ഒമാനില് ഡ്രോണ് തകര്ന്നുവീണ് രണ്ട് പ്രവാസികള്ക്ക് ദാരുണാന്ത്യം
ഗള്ഫ് രാജ്യങ്ങള്ക്ക് നേരെയുള്ള വ്യോമാക്രമണങ്ങള് ശമനമില്ലാതെ തുടരുകയാണ്. ഡ്രോണ് തകര്ന്നുവീണ് ഒമാനില് രണ്ട് പ്രവാസികള്ക്ക് ദാരുണാന്ത്യം. സൊഹാര് പ്രവിശ്യയിലെ അല് അവാഹി വ്യവസായ മേഖലയില് ഇന്ന് രാവിലെയാണ് സംഭവം നടന്നത്. അപകടത്തില് നിരവധി പേര്ക്ക് പരിക്കേല്ക്കുകയും ചെയ്തു. മറ്റൊരു ഡ്രോണ് തകര്ന്നുവീണെങ്കിലും ആര്ക്കും പരിക്കില്ല. സംഭവത്തില് അന്വേഷണം ആരംഭിച്ചതായി അധികൃതര് അറിയിച്ചു.
ഇറാന്റെ കൂടുതല് ഡ്രോണുകള് ഇന്നലെ കുവൈറ്റ്, യു.എ.ഇ, ഇറാക്ക്, ബഹ്റൈന്, ഒമാന് എന്നിവിടങ്ങളെ ലക്ഷ്യമിട്ടെത്തി. ഒമാനിലെ മിന അല് ഫഹല് എണ്ണ ടെര്മിനലിലെ കപ്പലുകളെ സുരക്ഷാ നടപടികളുടെ ഭാഗമായി ഒഴിപ്പിച്ചു. യു.എ.ഇയിലെ ജബേല് അലിക്ക് വടക്ക് 'സോഴ്സ് ബ്ലെസ്സിംഗ്' എന്ന ചൈനീസ് ചരക്കുകപ്പലിന് നേരെയും മിസൈലാക്രമണമുണ്ടായി. ഖത്തറില് നിന്ന് ഒമാനിലേക്ക് പോവുകയായിരുന്നു ചരക്കുകപ്പല്.
യുദ്ധം ജയിച്ചെന്ന് യു.എസ് പ്രസിഡന്റ് ഡൊണാള്ഡ് ട്രംപ് അവകാശവാദം മുഴക്കവേ, അമേരിക്കന് എണ്ണ ടാങ്കര് അടക്കം മൂന്ന് കപ്പലുകള് കത്തിച്ചാണ് ഇറാന് തിരിച്ചടിച്ചത്. ആക്രമണം തുടരുമെന്നും ശത്രുക്കളെ സമ്മര്ദ്ദത്തിലാക്കാന് ഹോര്മുസ് കടലിടുക്ക് അടഞ്ഞു തന്നെ കിടക്കുമെന്നുമാണ് ഇറാന്റെ പരമോന്നത നേതാവ് മൊജ്തബാ ഖമനേയി പ്രഖ്യാപിച്ചിരിക്കുന്നത്. കപ്പലുകള്ക്ക് അകമ്പടി നല്കുമെന്ന നിലപാടില് നിന്ന് യു.എസ് പിന്മാറുകയും ചെയ്തു.
https://www.facebook.com/Malayalivartha
