യുഎഇയുടെ ഐഡി കാര്ഡ് പുതുക്കാന് വൈകിയവര്ക്ക് നിബന്ധനകളോടെ അവസരം
യു.എ.ഇ.യുടെ തിരിച്ചറിയല് രേഖയായ എമിറേറ്റ്സ് നാഷണല് ഐ.ഡി. കാര്ഡ് പുതുക്കാന് വൈകിയവര്ക്ക് ഇളവുകളോടെ അത് പുതുക്കാന് അവസരം നല്കുന്നു. കാലാവധി പൂര്ത്തിയായി മൂന്നുമാസം കഴിഞ്ഞിട്ടും പുതുക്കാന് സാധിക്കാത്തവര്ക്ക് സര്ക്കാര് നിബന്ധനകള്ക്കനുസരിച്ചുള്ള കാരണങ്ങള് ബോധിപ്പിച്ചാല് പിഴ ഒഴിവാക്കിക്കൊണ്ട് വീണ്ടും പുതുക്കാം.
ചില പ്രത്യേക സാഹചര്യങ്ങളാല് പുതുക്കാന് സാധിക്കാത്തവര്ക്കാണ് ഇളവുകള്. എന്നാല് വെകിയതിനുള്ള കാരണങ്ങള് ബോധിപ്പിക്കാനായി വ്യക്തമായ രേഖകള് ഹാജരാക്കേണ്ടതാണ്. വിദേശികള്ക്ക് മാത്രമല്ല ജി.സി.സി. രാജ്യങ്ങളിലുള്ളവര്ക്കും സ്വദേശികള്ക്കും ഈ ആനുകൂല്യം ലഭിക്കും.
ഐ.ഡി. കാര്ഡ് ഉടമകള്ക്കും അവരുടെ സ്പോണ്സര്ഷിപ്പിലുള്ള കുടുംബങ്ങള്ക്കും ഈ നിയമം ബാധകമായിരിക്കും. നിയമപരമായോ ഔദ്യോഗികയാത്രകളുടെ ഭാഗമായോ വിദേശത്ത് പോയതിനാല് എമിറേറ്റ്സ് ഐ.ഡി. മൂന്നുമാസത്തിലധികമായി പുതുക്കാന് സാധിച്ചില്ലെങ്കില് പിഴ ഒഴിവാക്കാന് യാത്രാരേഖകള് ഹാജരാക്കിയാല് മതിയാകും. പോകാന് ഇടയായ സാഹചര്യങ്ങള് വിശദമാക്കുന്ന അതോറിറ്റിയില് നിന്നുള്ള കത്തുകളും അനുബന്ധ രേഖകളും യാത്രാരേഖകളില് അടക്കം ചെയ്തിരിക്കണം.
യു.എ.ഇ.ക്ക് പുറത്ത് മൂന്നുമാസത്തിലധികമായി താമസിക്കേണ്ടിവന്നാലും പാസ്പോര്ട്ട് അടക്കമുള്ള രേഖകള് ഹാജരാക്കിയാല് മതി. രാജ്യത്തിന് പുറത്തുപോയി പൂര്ണമായും കിടപ്പിലായാലും അംഗവൈകല്യം സംഭവിച്ചാലും മെഡിക്കല് സര്ട്ടിഫിക്കറ്റ് അടക്കമുള്ള രേഖകള് ഹാജരാക്കിയാല് ഐ.ഡി. പുതുക്കാന് ഇളവുകള് ലഭിക്കും. അതത് രാജ്യങ്ങളുടെ എംബസികളിലോ കോണ്സുലേറ്റുകളിലോ ജോലിചെയ്യുന്നവര്ക്കും അവരുടെ ആശ്രിതര്ക്കും നിശ്ചിത കാലപരിധിക്കുള്ളില് എമിറേറ്റ്സ് ഐ.ഡി. പുതുക്കുന്നതിന് പിഴ ഒഴിവാക്കിക്കൊണ്ടുള്ള ഇളവുകള് അനുവദിച്ചിട്ടുണ്ട്.
https://www.facebook.com/Malayalivartha
