ്ണക്കടത്തുമായി എന്തെങ്കിലും ബന്ധമുണ്ടോയെന്ന സംശയം നേരത്തെയും ഉയര്‍ന്നിരുന്നു. എന്നാല്‍ പാര്‍ട്ടിക്കാരെല്ലം കണ്ണടച്ച് ഇരുട്ടാക്കിയിരുന്നതിനാല്‍ അതൊന്നും പുറത്തു വന്നിരുന്നില്ല. ഇപ്പോഴിതാ തില്ലങ്കേരിയിലെ ആകാശ് തില്ലങ്കേരിയും കൂട്ടരും തുടങ്ങിയ വിപ്ലവം കൊലപാതകത്തില്‍ നിന്നും സ്വര്‍ണ്ണക്കടത്തിലേയ്ക്ക് മാറിയിരിക്കുകയാണ്.

സ്വര്‍ണ്ണം കടത്തലും വെട്ടിക്കലും നടത്തുന്നതിന് നേതൃത്വം നല്കുന്നത് സിപിഎമ്മുമായി ബന്ധമുളളവരാണെന്നത് പരസ്യമാണ് . എന്നാല്‍ വെട്ടിക്കല്‍ നടത്തുന്നതും സിപിഎമ്മില്‍ ബന്ധമുള്ളവരാണ്. അതുകൊണ്ടാണിപ്പോള്‍ കടത്തിന്റെ വിവരങ്ങള്‍ പുറത്തു വന്നു കൊണ്ടിരിക്കുന്നത്. ഡിവൈഎഫ് ഐ കേന്ദ്ര കമ്മിറ്റി മെമ്പര്‍ക്കെതിരെയാണ് ആരോപണം എന്നതും ശ്രദ്ധേയമാണ്. ആരോപണം ഉയര്‍ന്ന സാഹചര്യത്തില്‍ തന്നെ തിടുക്കപ്പെട്ട് സിപിഎമ്മും, ഡിവൈഎഫ് ഐയും ആരോപണത്തെ നിഷേധിച്ചു കൊണ്ട് പ്രസ്താവനയിറക്കിയതും ശ്രദ്ധേയമാണ്.

ജമാഅത്തെ ഇസ്ലാമിയുടെ ആര്‍ എസ് എസ് ചര്‍ച്ചയില്‍ കോണ്‍ഗ്രസിനെ വലിച്ചിട്ട് വര്‍ഗ്ഗീയ വിഷം ചീറ്റിയാണ് എം.വി.ഗോവിന്ദന്റെ ജനകീയ് പ്രതിരോധ ജാഥ കണ്ണൂരിലെത്തിയിരിക്കുന്നത്. അഴിമതിയില്‍ നിന്നും അഴിമതിയിലേയ്ക്ക് കൂപ്പു കുത്തി കൊണ്ടിരിക്കുന്ന സിപിഎമ്മിന് സ്വര്‍ണ്ണക്കടത്തിലും പങ്കുണ്ടെന്ന ആരോപണം കൂടി താങ്ങാനുള്ള ശേഷിയില്ലെന്നതാണ് വസ്തുത. അതുകൊണ്ട് കണ്ണൂര്‍ സഖാക്കളെല്ലാം ഒരുമിച്ച് നിന്നാണ് ഷാജറിനെ സംര്കഷിക്കുന്നത്. എന്നാലും സ്വര്‍ണ്ണക്കടത്ത് കേസില്‍ ഇഡി അന്വേഷണം വല്ലതുമുണ്ടാകുമോയെന്നും സിപിഎം ഭയക്കുന്നുണ്ട്.

സ്വര്‍ണക്കടത്തു സംഘങ്ങളില്‍ നിന്ന് ആനുകൂല്യം കൈപ്പറ്റുകയും പാര്‍ട്ടി തീരുമാനങ്ങള്‍ ചോര്‍ത്തി നല്‍കുകയും ചെയ്തതായാണ് ഡിവൈഎഫ്‌ഐ കേന്ദ്രകമ്മിറ്റി അംഗവും സിപിഎം ജില്ലാ കമ്മിറ്റി അംഗവുമായ എം.ഷാജറിനെതിരെ പാര്‍ട്ടിക്കകത്ത് പരാതി നല്കിയിരിക്കുന്നത്. സിപിഎം ജില്ലാ കമ്മിറ്റി അംഗം മനു തോമസ് കൊടുത്ത പരാതി അന്വേഷിക്കാന്‍ ജില്ലാ സെക്രട്ടേറിയറ്റ് അംഗം എം.സുരേന്ദ്രനെ നിയോഗിച്ചു. ഷാജറും മനുതോമസും ഡിവൈഎഫ്‌ഐയുടെ ജില്ലാ ഭാരവാഹികളായിരിക്കെ ഒരു വര്‍ഷം മുന്‍പു നല്‍കിയ പരാതിയിലാണ് ഇപ്പോള്‍ അന്വേഷണം നടക്കുന്നതെന്നാണു വിവരം. ഇക്കാര്യം പുറത്തു വന്നതോടെ അങ്ങനെയൊരു പരാതിയോ അന്വേഷണമോ ഇല്ലെന്ന വിശദീകരണവുമായി ജില്ലാ സെക്രട്ടറി എം.വി.ജയരാജന്‍ രംഗത്തുവന്നു.

'ആകാശേ, എല്ലാം ഇവിടെ നിര്‍ത്തിക്കോ അല്ലെങ്കില്‍ ഈ പാര്‍ട്ടി എന്താണെന്ന് നീ അറിയും ആര്‍എസ്എസിനോട് ഉള്ളതിനെക്കാള്‍ വെറുപ്പാണ് ഞങ്ങള്‍ക്കു നിന്നോട്' എന്ന് ഷാജര്‍ കഴിഞ്ഞ ദിവസം തില്ലങ്കേരിയില്‍ പ്രസംഗിച്ചിരുന്നു. ആകാശ് തില്ലങ്കേരിക്കും കൂട്ടര്‍ക്കുമെതിരെ ഇങ്ങനെ ശക്തമായി പ്രതികരിച്ച നേതാവിനെതിരെ പാര്‍ട്ടിക്കകത്ത് പരാതിയുണ്ടെന്ന വിവരമാണു പുറത്തായിരിക്കുന്നത്. അതേസമയം, സംഭവം വിവാദമായതിനെ തുടര്‍ന്ന് തനിക്ക് ഷാജറുമായി ബന്ധമുണ്ടെന്ന വാര്‍ത്ത തള്ളി ആകാശ് തില്ലങ്കേരി ഫെയ്‌സ്ബുക് പോസ്റ്റിട്ടു. ഷാജറുമായി സംസാരിച്ചതിന്റെ ഓഡിയോ പുറത്തുവിടാന്‍ വെല്ലുവിളിച്ചു.

മുള്ളല്ല സഖാവേ, മുല്ലപ്പൂവാണ്..! ജനകീയ പ്രതിരോധ ജാഥ നയിച്ച് കണ്ണൂരിലെ സ്വീകരണ വേദിയിലെത്തിയ സിപിഎം സംസ്ഥാന സെക്രട്ടറി എം.വി.ഗോവിന്ദനെ ഡിവൈഎഫ്‌ഐ കേന്ദ്ര കമ്മിറ്റിയംഗം എം.ഷാജര്‍ മുല്ലപ്പൂ തലപ്പാവ് അണിയിച്ചാണ് സ്വീകരിച്ചത്. ഷാജറിന് സ്വര്‍ണക്കടത്ത് സംഘവുമായി ബന്ധമുണ്ടെന്ന ആരോപണം വിവാദമായി കൊണ്ടിരിക്കവേയാണ് മുല്ലപ്പൂവ് തലപ്പാവുമായി ഷാജര്‍ സ്വീകരിക്കാനിറങ്ങിയത്. സോഷ്യല്‍ മീഡിയയില്‍ ഷാജറിന്റെ മുല്ലപ്പൂവ് തലപ്പാവ് വാരിവലിച്ചിട്ട് അലക്കുകയാണ് . സ്വര്‍ണക്കടത്ത്- ക്വട്ടേഷന്‍ സംഘങ്ങള്‍ക്കെതിരെ കഴിഞ്ഞ വര്‍ഷം ആദ്യം ഡിവൈഎഫ്‌ഐ ജില്ലയില്‍ പ്രചാരണം നടത്തിയിരുന്നു. സ്വര്‍ണ്ണക്കടത്ത്കാരാണ് ക്വട്ടേഷന്‍ സംഘങ്ങളെ വളര്‍ത്തുന്നതെന്നാണ് അന്ന് പാര്‍ട്ടി കണ്ടെത്തിയിരുന്നത്. എന്നാല്‍ ഈ ക്വട്ടേഷന്‍ സംഘങ്ങളും അംഗങ്ങളും പാര്‍ട്ടി അണികളും നേതൃത്വത്തില്‍ നില്‍ക്കുന്നവരുമാണെന്ന തിരിച്ചറിവ് അന്നും പാര്‍ട്ടിക്കുണ്ടായിരുന്നു.

ആ സമയത്താണ് ആകാശ് തില്ലങ്കേരിയുടെ പേരില്‍ സമൂഹ മാധ്യമങ്ങളില്‍ മനു തോമസിനെതിരെ വ്യാപക പ്രചാരണം നടന്നിരുന്നു. പാര്‍ട്ടി രഹസ്യങ്ങള്‍ മാധ്യമങ്ങള്‍ക്കു ചോര്‍ത്തി നല്‍കുന്നതു മനുവാണെന്ന തരത്തിലായിരുന്നു അത്. ഈ അപവാദ പ്രചാരണം തുടരുന്നതിനിടെയാണ് ഇതില്‍ ഷാജറിനു പങ്കാളത്തിമുണ്ടെന്ന സംശയമുന്നയിച്ച് മനു തോമസ് പാര്‍ട്ടി നേതൃത്വത്തിനു പരാതി നല്‍കിയിരുന്നത്. ഇതിനു തെളിവായി ആകാശ് തില്ലങ്കേരിയും ഷാജറും സംസാരിച്ചതിന്റെ ഓഡിയോ ക്ലിപ്പുകളും പരാതിക്കൊപ്പം നല്‍കിയിരുന്നുവെന്നാണു പുറത്തുവന്ന വിവരം.

ഈയിടെ നടന്ന തെറ്റുതിരുത്തല്‍ രേഖയുമായി ബന്ധപ്പെട്ട ചര്‍ച്ചയില്‍ മനു വീണ്ടും ഇക്കാര്യം ജില്ലാ കമ്മിറ്റിയില്‍ ഉന്നയിച്ചതോടെയാണ് അന്വേഷിക്കാന്‍ തീരുമാനമുണ്ടായതും എം.സുരേന്ദ്രനെ ചുമതലപ്പെടുത്തിയതും. എന്നാല്‍ ഇതെല്ലാം സിപിഎം ജില്ലാ സെക്രട്ടറി എം.വി.ജയരാജന്‍ നിഷേധിക്കുകയാണ്. ഷാജറിനെ പ്രതിക്കൂട്ടില്‍ നിര്‍ത്തുന്ന വാര്‍ത്ത അടിസ്ഥാന രഹിതമാണെന്നും തള്ളിക്കളയണമെന്നും ഡിവൈഎഫ്‌ഐ സംസ്ഥാന സെക്രട്ടേറിയറ്റ് അറിയിച്ചു. തിടുക്കപ്പെട്ട് പ്രസ്ഥാവനയിറക്കി കണ്ണൂരില്‍ പുതിയൊരു വിവാദത്തെ തണുപ്പിക്കാനാണ് സിപിഎം ശ്രമിക്കുന്നത്. ഇത് സംബന്ധിച്ച സോഷ്യല്‍ മീഡിയ പ്രചരണത്തിനും വിലക്കേര്‍പ്പെടുത്തിയിരിക്കുകയാണ്. സ്വര്‍ണ്ണക്കടത്ത് വിഷയം ചര്‍ച്ച പോലും ചെയ്യരുതെന്ന കര്‍ശന നിര്‍ദ്ദേശമാണ് സിപിഎം നല്കിയിരിക്കുന്നത്.

കണ്ണൂരില്‍ സിപിഎം പ്രതിരോധ ജാഥ എത്തിയെങ്കിലും കേന്ദ്രകമ്മിറ്റി അംഗം ഇ.പി.ജയരാജന്‍ ഇതുവരെ ജാഥയില്‍ എത്താത്തത് വിമര്‍ശനങ്ങള്‍ക്കിടയാക്കുന്നുണ്ട്. ഇപിയെ പാര്‍ട്ടി സ്ഥാനങ്ങളില്‍ നിന്ന് അകറ്റി നിറുത്തിയതും, റിസോര്‍ട്ട് വിവാദത്തില്‍ പാര്‍ട്ടി പ്രതിരോധം ശോകമായി പോയതിലും തെറ്റി നില്ക്കുന്ന അദ്ദേഹത്തിന്റെ അസാ്ന്നിധ്യവും വലിയ ചര്‍ച്ചയാവുകയാണ്. പാര്‍ട്ടി ജീവന്‍മരണ പോരാട്ടം നടത്തുന്ന സാഹചര്യത്തില്‍ കണ്ണൂരലെ തലമുതിര്‍ന്ന നേതാവ് മാറി നില്ക്കുന്നതിനെതിരെ അണികളിലും ആശയക്കുഴപ്പമുണ്ടായിരിക്കുയാണ്. ഇപി അനുയായികള്‍ സ്വര്‍ണ്ണക്കടത്ത് കേസ് കത്തിക്കാനാണ് സാധ്യത. കാരണം ആകാശും കൂട്ടരും ഇപിയുടെ പിന്‍ബലത്തിലാണോ തുള്ളുന്നതെന്ന സംശയവും നിഴലിക്കുന്നുണ്ട്.

പി.ജയരാജന്റെ ആരാധകരും പി ജെ ആര്‍മിയുടെ വക്താക്കളുമായ ആകാശ് തില്ലങ്കേരിയേയും കൂട്ടരേയും പാര്‍ട്ടിയില്‍ നിന്ന് പുറത്താക്കിയെങ്കിലും ജയരാജനുമായുള്ള ബന്ധം തുടര്‍ന്നിരുന്നു. എന്നാലിപ്പോള്‍ ഇപിയുടെ കൂട്ടാളികള്‍ തില്ലേങ്കേരിയില്‍ പാര്‍ട്ടിയെ എതിര്‍ക്കുന്ന സഖാക്കളെ കണ്ടെത്തി പാര്‍ട്ടിക്കെതിരെ തിരിച്ചു വിടുന്നതായും ആരോപണമുയരുന്നുണ്ട്. എന്തായാലും സ്വര്‍ണ്ണക്കടത്ത് കേസില്‍ നേരിട്ടോ അല്ലാതെയോ കണ്ണൂര്‍ സിപിഎം സഖാക്കള്‍ക്ക് ബന്ധമുണ്ടെന്നാണ് സമീപകാല സംഭവങ്ങള്‍ തെളിയിക്കുന്നത്.