യുവാക്കളെ വിധി തട്ടിയെടുത്തത് അപ്രതീക്ഷിതമായി. ഒരുമിച്ച് പഠിച്ച് ജോലിചെയ്ത സുഹൃത്തുക്കള്‍ ഒടുവില്‍ ഒന്നിച്ചു തന്നെ മരണത്തിനും കീഴടങ്ങി. റിയാദില്‍ തീപിടിത്തത്തില്‍ മരിച്ച മലപ്പുറം കുറ്റിപ്പുറം പഞ്ചായത്തിലെ വളാഞ്ചേരി പൈങ്കണ്ണൂര്‍ തറക്കല്‍ യൂസഫിന്റെ മകന്‍ അബ്ദുല്‍ ഹക്കീമും (31) മേല്‍മുറി സ്വദേശി നൂറേങ്ങല്‍ കാവുങ്ങല്‍തൊടിയില്‍ ഇര്‍ഫാന്‍ ഹബീബും (33) സഹപ്രവര്‍ത്തകര്‍ മാത്രമല്ല ഉറ്റ കൂട്ടുകാരുമായിരുന്നു.
രണ്ടുപേരും കോട്ടക്കല്‍ എന്‍ജിനീയറിങ് കോളജില്‍ നിന്നു ഒരേസമയം ബിടെക് പഠനം പൂര്‍ത്തിയാക്കിയവരാണ്. ഒരുപാട് സ്വപ്നങ്ങള്‍ ബാക്കിയാക്കിയാണ് രണ്ടു പേരും ഈ ലോകത്തു നിന്നു വിടപറഞ്ഞത്.



നാട്ടില്‍ ഒരുമിച്ച് ജോലി ചെയ്യവേയാണ് ഗള്‍ഫിലേയ്ക്ക് വരാന്‍ ഇരുവര്‍ക്കും അവസരം കിട്ടിയത്. ഇന്റര്‍വ്യൂ കഴിഞ്ഞ് റിയാദിലെ പമ്പില്‍ ജോലിയില്‍ പ്രവേശിക്കുകയും ചെയ്തു. പമ്പിലെ സാങ്കേതിക ജോലികള്‍ക്കായി രണ്ടുപേരും ടെക്നീഷ്യന്‍ തസ്തികയില്‍ എത്തിയവരാണ്.
എന്നാല്‍, വിധി മറ്റൊന്നായിരുന്നു. അവരുടെ സ്വപ്‌നങ്ങളെയെല്ലാം തകിടം മരിച്ച് മരണം തട്ടിയെടുത്തതായി സഹപ്രവര്‍ത്തകര്‍ പറഞ്ഞു.

ഇരുവരുടെയും മരണം ഞെട്ടലോടെയാണ് സഹപ്രവര്‍ത്തകരും സുഹൃത്തുക്കളും സൗദിയിലെ പ്രവാസി സമൂഹവും കേട്ടത്. പലര്‍ക്കും അവരുടെ മരണം ഉള്‍ക്കൊള്ളാനാകുന്നില്ല. വെള്ളിയാഴ്ച പുലര്‍ച്ചെ റിയാദ് ഖാലിദിയയിലെ പമ്പിനോട് ചേര്‍ന്ന ഇവരുടെ താമസ സ്ഥലത്ത് തീപിടിത്തമുണ്ടാവുകയും ഹക്കീമും ഇര്‍ഫാന്‍ ഹബീബുമടക്കം ആറു ഇന്ത്യക്കാര്‍ മരിക്കുകയുമായിരുന്നു.

ശീതീകരണിയില്‍ നിന്നുള്ള വൈദ്യുതി ഷോര്‍ട്ട് സര്‍ക്യൂട്ടാണ് തീപിടുത്തത്തിന് കാരണമായതെന്നാണ് പ്രാഥമിക വിവരം. ഇവരെ കൂടാതെ തമിഴ്നാട്, ഗുജറാത്ത്, മഹാരാഷ്ട്ര എന്നിവിടങ്ങളില്‍ നിന്നുള്ളവരാണ് മരിച്ചത്.

അതേസമയം മലപ്പുറം പൈങ്കണ്ണൂര്‍ തറക്കല്‍ അബ്ദുല്‍ ഹക്കീം കഴിഞ്ഞ വെള്ളിയാഴ്ചയാണ് സൗദിയില്‍ എത്തിയത്.