ഇന്ന് നാട്ടില്‍ വരാനിരിക്കെ പ്രവാസി ജിദ്ദയിലെ താമസ സ്ഥലത്ത് തൂങ്ങി മരിച്ച നിലയില്‍. മലപ്പുറം തുവ്വൂര്‍ വലിയട്ട സ്വദേശി അബ്ദുല്‍ മുനീറി (39)നെ ജിദ്ദയിലെ റുവൈസിലുള്ള താമസസ്ഥലത്തു തൂങ്ങിമരിച്ച നിലയില്‍ കണ്ടെത്തി. നാളെ (ഞായര്‍) ഫൈനല്‍ എക്‌സിറ്റില്‍ നാട്ടിലേക്കു മടങ്ങാനുള്ള ഒരുക്കത്തിലായിരുന്നു.

16 വര്‍ഷമായി പ്രവാസിയായ ഇദ്ദേഹം ജിദ്ദയില്‍ ഒരു കമ്പനിയില്‍ ഓഫിസ് ബോയ് ആയി ജോലി ചെയ്തു വരികയായിരുന്നു. ഇദ്ദേഹത്തിന് കുറച്ചു കാലമായി കടുത്ത തലവേദന ഉണ്ടാവാറുണ്ടായിരുന്നതായും മൈഗ്രേന് ചികിത്സ തേടിയിരുന്നതായും സുഹൃത്തുക്കള്‍ പറഞ്ഞു. മരണകാരണം വ്യക്തമായിട്ടില്ല. മൃതദേഹം ജിദ്ദ മഹ്ജര്‍ കിങ് അബ്ദുല്‍അസീസ് ആശുപത്രി മോര്‍ച്ചറിയിലേക്ക് മാറ്റി. പരേതനായ അരീക്കന്‍ കോയയുടെയും മുരിയെങ്ങലത്ത് ആമിനയുടെയും മകനാണ്. ഭാര്യ: ഫൗസിയ. മക്കള്‍: ദില്‍ന (12), ദിയ ഫാത്തിമ (രണ്ടര).

മറ്റൊരു സംഭവത്തില്‍ എറണാകുളം കോതമംഗലം സ്വദേശിയായ അബ്ദുല്ല സലിം ആണ് സൗദിയില്‍ ജീവനൊടുക്കിയ മറ്റൊരു യുവാവ്, ദമാമ്മിന് അടുത്ത് ഖത്വീഫിലെ താമസ സ്ഥലത്ത് കുളിമുറിയില്‍ കൈ ഞരമ്പ് മുറിച്ച് ജീവനൊടുക്കുകയായിരുന്നുവെന്നാണ് സൂചനകള്‍. കുളി കഴിഞ്ഞ് പുറത്ത് കാണാത്തതിനെ തുടര്‍ന്ന് കൂടെയുള്ളവര്‍ വിവരം അറിയിച്ചതിനെ തുടര്‍ന്ന് നടത്തിയ അന്വേഷണത്തിലാണ് രക്തം വാര്‍ന്ന നിലയില്‍ കണ്ടെത്തിയത്.

മൂന്ന് മാസം മുമ്പാണ് തൊഴില്‍ വിസയില്‍ സലിം സൗദിയിലെത്തിയത്. ജോലിക്ക് പോകാന്‍ താത്പര്യം കാണിക്കാത്ത വിധം മാനസിക അസ്വസ്ഥത പ്രകടിപ്പിച്ചിരുന്നതായി സുഹൃത്തുക്കള്‍ പറയുന്നു.അടുത്ത ആഴ്ച നാട്ടിലേക്ക് വരാനായി ടിക്കറ്റെടുത്തിരുന്നതാണ്. മൃതദേഹം നാട്ടിലെത്തിക്കാനുള്ള നടപടികള്‍ നടന്നു വരുന്നു.