ദുബായിലെ മിന സ്റ്റോറേജ് വെയര്ഹൗസില് അഗ്നിബാധ; വന് നാശനഷ്ടം
ദുബായിലെ മിന ഫ്രീ പോര്ട്ടിനു സമീപത്തെ സ്റ്റോറേജ് വെയര്ഹൗസില് ഇന്നലെ ഉച്ചയോടെ ഉണ്ടായ അഗ്നിബാധയില് വന് നാശനഷ്ടം. ആളപായമില്ല. രാവിലെ 11.15ന് ആണ് അഗ്നിബാധ സംബന്ധിച്ച വിവരം അബുദാബി പൊലീസ് കണ്ട്രോള് റൂമില് ലഭിച്ചത്. മിനാ സായിദ് പോര്ട്, മുസഫ, മെട്രോപ്പൊലിറ്റന്, അല് വത്ഭ, അല് ബത്തീന്, അല് ഫലാഹ് എന്നിവിടങ്ങളില്നിന്നുള്ള അഗ്നിശമനസേനാ യൂണിറ്റുകള് സ്ഥലത്തെത്തി മുന്കരുതല് നടപടികള് പൂര്ത്തിയാക്കി. ഒന്നരയോടെ തീയണയ്ക്കാനുള്ള ശ്രമങ്ങള് ആരംഭിച്ചു.
സമീപത്തെ സംഭരണകേന്ദ്രങ്ങളിലേക്കു തീ വ്യാപിക്കാതിരിക്കാനുള്ള സുരക്ഷിത ക്രമീകരണങ്ങള് ആദ്യംതന്നെ ഒരുക്കിയതായി അബുദാബി സിവില് ഡിഫന്സ് ഡയറക്ടര് ജനറല് ലഫ്റ്റനന്റ് കേണല് മുഹമ്മദ് അബ്ദുല് ജലീല് അല് അന്സാരി അറിയിച്ചു. അബുദാബി ഡിസ്ട്രിബ്യൂഷന് കമ്പനിയുടെ സഹകരണത്തോടെ ത്വരിതഗതിയില് വെയര്ഹൗസിലേക്കുള്ള എല്ലാ വൈദ്യുതിബന്ധങ്ങളും വിച്ഛേദിച്ചശേഷമായിരുന്നു വെള്ളം പമ്പുചെയ്തു തീയണച്ചുതുടങ്ങിയത്. മണിക്കൂറുകളോളം വെയര്ഹൗസില്നിന്നു പുക ഉയര്ന്നു. ഹെലികോപ്റ്ററില് അബുദാബി പൊലീസ് അഗ്നി പ്രതിരോധ പ്രവര്ത്തനം നിയന്ത്രിക്കുകയും നിര്ദേശങ്ങള് നല്കുകയും ചെയ്തു.
മിനാ മാളിനു പിറകിലെ വെയര്ഹൗസ് ജംക്ഷന് 17നും 12നും ഇടയിലുള്ള റോഡ് താല്ക്കാലികമായി അടച്ചിട്ടാണ് അഗ്നി പ്രതിരോധ പ്രവര്ത്തനം സുഗമമാക്കിയത്. റാണി റിഫ്രഷ്മെന്റ് ട്രാന്സ്പോര്ട്ടേഷന്റെ വാഹനം ട്രക്കില് വടംകെട്ടി അഗ്നിബാധയുള്ള ഭാഗത്തുനിന്നു പൊലീസ് സുരക്ഷിതസ്ഥാനത്തേക്കു നീക്കം ചെയ്തു. ഇന്നലെ എല്ലാ വെയര്ഹൗസ് കേന്ദ്രങ്ങള്ക്കും അവധിയായതിനാല് തൊട്ടടുത്ത സ്റ്റോറേജ് കേന്ദ്രങ്ങളിലെ വാഹനങ്ങളും മറ്റും ബന്ധപ്പെട്ടവരെ വിളിച്ചു നീക്കംചെയ്യാനും മുന്കരുതല് നടപടികള് എടുക്കാനും പൊലീസ് ഉദ്യോഗസ്ഥന്മാര് നന്നേ പണിപ്പെട്ടു. തീപിടിത്തം സംബന്ധിച്ച അന്വേഷണം നടന്നുവരികയാണ്.
വേനല്ച്ചൂടില് വൈദ്യുതി ലൈനുകളിലെ ഓവര്ലോഡും ഷോര്ട് സര്ക്യൂട്ടും തീപിടിത്തത്തിനു കാരണമാവുന്നു. പുറത്തുപോകുമ്പോള് എല്ലാ വൈദ്യുതോപകരണങ്ങളും ഓഫ് ചെയ്യുകയും വൈദ്യുതിലൈനുകള് വിച്ഛേദിക്കുകയും ചെയ്യുന്നതാണു സുരക്ഷിതം. വീടുകളിലും ഓഫിസിലും സേ്റ്റാറേജ് കേന്ദ്രങ്ങളിലുമെല്ലാം എല്ലാവരും സുരക്ഷാ മുന്കരുതല് എടുക്കുന്നതില് പ്രത്യേക ജാഗ്രത പാലിക്കണം. അടുക്കളയിലെ പാചകത്തിനിടയില് കൂടുതല് ശ്രദ്ധവേണം. വൈദ്യുതി, ഗ്യാസ് എന്നിവയുടെ ഉപയോഗത്തില് അശ്രദ്ധയും അലംഭാവവും ഒഴിവാക്കിയാല് അപകടം ഒരുപരിധിവരെ തടയാനാവുമെന്നു പൊലീസും സിവില് ഡിഫന്സും ആവര്ത്തിച്ചു മുന്നറിയിപ്പു നല്കുന്നു.
https://www.facebook.com/Malayalivartha
