സഹായം തേടി സുഡാനില് വെടിവയ്പില് കൊല്ലപ്പെട്ട ആല്ബര്ട്ടിന്റെ ഭാര്യ
സുഡാനില് വെടിയേറ്റ് മരിച്ച കണ്ണൂര് ആലക്കോട് സ്വദേശി ആല്ബര്ട്ട് അഗസ്റ്റി(48)ന്റെ ഭാര്യ സൈബല്ലയും ഇളയ മകളും സഹായം അഭ്യര്ത്ഥിച്ചിരിക്കുകയാണ്. ഫ്ലാറ്റിന്റെ അടിത്തട്ടിലെ ബങ്കറില് ഭക്ഷണം പോലും ഇല്ലാതെ ഭയന്ന് കഴിയുകയാണ് താനും മകളുമെന്നും ഇസബെല്ല പറഞ്ഞു. ആംബുലന്സ് വന്നെങ്കിലും സുഡാനില് കലാപം നടക്കുന്നതിനാല് ആംബുലന്സിനെ സൈനികര് കടത്തിവിട്ടില്ല. സര്ക്കാര് അടിയന്തര സഹായം നല്കണം എന്നും ഇവര് ആവശ്യപ്പെട്ടു.
ഇതിനിടെ സുഡാനിലെ ആഭ്യന്തര സംഘര്ഷത്തില് കൊല്ലപ്പെട്ട മലയാളിയുടെ മൃതദേഹം നാട്ടില് എത്തിക്കാന് ആവശ്യമായ നടപടികള് ആരംഭിച്ചിട്ടുണ്ടെന്ന് കേന്ദ്രമന്ത്രി വി.മുരളീധരന്. സംഘര്ഷത്തില് കണ്ണൂര് സ്വദേശി ആല്ബര്ട്ട് അഗസ്റ്റിന് കൊല്ലപ്പെട്ടത് ഞെട്ടിപ്പിക്കുന്നതും സങ്കടകരവുമാണ്. ആല്ബര്ട്ടിന്റെ മൃതദേഹം നാട്ടില് എത്തിക്കാന് ഉള്ള നടപടികള് പുരോഗമിക്കുകയാണെന്നും അദ്ദേഹം പറഞ്ഞു.
ഇക്കാര്യത്തില് സുഡാനിലെ ഇന്ത്യന് എംബസി അധികൃതര്ക്ക് വേണ്ട നിര്ദേശങ്ങള് കൈമാറി കഴിഞ്ഞു. അദ്ദേഹത്തിന്റെ പിതാവിനെ നേരില് വിളിക്കുകയും വേണ്ട സഹായങ്ങള് ഉറപ്പാക്കുകയും ചെയ്തിട്ടുണ്ട്. ആല്ബര്ട്ടിന്റെ കുടുംബം അവിടെ സുരക്ഷിതരെന്ന വിവരവും അദ്ദേഹത്തെ അറിയിച്ചതായി കേന്ദ്രമന്ത്രി പറഞ്ഞു.
ആല്ബര്ട്ടിന്റെ ഭാര്യയും മകളും തങ്ങുന്ന കെട്ടിടത്തിന് സമീപമാണ് കലാപം നടക്കുന്നത്. അതിനാല് ഒരു വാഹനത്തെയും അവിടെയ്ക്ക് കടത്തിവിടുന്നില്ല. ദാല് ഗ്രൂപ്പ് ഓഫ് കമ്പനി ജീവനക്കാരനാണ് ആല്ബര്ട്ട് അഗസ്റ്റിന്. സുഡാനില് സൈന്യവും അര്ദ്ധസൈനിക വിഭാഗവും തമ്മില് ഏറ്റുമുട്ടല് നടക്കുകയാണ്. വിമുക്തഭടന് കൂടിയാണ് കൊല്ലപ്പെട്ട ആല്ബര്ട്ട് അഗസ്റ്റിന്. രണ്ടാഴ്ച മുന്പാണ് ഭാര്യ സൈബല്ലയും ഇളയ മകള് മാറീറ്റയും അവധിക്കാലം ചെലവിടാനായി ഇവിടെയെത്തിയത്. അഗസ്റ്റിന്റെ മകന് ഓസ്റ്റിന് കാനഡയിലാണ്.
https://www.facebook.com/Malayalivartha
