സംസ്ഥാനത്ത് മഴ മുന്നറിയിപ്പിൽ മാറ്റം. ഇന്ന് ആറ് ജില്ലകളിൽ യെല്ലോ അലർട്ട് പ്രഖ്യാപിച്ചു. തൃശൂർ, എറണാകുളം, ഇടുക്കി, ആലപ്പുഴ, കോട്ടയം, പത്തനംതിട്ട ജില്ലകളിലാണ് യെല്ലോ അലർട്ട്. ഈ ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോടുകൂടിയ ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ട്. മഴയ്ക്കൊപ്പം ശക്തമായ കാറ്റിനും ജാഗ്രത പാലിക്കണമെന്ന് കാലാവസ്ഥാ വകുപ്പ് മുന്നറിയിപ്പ് നൽകി. അതേസമയം, കൊല്ലം, പാലക്കാട്, കണ്ണൂർ ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

മഴ തുടരുന്ന സാഹചര്യത്തിൽ മലയോര മേഖലകളിലുള്ളവർ ജാഗ്രത പാലിക്കണം.ഏറ്റവും പുതിയ റഡാർ ചിത്രം പ്രകാരം ഇടുക്കി, എറണാകുളം, തൃശൂർ ജില്ലകളിൽ ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗത്തിൽ കാറ്റിനും സാധ്യതയുണ്ട്. പ്രധാന റോഡുകളിൽവെള്ളക്കെട്ട്, വാഹനങ്ങളിലെ കാഴ്ച മങ്ങൽ എന്നിവയ്ക്ക് സാധ്യതയുള്ളതുകൊണ്ട് ഗതാഗതക്കുരുക്കിന് സാധ്യതയുണ്ട്. താഴ്ന്ന പ്രദേശങ്ങളിലും നദീതീരങ്ങളിലും വെള്ളക്കെട്ടിനും സാധ്യതയുണ്ട്. മരങ്ങൾ കടപുഴകി വീണാൽ വൈദ്യുതി തടസം/അപകടം എന്നിവയിലേക്ക് നയിച്ചേക്കാം.

മലപ്പുറം നിലമ്പൂർ അമരമ്പലത്തെ ടി കെ നഗറിലെ വിനോദസഞ്ചാര കേന്ദ്രത്തിലുണ്ടായ മലവെള്ളപാച്ചിലിൽ മരിച്ചവരുടെ എണ്ണം അഞ്ചായി.ഇന്ന് പുലർച്ചെ മുതൽ ആരംഭിച്ച തെരച്ചിലിൽ മൂന്ന് മൃതദേഹങ്ങൾ കൂടി കണ്ടെത്തി. ഇന്നലെ രാത്രിതന്നെ രണ്ട് മൃതദേഹങ്ങൾ കണ്ടെത്തിയിരുന്നു. ഒരു സ്‌ത്രീയെ കൂടി ഇനി കണ്ടെത്താനുണ്ടെന്നാണ് വിവരം. . കരുവാരക്കുണ്ട് സ്വദേശി റഹീം, വണ്ടൂര്‍ കോട്ടക്കുന്ന് സ്വദേശികളായ റഫീഖ്, സജ്ജാദ് എന്നിവരുടെ മൃതദേഹങ്ങളാണ് തിങ്കളാഴ്ച രാവിലെ കണ്ടെത്തിയത്. ഇവരുടെ മൃതദേഹങ്ങള്‍ മഞ്ചേരി മെഡിക്കല്‍ കോളേജ് ആശുപത്രിയിലേക്ക് മാറ്റി.കോട്ടക്കല്‍ മങ്ങാടന്‍ ഹമീദിന്റെ മകന്‍ അനസ് (31), തിരൂര്‍ സ്വദേശി മുഹമ്മദ് കുട്ടി (63)

എന്നിവരുടെ മൃതദേഹങ്ങളാണ് അപകടദിവസം രാത്രി തന്നെ കണ്ടെത്തിയിരുന്നത്. അപകടത്തില്‍പ്പെട്ട ടി.കെ. നഗര്‍ വെളുത്തേടത്ത് സഞ്ജയ്ദാസിന്റെ ഭാര്യ സജിതയെ ഇനി കണ്ടെത്താനുണ്ട്. ഇവര്‍ക്കായി പ്രദേശത്ത് തെരച്ചില്‍ ഊര്‍ജിതമായി തുടരുകയാണ്. കൂടുതല്‍ പേര്‍ ഒഴുക്കില്‍പ്പെട്ടിട്ടുണ്ടോ എന്ന കാര്യവും അധികൃതര്‍ പരിശോധിച്ചു വരുന്നു.ഞായറാഴ്ച വൈകീട്ട് അഞ്ചുമണിയോടെയാണ് നാടിനെ നടുക്കിയ ദുരന്തമുണ്ടായത്. സംഭവസമയത്ത് പുഴയിലോ പരിസരപ്രദേശങ്ങളിലോ മഴയുണ്ടായിരുന്നില്ല. അപ്രതീക്ഷിതമായി മലവെള്ളം കുത്തിയൊലിച്ചെത്തിയതാണ് നിരവധി വിനോദസഞ്ചാരികള്‍ പുഴയിലുണ്ടായിരുന്ന സമയത്ത് അപകട കാരണമായത്.

മുകള്‍ഭാഗത്ത് പെയ്ത ശക്തമായ മഴവെള്ളം നിമിഷങ്ങള്‍ക്കകം പുഴയിലേക്ക് ഒഴുകിയെത്തുകയായിരുന്നു.വെള്ളം ഉയരുന്നത് ശ്രദ്ധയില്‍പ്പെട്ട ഉടന്‍ തന്നെ വനം ഉദ്യോഗസ്ഥരും നാട്ടുകാരും അടിയന്തരമായി ഇടപെട്ടതിനാല്‍ നിരവധി പേരുടെ ജീവന്‍ രക്ഷിക്കാനായി.വെള്ളം ഇരച്ചെത്തിയതോടെ ചിലര്‍ ഓടി രക്ഷപ്പെട്ടെങ്കിലും, മറ്റു ചിലര്‍ മരക്കൊമ്പിലും പാറപ്പുറത്തും അഭയം പ്രാപിക്കുകയായിരുന്നു. നാട്ടുകാര്‍ കയറെറിഞ്ഞു കൊടുത്താണ് ഇവരെ കരയ്ക്കെത്തിച്ചത്. ചേക്കാട് സ്വദേശികളായ ആറംഗസംഘത്തിലെ നാലുപേരെ നാട്ടുകാരുടെ ഇടപെടലിലൂടെ രക്ഷപ്പെടുത്താനായി.ആറുപേർ അദ്ഭുതകരമായി രക്ഷപ്പെട്ടു .

വിവരമറിഞ്ഞ് നിലമ്പൂര്‍ ഡിവൈ.എസ്.പി. റഫീഖ്, കാളികാവ്, പൂക്കോട്ടുംപാടം പോലീസ് സബ് ഇന്‍സ്പെക്ടര്‍മാരായ വി. മനോജ് കുമാര്‍, അബ്ദുള്‍ കരീം, ചക്കിക്കുഴി വനം വകുപ്പ് ഡെപ്യൂട്ടി റെയ്ഞ്ചര്‍ ദിവാകരനുണ്ണി എന്നിവരുടെ നേതൃത്വത്തിലുള്ള പോലീസ്, വനപാലക സംഘങ്ങളും നിലമ്പൂര്‍ അഗ്‌നിരക്ഷാസേനയും ട്രോമാകെയര്‍ പ്രവര്‍ത്തകരും സ്ഥലത്തെത്തി രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി. നേരം ഇരുട്ടിയത് തിരച്ചിലിന് തടസ്സമായെങ്കിലും സന്നദ്ധപ്രവര്‍ത്തകരുടെ സഹായത്തോടെ തിരച്ചില്‍ തുടരുകയാണ്. ഇടുക്കി ജില്ലയില്‍ കനത്ത മഴയും വിതച്ച് മണ്ണിടിച്ചില്‍ ഭീഷണി തുടരുന്ന പശ്ചാത്തലത്തില്‍ കര്‍ശന നിയന്ത്രണങ്ങളുമായി ജില്ലാ ഭരണകൂടം. അപകടസാധ്യത മുന്നില്‍ കണ്ട് മലയോര മേഖലകളില്‍ രാത്രികാല യാത്രകള്‍ പൂര്‍ണ്ണമായും നിരോധിച്ചു.