കോവിഡ് ആരോഗ്യ സര്‍ട്ടിഫിക്കറ്റുകള്‍ ലഭിക്കുവാന്‍ യാത്രരേഖകള്‍ ഹാജരാക്കണമെന്ന് സൗദി ആരോഗ്യ മന്ത്രാലയം. ചില രാജ്യങ്ങള്‍ ഇത്തരമൊരു സര്‍ട്ടിഫിക്കറ്റ് ആവശ്യപ്പെടുന്നുണ്ട്. അവര്‍ക്കുമാത്രമാണ് സര്‍ട്ടിഫിക്കറ്റ് നല്‍കുന്നത്. കൊവിഡ് മുക്ത സര്‍ട്ടിഫിക്കറ്റിന് അപേക്ഷ സമര്‍പ്പിക്കുമ്പോള്‍ സര്‍ട്ടിഫിക്കറ്റ് അഭ്യര്‍ത്ഥനയോടൊപ്പം പാസ്പോര്‍ട്ട്, ഇഖാമ-ഐഡി നമ്പര്‍, യാത്രാ ടിക്കറ്റ് എന്നിവയുടെ പകര്‍പ്പുകള്‍ യാത്ര പോകുന്നതിനു 72 മണിക്കൂര്‍ മുമ്പായി ആരോഗ്യ മന്ത്രാലയം ബ്രാഞ്ച് ഓഫീസുകളിലെ വാട്ട്സ്ആപ്പ് നമ്പറില്‍ സമര്‍പ്പിക്കണമെന്നാണ് സൗദി ആരോഗ്യ മന്ത്രാലയം അറിയിച്ചിരിക്കുന്നത്.

സൗദിക്ക് വെളിയിലേക്ക് യാത്രപോകുന്നവര്‍ക്കുള്ള ആരോഗ്യ സര്‍ട്ടിഫിക്കറ്റുകള്‍ക്ക് അന്താരാഷ്ട്ര വിമാനങ്ങളില്‍ മടങ്ങി വരുന്നതുമായി യാതൊരു ബന്ധവുമില്ല. അടിയന്തിരമോ അസാധാരണമോ ആയ കാരണങ്ങള്‍ ഉള്ളവര്‍ക്കാണ് സര്‍ട്ടിഫിക്കറ്റ് നല്‍കുന്നത്. ചില രാജ്യങ്ങള്‍ നിര്‍ബന്ധമായും ഈ സര്‍ട്ടിഫിക്കറ്റുകള്‍ ആവശ്യപ്പെടുന്നുണ്ട്. അത്തരത്തിലുള്ളവര്‍ക്ക് അവര്‍ കോവിഡ് 19 നിന്ന് മുക്തരാണെന്നും, സുരക്ഷിതരാണെന്നും തെളിയിക്കുന്ന ആരോഗ്യ മന്ത്രാലയത്തില്‍ നിന്ന് സീല്‍ ചെയ്ത സര്‍ട്ടിഫിക്കറ്റുകള്‍ ആവശ്യമാണെന്നും ആരോഗ്യ മന്ത്രാലയം അറിയിച്ചു.സൗദി ആരോഗ്യമന്ത്രാലയത്തിന്റെ പ്രതിദിന റിപ്പോര്‍ട്ട് പ്രകാരം രാജ്യത്ത് തിങ്കളാഴ്ച റിപ്പോര്‍ട്ട് ചെയ്തത് 768 കോവിഡ് കേസുകള്‍. അതോടൊപ്പം 886 രോഗമുക്തിയും റിപ്പോര്‍ട്ട് ചെയ്തു. 26 പേരുടെ മരണവും സ്ഥിരീകരിച്ചു.

ഇതിനോടകം മൊത്തം മരണസംഖ്യ 4,107ലെത്തി. ആകെ രോഗബാധിതരുടെ എണ്ണം 3,21,456 ഉം ഇതില്‍ രോഗമുക്തര്‍ 2,97,623 പേരുമായി. നിലവില്‍ വിവിധ ആശുപത്രികളില്‍ ചികിത്സയിലുള്ളത് 19,726 പേരാണ്. ചികിത്സയിലുള്ളവരില്‍ 1430 പേരുടെ നില ഗുരുതരവുമാണ്. മക്ക: 67, ജിദ്ദ: 57, മദീന: 50, ഹുഫൂഫ്-റിയാദ് എന്നിവിടങ്ങളില്‍ 46 വീതം, ദഹ്റാന്‍: 44, ഹായില്‍: 27 എന്നിങ്ങനെയാണ് സൗദിയില്‍ കൂടുതലായി കോവിഡ് റിപ്പോര്‍ട്ട് ചെയ്ത സ്ഥലലങ്ങള്‍.