ഗൾഫ് രാഷ്ട്രങ്ങളിൽ കൊറോണ വ്യാപനം വർധിക്കുന്ന സാഹചര്യത്തിൽ ഏറെ കഷ്ടപ്പാടുകൾ അനുഭവിക്കുകയാണ് പ്രവാസികൾ. കൂടുതലും സാധാരണക്കാരായ പ്രവാസികളെയാണ് ഇത് സാരമായി ബാധിച്ചിരിക്കുന്നത്. ഒപ്പം കൊറോണ ബാധിച്ച് ഗൾഫ് രാഷ്ട്രങ്ങളിൽ മരിക്കുന്ന പ്രവാസികളുടെ എണ്ണവും കൂടുകയാണ്. ഇതിലൂടെ നാട്ടിലെ തങ്ങളുടെ ജീവിതം തന്നെ നഷ്ടപെട്ട അവസ്ഥയിലാണ് കുടുംബാംഗങ്ങൾ. ഇവർക്കായി സഹായം അനുവദിക്കണമെന്ന ആവശ്യവുമായി രംഗത്ത് എത്തിയിരിക്കുകയാണ് സാമൂഹ്യ പ്രവർത്തകനായ അഷ്‌റഫ് താമരശ്ശേരി.

അഷ്‌റഫ് താമരശ്ശേരിയുടെ ഫേസ്ബുക് പോസ്റ്റ്;

പ്രിയപ്പെട്ട കേരള മുഖ്യമന്ത്രി ശ്രീ പിണറായി വിജയൻ അവർകൾ അറിയുന്നതിന്........

കോവിഡ് എന്ന മഹാമാരി മൂലം ഗൾഫിൽ ഒട്ടനവധി പ്രവാസി ഇൻഡ്യക്കാർ മരണപ്പെട്ടു. മരിച്ചവരിൽ കൂടുതൽ മലയാളികളാണ്. അതും സാധാരണക്കാരായ പ്രവാസികളാണ് ഒരു കുടുംബത്തിൻെറ മൊത്തം ആശ്രയമായവർ,ഏക വരുമാനം നിന്നതോടെ നാട്ടിൽ സ്ത്രീകളും കുട്ടികളും അടങ്ങിയ കുടുംബം കടുത്ത പട്ടിണിയിലും ബുദ്ധിമുട്ടിലുമാണ്.അനാഥമായ പ്രവാസികളുടെ കുടുംബത്തിന് അത്യാവശ്യമായി സാമ്പത്തിക സഹായം കൊടുക്കേണ്ടത് അനിവാര്യമാണ്.കേന്ദ്ര സർക്കാരിൽ നിന്നും കോവിഡ് മൂലം ഗൾഫിൽ വെച്ച് മരണപ്പെട്ട സാധാരണക്കാരായ പ്രവാസികളുടെ കുടുബത്തിന് സാമ്പത്തിക സഹായം കിട്ടുന്നതിന് വേണ്ടി സമർദ്ധം ചെലുത്തണം.കേന്ദ്ര സർക്കാർ അനുവദിച്ച കോവിഡ് പാക്കേജിൽ പ്രവാസികളെ പൂർണ്ണമായും അവഗണിച്ചു.ആയതിനാൽ പ്രവാസികളുടെ എല്ലാ ബുദ്ധിമുട്ടുകളും പ്രയാസങ്ങളും അറിയാവുന്ന താങ്കൾ ഈ ആവശ്യം പ്രവാസിയുടെ കുടുംബത്തിന് വേണ്ടി കേന്ദ്ര സർക്കാരിനോട് ആവശ്യപ്പെടണം. മരണപ്പെട്ടവരുടെ ബന്ധുക്കൾ നാട്ടിൽ നിന്നും അവരുടെ ആവശ്യങ്ങൾ അറിയിച്ചുകൊണ്ട് ഞങ്ങളെ ബന്ധപ്പെടുകയാണ്. ഉറ്റവരുടെ ചേതനയറ്റ ശരീരം പോലും കാണാൻ കഴിയാതെ അവരുടെ വേർപാട് പോലും മാനസികമായി അംഗീകരിക്കാനാവാതെ വേദനിച്ചു കഴിയുന്നവരാണ്,അല്ലെങ്കിൽ കേരള സർക്കാറിൻെറ ഭാഗത്ത് നിന്നെങ്കിലും അടിയന്തര സഹായം ഇത്തരം കുടുംബങ്ങൾക്ക് ലഭിച്ചാൽ നന്നായിരിക്കും. പ്രവാസികൾ സഹോദരങ്ങളാണെന്ന് പറഞ്ഞ് ചേർത്ത് നിർത്തി,കരുതലും കനിവും നൽകുന്ന അങ്ങയുടെ സർക്കാരിൽ ഞങ്ങൾ പ്രവാസികൾക്ക് പൂർണ്ണമായ വിശ്വാസമുണ്ട്.ഈ വിഷയം അങ്ങയുടെ ശ്രദ്ധയിൽപ്പെടുത്തുവാനും അതുവഴി പ്രയാസം അനുഭവിക്കുന്ന ഈ പ്രവാസി കുടുബങ്ങൾക്ക് ഒരു കെെതാങ്ങായി മാറുകയാണെങ്കിൽ അതൊരു വലിയൊരു ഉപകാരമായിരിക്കും.ഉചിതമായ ഒരു തീരുമാനം അങ്ങയുടെ സർക്കാരിൽ നിന്നും പ്രതീക്ഷിച്ചുകൊണ്ട് ......
സ്നേഹത്തോടെ
അഷറഫ് താമരശ്ശേരി
സാമൂഹിക പ്രവർത്തകൻ