അബുദാബിയില്‍ നഗരത്തിന്റെ സൗന്ദര്യം നശിപ്പിക്കുന്നവര്‍ക്കെതിരെ നടപടിയെടുക്കുമെന്ന് നഗരസഭ
അബുദാബിയില്‍ നഗരത്തിന്റെ സൗന്ദര്യം നശിപ്പിക്കും വിധം പ്രവര്‍ത്തിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് നഗരസഭ. നഗരസൗന്ദര്യം സംരക്ഷിക്കാനുള്ള നഗരസഭയുടെ പദ്ധതികളുടെ ഭാഗമായാണ് ഈ നടപടി.
നഗരത്തിന്റെ സൗന്ദര്യത്തിന് കോട്ടം തട്ടും വിധം പ്രവര്‍ത്തിക്കുകയോ എന്തെങ്കിലും നിര്‍മാണ പ്രവര്‍ത്തനങ്ങള്‍ നടത്തുകയോ ചെയ്യുന്നത് കര്‍ശനമായി തടയുമെന്ന് നഗരസഭ അധികൃതര്‍ അറിയിച്ചു. അനുമതിയില്ലാതെയും താല്‍ക്കാലിക മതില്‍ നിര്‍മിക്കാതെയുമുള്ള കെട്ടിട നിര്‍മാണം, സുരക്ഷാ മാനദണ്ഡങ്ങള്‍ പാലിക്കാതെ കെട്ടിടം പൊളിക്കുക, മാലിന്യം വലിച്ചെറിയുക, മണ്ണില്‍ കുഴിയെടുക്കുക തുടങ്ങിയ പ്രവര്‍ത്തികള്‍ കടുത്ത ശിക്ഷ നല്‍കുമെന്ന് നഗരസഭ മുന്നറിയിപ്പ് നല്‍കി. 
2000 മുതല്‍ അമ്പതിനായിരം ദിര്‍ഹം വരെ ഇത്തരക്കാരില്‍ നിന്ന് പിഴ ഈടാക്കും. ഇത്തരം പ്രവര്‍ത്തികള്‍ പൊതുജനങ്ങളുടെ ഭാഗത്ത് നിന്നുണ്ടാകാതിരിക്കാന്‍ ജനങ്ങള്‍ക്കിടയില്‍ ബോധവല്‍ക്കരണം നടത്തുകയും ലഘുലേഖകള്‍ വിതരണം ചെയ്യുകയും ചെയ്യും. 
നിര്‍മാണ പ്രവര്‍ത്തനങ്ങളുടെ ഭാഗമായുണ്ടാകുന്ന മാലിന്യങ്ങളും പുല്ലുകളും കുറ്റിച്ചെടികളും വെട്ടിനീക്കുമ്പോാഴുണ്ടാകുന്ന അവശിഷ്ടങ്ങളുമെല്ലാം ഉടനടി നീക്കം ചെയ്യാന്‍ നടപടി സ്വീകരിച്ചിട്ടുണ്ട്. നഗരസസൗന്ദര്യത്തിന് കോട്ടം വരുത്തുന്ന നടപടികള്‍ ഒരു കാരണവശാലും അംഗീകരിക്കില്ലെന്ന് നഗരസഭ വ്യക്തമാക്കി.
https://www.facebook.com/Malayalivartha
