പന്ത്രണ്ടു വര്‍ഷത്തോളമായി ഭര്‍ത്താവിനോടൊപ്പം സലാലയില്‍ കഴിഞ്ഞു വന്ന മലയാളി വനിത ഹൃദയാഘാതം മൂലം മരിച്ചു. കോട്ടയം ചങ്ങനാശ്ശേരി കറുകച്ചാല്‍ നെടുംകുന്നം മിനി മന്ദിരത്തില്‍ സി.എം ബാലകൃഷ്ണന്റെ ഭാര്യ സൈമ ബാലകൃഷ്ണന്‍ (52) ആണ് ഒമാനിലെ സലാലയില്‍ ഹ്യദയാഘാതം മൂലം മരണപ്പെട്ടത്.

കഴിഞ്ഞ പന്ത്രണ്ട് വര്‍ഷത്തോളമായി ഭര്‍ത്താവ് ബാലകൃഷ്ണനോടൊപ്പം സലാലയിലുണ്ടായിരുന്ന സൈമക്ക് ബുധ്‌നാഴ്ച ഉച്ചയോടെ ശാരീരിക അസ്വസ്ഥത അനുഭവപ്പെട്ടതിനെ തുടര്‍ന്ന് സ്വകാര്യ ആശുപത്രിയില്‍ എത്തിക്കുമ്പോഴേക്കും മരണം സംഭവിച്ചത്.

പിതാവ് - പരമേശ്വരന്‍ നായര്‍. മാതാവ് - ജഗദമ്മ. മക്കള്‍ - ഗോകുല്‍ ബി നായര്‍, ഗോപിക ബി നായര്‍. (ഇരുവരും ദുബൈയില്‍). സഹോദരങ്ങള്‍ - പ്രീത, ഹേമ, അമ്പിളി. സലാല സുല്‍ത്താന്‍ ഖാബൂസ് ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം തുടര്‍ നടപടികള്‍ക്ക് ശേഷം നാട്ടിലേക്ക് കൊണ്ടുപോകും.


അതേസമയം മലയാളി യുവാവിനെ റിയാദിലെ താമസസ്ഥലത്ത് മരിച്ച നിലയില്‍ കണ്ടെത്തി. കൊല്ലം ആദിച്ചനല്ലൂര്‍ സ്വദേശി അനീഷ് രാജനാണ് (39) മരിച്ചത്. റിയാദ് അല്‍ ഖലീജ് ഡിസ്ട്രിക്റ്റിലുള്ള വര്‍ക്ക്‌ഷോപ്പില്‍ ജീവനക്കാരനായിരുന്ന യുവാവ് ദിവസങ്ങളായി ജോലിക്ക് എത്തിയിരുന്നില്ല.

ഈ മാസം അഞ്ച് വരെ മാത്രമേ നാട്ടില്‍ കുടുംബവുമായും ബന്ധപ്പെട്ടിട്ടുള്ളൂ. അതിന് ശേഷം ജോലിക്ക് വരികയോ വീട്ടിലേക്ക് വിളിക്കുകയോ ചെയ്തിരുന്നില്ല.

ഈ മാസം 13-ന് വര്‍ക്ക്‌ഷോപ്പിലെ സഹപ്രവര്‍ത്തകന്‍ യുവാവ് താമസിക്കുന്ന മുറിയില്‍ പോയി നോക്കിയപ്പോള്‍ മരിച്ചു കിടക്കുന്നതാണ് കണ്ടത്.

പൊലീസെത്തി മൃതദേഹം ശുമൈസി ആശുപത്രിയിലേക്ക് മാറ്റി. എന്നാണ് മരിച്ചതെന്ന് വ്യക്തമല്ല. ഭാര്യ - ടിന്റു സുഗതന്‍. മക്കള്‍ - അഭിനവ് അനീഷ്, പ്രാര്‍ഥന അനീഷ്. രാജനാണ് പിതാവ്. മൃതദേഹം നാട്ടില്‍ കൊണ്ടുപോകുന്നതിനുള്ള നടപടി ക്രമങ്ങള്‍ നടക്കുന്നു.