കുവൈത്തില്‍ നിന്നും ഇന്ത്യയിലേക് വിമാന സര്‍വ്വീസുകള്‍ നടത്തുന്നതിനു തീരുമാനമായതായി വ്യോമയാന മന്ത്രാലയം. കഴിഞ്ഞ 3 ആഴ്ചകളായി നിലനിന്നിരുന്ന അനിശ്ചിതത്തങ്ങള്‍ക്കാണ് വിരാമമായത്. രണ്ടു ദിവസത്തിനകം തന്നെ കുവൈത്തില്‍ നിന്ന് ഇന്ത്യയിലേക്കുള്ള വിമാനം പറന്നു തുടങ്ങുമെന്നാണ് ലഭിക്കുന്ന സൂചന. നിലവില്‍ കുവൈത്ത് എയര്‍ വെയ്‌സ് കേരളത്തിലെ വിമാന താവളങ്ങളിലേക്കും സര്‍വ്വീസ് പ്രഖ്യാപിച്ചിട്ടുണ്ട്. ഇത് അനുസരിച്ച് വന്ദേ ഭാരത് ദൗത്യം പ്രകാരം കുവൈത്തില്‍ നിന്നുള്ള സര്‍വ്വീസുകളില്‍ ഇന്ത്യന്‍ വിമാന കമ്ബനികള്‍ക്കൊപ്പം കുവൈത്ത് ദേശീയ വിമാന കമ്ബനികളായ കുവൈത്ത് എയര്‍ വെയ്‌സ് , ജസീറ എയര്‍ വെയ്‌സ് എന്നിവയും ഭാഗമാകും.

ഈ മാസം 10 മുതല്‍ ഇരു രാജ്യങ്ങളിലേയും വിമാന കമ്ബനികള്‍ ഇന്ത്യയിലേക്കും തിരിച്ചും പ്രതി ദിനം 1000 വീതം സീറ്റ് പരിധി നിശ്ചയിച്ച് കൊണ്ട് ധാരണയായിരുന്നു. ഇതില്‍ 500 സീറ്റുകള്‍ കുവൈത്ത് ദേശീയ വിമാന കമ്ബനികള്‍ക്കും 500എണ്ണം ഇന്ത്യന്‍ വിമാന കമ്ബനികള്‍ക്കും എന്ന അനുപാതത്തിലാണു സീറ്റ് വിഭജനം നടത്തി ധാരണയായത്. എന്നാല്‍ ഇന്ത്യയില്‍ നിന്നുള്ള യാത്രക്കാര്‍ക്ക് കുവൈത്ത് ഏര്‍പ്പെടുത്തിയ പ്രവേശന വിലക്ക് നിലനില്‍ക്കുന്നതിനാല്‍ സീറ്റു പരിധി നിബന്ധന നീക്കണമെന്ന് ആവശ്യൂപെട്ടു കൊണ്ട് കഴിഞ്ഞ ദിവസം ഇന്ത്യന്‍ വ്യോമയാന അധികൃതര്‍ കഴിഞ്ഞ ദിവസം കുവൈത്തിനു കത്തയച്ചിരുന്നു. തുടര്‍ന്ന് ഇന്ന് നടന്ന ചര്‍ച്ചകള്‍ക്ക് ഒടുവില്‍ ഇന്ത്യന്‍ വ്യോമയാന മന്ത്രാലയത്തിന്റെ ആവശ്യത്തിനു കുവൈത്ത് വ്യോമയാന അധികൃതര്‍ അംഗീകാരം നല്‍കുകയായിരുന്നു.
പ്രതി ദിനം ആയിരം സീറ്റുകള്‍ എന്ന നിബന്ധന നീക്കി പകരം കുവൈത്തിന്റെ ഭാഗത്ത് നിന്ന് പ്രതിദിനം 7 വിമാനങ്ങള്‍ സര്‍വ്വീസ് നടത്തുമെന്നാണു കുവൈത്ത് വ്യോമയാന അധികൃതര്‍ അയച്ച കത്തില്‍ അറിയിച്ചിരിക്കുന്നത്. ഇതേ അനുപാതത്തില്‍ ഇന്ത്യന്‍ വിമാന കമ്ബനികള്‍ക്കും കുവൈത്തില്‍ നിന്ന് സര്‍വ്വീസ് നടത്താവുന്നതാണ്.