അവധി കഴിഞ്ഞു നാട്ടില്‍നിന്നു മടങ്ങിയെത്തിയ മലയാളി യുവാവ് മെല്‍ബണില്‍ പനി ബാധിച്ചു മരിച്ചു. മൂന്നുദിവസം മുന്‍പ് കേരളത്തില്‍ നിന്നും പനിയോടെ മടങ്ങിയെത്തിയ കോട്ടയം പാലാ കൊല്ലപള്ളി സ്വദേശി ജോ ജോസഫ്(30) ആണ് മരിച്ചത്. ഡെങ്കിപ്പനി ബാധിച്ചാണ് മരണമെന്നാണ് സംശയിക്കുന്നത്. നാട്ടില്‍നിന്ന് എത്തിയതിനു ശേഷം പനിയും തലവേദനയും മൂലം വിശ്രമത്തിലായിരുന്നു.

യുകെയിലുള്ള സഹോദരി ഫോണില്‍ ബന്ധപ്പെടാന്‍ ശ്രമിച്ചപ്പോള്‍ ലഭിക്കാതിരുന്നതിനെ തുടര്‍ന്ന് ബന്ധുക്കള്‍ നടത്തിയ അന്വേഷണത്തിലാണ് ജോയെ മരിച്ച നിലയില്‍ കണ്ടെത്തിയത്. അടച്ചിട്ടിരുന്ന വീടിനുള്ളില്‍ കട്ടിലില്‍ ഉറങ്ങിക്കിടക്കുന്ന അവസ്ഥയലാണ് മൃതദേഹം കണ്ടെത്തിയത്.

മെല്‍ബണിലെ നോര്‍ത്തേന്‍ ആശുപത്രിയില്‍ നഴ്‌സായി ജോലി നോക്കുകയായിരുന്നു. ഭാര്യ ദീപ്തി ലൂയിസ് ഇതേ ആശുപത്രിയില്‍ നേഴ്‌സാണ്. ഭാര്യയും മൂത്ത കുട്ടിയും നാട്ടിലേക്കു പോയിരുന്നു. അവര്‍ക്കൊപ്പം അവധി ആഘോഷിച്ചതിനു ശേഷം മടങ്ങിയെത്തിയ ഉടനായിരുന്നു ജോയുടെ മരണം.

മൂന്നു ദിവസം മുമ്പ് മടങ്ങി വരുകയായിരുന്ന ജോസഫ് കടുത്ത പനിയെ തുടര്‍ന്ന് ചികിത്സയിലായിരുന്നു. വെള്ളിയാഴ്ച വൈകുന്നേരത്തോടെയാണ് മരണം സംഭവിച്ചത്. മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം നാട്ടിലെത്തിക്കാനുള്ള നടപടികള്‍ ആരംഭിച്ചു.