കോവിഡ് 19 ബാധയെ തുടര്‍ന്ന് ലോകത്തിന്റെ വിവിധ ഭാഗങ്ങളില്‍ കുടുങ്ങിയ അരലക്ഷത്തിലേറെ മലയാളികള്‍ നാട്ടില്‍ തിരിച്ചെത്തി. ഇതുവരെ സംസ്ഥാനത്ത് ആകെ 55,045 പേരാണ് മടങ്ങിയെത്തിയത്. വ്യോമമാര്‍ഗം 2911 പേരും കടല്‍മാര്‍ഗം 793 പേരും ചെക്ക് പോസ്റ്റ് വഴി 50,320 പേരും റെയില്‍വേ വഴി 1021 പേരും തിരികെ എത്തി. ഇവരെയെല്ലാവരെയും നിര്‍ബന്ധിത ക്വാറന്റൈനില്‍ പ്രവേശിപ്പിച്ചിരിക്കുകയാണ്. ഇനിയും ധാരാളം പേര്‍ നാട്ടിലേക്ക് വരാന്‍ തയ്യാറെടുത്തിരിക്കുകയാണ്. അതേസമയം ഇന്ന് കോവിഡ് സ്ഥിരീകരിച്ച 11 പേരും പുറത്തുനിന്നും എത്തിയവരായിരുന്നു.അതിനാല്‍ തന്നെ അതീവ ജാഗ്രതയിലാണ് സംസ്ഥാനം. പുറത്തുനിന്നും എത്തി ക്വാറന്റൈനില്‍ കഴിയുന്നവരെ നിരീക്ഷിക്കാന്‍ സര്‍ക്കാര്‍ പ്രത്യേക മോട്ടോര്‍ സൈക്കിള്‍ ബ്രിഗേഡിനെ ചുമതലപ്പെടുത്തിയിട്ടുണ്ട്.