ഇംഗ്ലണ്ടില് ക്രിസ്ത്യന് പള്ളി മലയാളികള് ഏറ്റെടുത്തു
ഇംഗ്ലണ്ടിലെ പുരാതനമായ ക്രിസ്ത്യന് പള്ളി മലയാളികള് ഏറ്റെടുത്തു. ലങ്കാഷെയറിലെ പ്രെസ്റ്റണ് സെന്റ് ഇഗ്നേഷ്യസ് റോമന് കത്തോലിക്കാ ദേവാലമാണ് സീറോ മലബാര് ക്രിസ്ത്യന് കമ്മ്യൂണിറ്റി ഏറ്റെടുത്തത്. കഴിഞ്ഞ വര്ഷം ഒക്ടോബറില് ലങ്കാഷെയര് രൂപത ഈ ദേവാലയം ഉപേക്ഷിച്ചിരുന്നു. ഫാ.മാത്യൂ ജേക്കബ് ചൂരപ്പൊയ്കയിലിനെ പുതിയ വികാരിയായും നിയമിച്ചിട്ടുണ്ട്. .
അതേസമയം, ദേവാലയത്തില് മലയാളം കുര്ബാന മാത്രം അര്പ്പിക്കുന്നതില് എതിര്പ്പുമായി പ്രദേശവാസികള് രംഗത്തെത്തിയിട്ടുണ്ട്. തങ്ങളുടെ പൂര്വ്വികരുടെയും സഭയുടെയും സംഭാവകള് കൊണ്ട് സ്ഥാപിച്ച ദേവാലയമാണിതെന്ന് ഇടവകാംഗമായ മോറിയ കാര്ഡ്വെല് (76) പ്രതികരിച്ചു. കുര്ബാനയ്ക്ക് തങ്ങള്ക്കും പങ്കെടുക്കാന് അവസരം നല്കുന്നുണ്ടെങ്കിലും അന്യമായ ഭാഷയില് കൂദാശകള് നടക്കുന്നത് വളരെ ബുദ്ധിമുട്ട് സൃഷ്ടിക്കുന്നുണ്ടെന്ന് അവര് പറഞ്ഞു. ദേവാലയങ്ങള് കൈമാറുന്നതില് ചിലര് വത്തിക്കാനെ പ്രതിഷേധവും അറിയിച്ചിട്ടുണ്ട്.
എന്നാല് പ്രദേശവാസികള്ക്കിടയിലുണ്ടായ ഭിന്നതയില് തനിക്ക് ഖേദമുണ്ടെന്ന് വികാരി പറയുന്നു. ഇത്തരമൊരു വേര്തിരിവ് താന് ആഗ്രഹിക്കുന്നില്ല. എന്നാല് ഇക്കാര്യത്തില് താന് നിസ്സഹായനാണ്. തങ്ങളുടെ പ്രാര്ത്ഥനയിലേക്ക് എല്ലാവരേയും സ്വാഗതം ചെയ്യുന്നു. സഭയിലെ പുതിയ തലമുറയില് പലരും ഇവിടെ ജനിച്ചവരും ഇംഗ്ലീഷ് ഒന്നാം ഭാഷയായി സ്വീകരിച്ചവരുമാണെന്നും ഫാ.മാത്യൂ ജേക്കബ് പറഞ്ഞു. അതുകൊണ്ടു തന്നെ പ്രദേശവാസികള്ക്കായി ഒരു ദിവസം ഇംഗ്ലീഷ് കുര്ബാന നടത്തുന്നത്് പരിഗണനയിലുണ്ടെന്നും അദ്ദേഹം പറഞ്ഞു.
ഇംഗ്ളണ്ടില് പുരോഹിതരുടെ അഭാവം മൂലം നിരവധി ഇടവകകള് ഇന്ത്യയില് നിന്നുള്ള വൈദികര് ഏറ്റെടുത്ത് സേവനം അനുഷ്ഠിക്കുന്നുണ്ട്. മാതൃഭാഷയില് കൂദാശകള് അനുഷ്ഠിക്കുന്നതിലൂടെ തങ്ങളുടെ പാരമ്പര്യം പുതിയ തലമുറയിലൂടെ നിലനിര്ത്താമെന്നാണ് ഇവരുടെ കണക്കുകൂട്ടല്. പ്രെസ്റ്റണിലും പരിസര പ്രദേശങ്ങളിലുമുള്ള ആശുപത്രികളില് നിരവധി മലയാളികളാണ് ജോലി ചെയ്യുന്നത്. ഇംഗ്ലീഷുകാരുടെ ദേവാലയങ്ങളില് തങ്ങള് നേരിടുന്ന ബുദ്ധിമുട്ടുകള് ഒഴിവാക്കാന് പ്രവാസികള് സ്വന്തമായി ദേവാലയങ്ങള് സ്ഥാപിക്കുകയാണെന്ന് ഇവര് പറയുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivarthahttps://www.facebook.com/Malayalivartha
