ഇന്ത്യയും കുവൈത്തും തമ്മില് ചരിത്രപരമായ നീക്കങ്ങള്: ഇരുവരും ഒപ്പുവച്ച ഗാര്ഹിക തൊഴില് കരാര് നിര്ണ്ണായകം :ആകാംഷയോടെ പ്രവാസലോകം
ഇന്ത്യയും കുവൈറ്റും ഒപ്പുവെച്ച ഗാര്ഹിക തൊഴില് കരാര് ചരിത്രപരമായ നേട്ടമെന്ന് ഇന്ത്യന് സ്ഥാനപതി സിബി ജോര്ജ് പറഞ്ഞു . ഇതോടെ ഇന്ത്യയില് നിന്നുമുള്ള ഗാര്ഹിക തൊഴിലാളികള്ക്ക് തൊഴില് നിയമത്തിന്റെ എല്ലാവിധ പരിരക്ഷയും ഉറപ്പാക്കുന്നു എന്നതാണ് ധാരണാപത്രം കൊണ്ടുള്ള പ്രധാന നേട്ടമെന്നും സ്ഥാനപതി വ്യക്തമാക്കി.
ഇപ്പോള് കുവൈത്തില് 3,43,350 ഇന്ത്യക്കാര് ഗാര്ഹിക മേഖലയില് ജോലി ചെയ്യുന്നവരുണ്ട്. ഇതില് 71 ശതമാനം പുരുഷന്മാരും 29 ശതമാനം സ്ത്രീകളുമാണ് എന്നതാണ് പ്രധാന കാര്യം. ഭൂരിപക്ഷം ഗാര്ഹിക തൊഴിലാളികളും ആന്ധ്ര, കേരളം, തമിഴ്നാട് എന്നീ സംസ്ഥാനങ്ങളില് നിന്നും എത്തുന്നവരാണ്.
ഇന്ത്യന് വിദേശകാര്യ മന്ത്രി ഡോ. എസ്. ജയ്ശങ്കറിന്റെ സാന്നിദ്ധ്യത്തില് സ്ഥാനപതി സിബി ജോര്ജും കുവൈത്തു വിദേശകാര്യ സഹ മന്ത്രി മജ്ദി അഹമദ് അല് ദാഫിരിയുമായാണ് ധാരണാപത്രത്തില് ഒപ്പുവെച്ചത്.
കരാര് നിബന്ധന പ്രകാരം തൊഴിലാളിയുടെ പേരില് തൊഴിലുടമ ബാങ്കുകളില് സാലറി അക്കൗണ്ട് തുടങ്ങണം. എല്ലാ മാസവും ശമ്പളം തൊഴിലാളിയുടെ അക്കൗണ്ടില് നിക്ഷേപിക്കുകയും വേണം. പ്രതിദിനം 8 മണിക്കൂര് വിശ്രമം തൊഴിലാളികള്ക്ക് അനുവദിക്കണം. തൊഴിലാളികള്ക്കുണ്ടാകുന്ന ആരാഗ്യ പ്രശ്നങ്ങളില് ചികിത്സാ ചെലവ് തൊഴിലുടമ തന്നെ നോക്കണം. സൗജന്യ ആരോഗ്യ - അപകട ഇന്ഷുറന്സ് നല്കണം.
ജോലി നല്കുന്നതിന്റെ ഭാഗമായി പ്രത്യേക തുക ഈടാക്കുവാന് ഏജന്സികളെ അനുവദിക്കില്ല. എന്നാല് ഇത്തരം വിഷയങ്ങള് ശ്രദ്ധിക്കുവാന് പ്രത്യേകം സംവിധാനം ഒരുക്കുന്നതായി സ്ഥാനപതി വ്യക്തമാക്കുകയുണ്ടായി .
വ്യവസ്ഥകള് നടപ്പിലാക്കുന്നത് വിലയിരുത്താന് സംയുക്ത കമ്മിറ്റി രൂപവത്കരിക്കാനും ധാരണയായിട്ടുണ്ട് .
എന്നാല് ഗാര്ഹിക തൊഴിലാളികള്ക്ക് 24 മണിക്കൂറും ലഭ്യമാകുന്ന ഹെല്പ്പ് ഡെസ്ക് ഇന്ത്യന് എംബസിയിലും കുവൈത്തു സര്ക്കാരിന്റെ കീഴിലും ആരംഭിക്കുമെന്നും ധാരണപത്രത്തില് വ്യക്തമാക്കിയിട്ടുണ്ട്.
https://www.facebook.com/Malayalivartha