സൗദിയിൽ തൊഴിൽ നഷ്ടപ്പെട്ട ഇന്ത്യക്കാർ ഇഖാമ പുതുക്കേണ്ടതില്ല
സൗദിയില്‍ തൊഴില്‍ നഷ്ടപ്പെട്ട ഇന്ത്യക്കാര്‍ ഇഖാമ പുതുക്കേണ്ടതില്ലെന്ന് സൗദി സര്‍ക്കാര്‍.
ഇഖാമയുടെ കാലാവധി കഴിഞ്ഞവര്‍ പൊലീസ് നടപടികള്‍ നേരിടേണ്ടി വരില്ലെന്നും സൗദി തൊഴില്‍ മന്ത്രാലയം അറിയിച്ചു.
സൗദി അറേബ്യയിലെ മക്ക പ്രവിശ്യയിലെ തൊഴില്‍ മന്ത്രിയാണ് ജോലി നഷ്ടപ്പെട്ട ഇന്ത്യക്കാര്‍ക്ക് ഇഖാമ സൗജന്യമായി പുതുക്കാനുളള സൗകര്യമൊരുക്കുമെന്ന് ഉറപ്പ് നല്‍കിയത്. തൊഴില്‍ നഷ്ടപ്പെട്ട ഇന്ത്യക്കാര്‍ താമസിക്കുന്ന ലേബര്‍ ക്യാമ്പ് സന്ദര്‍ശിച്ച ശേഷമാണ് മന്ത്രി ഇക്കാര്യം അറിയിച്ചത്. കേന്ദ്ര വിദേശകാര്യ സഹമന്ത്രി മന്ത്രി വി.കെ. സിംഗിനൊപ്പമാണ് ഇദ്ദേഹം മക്കയിലെ ലേബര്‍ ക്യാമ്പിലെത്തിയത്.
നാട്ടിലേക്ക് മടങ്ങാന്‍ ആഗ്രഹിക്കുന്നവരെ ഇന്ത്യയിലെത്തിക്കാനും, മറ്റു കമ്പനികളില്‍ ജോലി ആഗ്രഹിക്കുന്നവര്‍ക്ക് വേണ്ട സൗകര്യങ്ങള്‍ ഒരുക്കാനും തയ്യാറാണെന്ന് സൗദി സര്‍ക്കാര്‍ അറിയിച്ചു.
അതേസമയം, തൊഴിലാളി പ്രശ്‌നത്തില്‍ സൗദി അനുകൂല നിലപാട് സ്വീകരിച്ച സാഹചര്യത്തില്‍, വി.കെ.സിംഗ് ഇന്ത്യയില്‍ തിരിച്ചെത്തി. ഇന്ത്യന്‍ തൊഴിലാളികളുടെ പ്രശ്‌നങ്ങള്‍ക്ക് പരിഹാരം കണ്ടെത്താനുളള നടപടികള്‍ പൂര്‍ത്തിയായതായി അദ്ദേഹം പറഞ്ഞു.
സൗദി സന്ദര്‍ശനത്തിനിടെ കേന്ദ്രമന്ത്രി വി.കെ.സിംഗ് രണ്ടു ലേബര്‍ ക്യാമ്പുകളിലാണ് സന്ദര്‍ശനം നടത്തിയത്. സൗദിയിലെ വിവിധ മന്ത്രിമാരുമായും, രാഷ്ട്രീയ നേതാക്കളുമായും അദ്ദേഹം കൂടിക്കാഴ്ച്ച നടത്തിയിരുന്നു.
https://www.facebook.com/Malayalivartha
