ജിദ്ദയിൽ സന്ദർശക വിസയിലെത്തിയ മലയാളി കുഴഞ്ഞു വീണു മരിച്ചു. മലപ്പുറം കാവനൂർ ഇരിവേറ്റി സ്വദേശി കൈനോട്ട് ആലിക്കുട്ടി മാസ്​റ്റർ (58) ആണ് ഹൃദയാഘാതമുണ്ടായതിനെത്തുടർന്ന് കുഴഞ്ഞു വീണു മരിച്ചത്.

മഞ്ചേരി എച്ച്​.എം.വൈ.എച്ച്​.എസ്​.എസിലെ ഹിന്ദി അധ്യാപകനായിരുന്നു ഇദ്ദേഹം. ഉംറ നിർവഹിച്ചു മദീന സന്ദർശനം പൂർത്തിയാക്കി മടങ്ങുമ്പോൾ നെഞ്ചുവേദന അനുഭവപ്പെട്ടതിനെ തുടർന്ന്​ ജിദ്ദയിലെ ആശുപത്രിയിലേക്ക്​ പോകു​ന്നതിനിടെയായിരുന്നു മരണം.

ഇരുപത് ദിവസം മുമ്പാണ് ഭാര്യ ഖദീജ ടീച്ചറോടൊപ്പം ആലിക്കുട്ടി മാസ്​റ്റർ ജിദ്ദയിലെത്തിയത്. ഫാസിൽ, ഡോ. ശുഹൈൽ (ബാബ് മക്ക ഹിബ ക്ലിനിക്​), സാലിഹ് (കുവൈത്ത്​) എന്നിവർ മക്കളാണ്​. സഹോദരൻ ഹംസ ജിദ്ദയിലുണ്ട്. നടപടിക്രമങ്ങൾ പൂർത്തിയാക്കി മൃതദേഹം ജിദ്ദയിൽ തന്നെ മറവു ചെയ്യുമെന്ന് ബന്ധുക്കൾ അറിയിച്ചു.