വാണിജ്യ മന്ത്രാലയത്തിലെ ഇന്‍സ്‌പെക്ടര്‍മാരെന്ന വ്യാജേന കുവൈത്തിലെ വിവിധ ഗവര്‍ണറേറ്റുകളിലെ ഗ്രോസറികളും സൂപ്പര്‍മാര്‍ക്കറ്റുകളും കേന്ദ്രീകരിച്ച് വന്‍ കവര്‍ച്ച നടത്തിവന്ന നാലംഗ തട്ടിപ്പ് സംഘത്തെ പിടികൂടി. സാല്‍മിയ ഇന്‍വെസ്റ്റിഗേഷന്‍ യൂണിറ്റിലെ ക്രിമിനല്‍ ഇന്‍വെസ്റ്റിഗേഷന്‍ ജനറല്‍ ഡിപ്പാര്‍ട്ട്‌മെന്റ് ഉദ്യോഗസ്ഥരാണ് ഈ സംഘത്തെ പിടികൂടിയത്. സിനിമകളെ വെല്ലുന്ന രീതിയില്‍ ഔദ്യോഗിക പരിശോധനയെന്ന വ്യാജേനയാണ് ഇവര്‍ വിവിധയിടങ്ങളില്‍ തട്ടിപ്പ് നടത്തിയിരുന്നത്.

യഥാര്‍ത്ഥ സര്‍ക്കാര്‍ ഉദ്യോഗസ്ഥരെന്ന് തോന്നിക്കുന്ന രീതിയിലുള്ള വസ്ത്രധാരണവും പെരുമാറ്റവുമായിട്ടാണ് പ്രതികള്‍ കടകളില്‍ എത്തിയിരുന്നതെന്ന് സുരക്ഷാ വൃത്തങ്ങള്‍ അറിയിച്ചു. മിന്നല്‍ പരിശോധന നടത്തുകയാണെന്ന് പറഞ്ഞാണ് സംഘം കടകളില്‍ എത്തുന്നത്. ലൈസന്‍സിലും വില്‍പനയ്ക്ക് വെച്ചിരിക്കുന്ന സാധനങ്ങളിലും നിയമലംഘനങ്ങള്‍ ഉണ്ടെന്ന് ചൂണ്ടിക്കാണിച്ചാണ് തട്ടിപ്പിന് തുടക്കമിടുന്നത്. ഇവരുടെ ഔദ്യോഗിക പദവി വ്യാജമാണെന്ന് തിരിച്ചറിയാതെ, കടയുടമകളും ജീവനക്കാരും പരിശോധനയോട് പൂര്‍ണ്ണമായി സഹകരിക്കുകയും ചെയ്തിരുന്നു. ഈ അവസരം മുതലാക്കിയാണ് സംഘം ആസൂത്രിതമായി മോഷണം നടത്തിയിരുന്നത്.

കടകള്‍ക്കുള്ളില്‍ പ്രവേശിക്കുന്ന പ്രതികള്‍ നിയമലംഘനങ്ങളുടെ പേരില്‍ 'സാധനങ്ങള്‍ കണ്ടുകെട്ടുന്നു' എന്ന വ്യാജേന വിലകൂടിയതും വിപണിയില്‍ വേഗത്തില്‍ വിറ്റഴിയുന്നതുമായ സിഗരറ്റുകള്‍, മറ്റ് പുകയില ഉല്‍പ്പന്നങ്ങള്‍, ഇസിഗരറ്റുകള്‍ എന്നിവ വലിയ തോതില്‍ ശേഖരിക്കുകയായിരുന്നു പതിവ്. തുടര്‍ന്ന് ഈ സാധനങ്ങള്‍ തങ്ങളുടെ വാഹനങ്ങളില്‍ കയറ്റി സ്ഥലം വിടും. ഉദ്യോഗസ്ഥര്‍ പോയതിന് ശേഷം മാത്രമാണ് തങ്ങള്‍ വലിയൊരു തട്ടിപ്പിനിരയായ വിവരം കടയുടമകള്‍ തിരിച്ചറിഞ്ഞിരുന്നത്.

രാജ്യത്തിന്റെ വിവിധ ഭാഗങ്ങളില്‍ നിന്നും സമാനമായ രീതിയിലുള്ള നിരവധി പരാതികള്‍ ഒന്നിനുപുറകെ ഒന്നായി ഉയര്‍ന്നുവന്നതോടെയാണ് ഈ വന്‍ തട്ടിപ്പ് പുറത്തറിയുന്നത്. ഒരേ രീതിയിലുള്ള മോഷണ വിവരങ്ങള്‍ ലഭിച്ചതോടെ ക്രിമിനല്‍ ഇന്‍വെസ്റ്റിഗേഷന്‍ ഡിപ്പാര്‍ട്ട്‌മെന്റ് അടിയന്തിര അന്വേഷണത്തിന് ഉത്തരവിടുകയായിരുന്നു. തുടര്‍ന്ന് രൂപീകരിച്ച പ്രത്യേക അന്വേഷണ സംഘം സി.സി.ടി.വി ദൃശ്യങ്ങള്‍ കേന്ദ്രീകരിച്ച് നടത്തിയ ശാസ്ത്രീയ അന്വേഷണത്തിനൊടുവിലാണ് പ്രതികളെ ഒന്നിച്ച് വലയിലാക്കിയത്. ഇവര്‍ക്കെതിരെ കൂടുതല്‍ നിയമനടപടികള്‍ സ്വീകരിച്ചുവരികയാണ്.