കാസ്‌ട്രോയുടെ സംസ്‌കാര ചടങ്ങില്‍ പങ്കെടുക്കുമെന്ന് എം.എ.ബേബി
ക്യൂബന്‍ വിപ്ലവനായകന്‍ ഫിദല്‍ കാസ്‌ട്രോയുടെ സംസ്‌കാര ചടങ്ങില്‍ സിപിഎം പ്രതിനിധിയായി പൊളിറ്റ് ബ്യൂറോ അംഗം എം.എ.ബേബി പങ്കെടുക്കും. ബേബി 29ന് ക്യൂബന്‍ തലസ്ഥാനമായ ഹവാനയില്‍ എത്തും. ഫിദലിന്റെ നേതൃത്വത്തിലുള്ള ക്യൂബന്‍ വിപ്ലവ യാത്രയുടെ ആരംഭം കുറിച്ച സാന്റിയാഗോയില്‍ ഡിസംബര്‍ നാലിനാണു സംസ്‌കാരച്ചടങ്ങുകള്‍.
ക്യൂബന്‍ സമയം വെള്ളിയാഴ്ച രാത്രി 10.29നായിരുന്നു മരണം (ഇന്ത്യന്‍ സമയം ശനി രാവിലെ ഒന്‍പതു മണി). ഏറെ നാളായി രോഗബാധിതനായിരുന്ന ഫിദലിന്റെ മരണവിവരം, നിറകണ്ണുകളോടെ ടെലിവിഷനില്‍ പ്രത്യക്ഷപ്പെട്ട സഹോദരനും ക്യൂബന്‍ പ്രസിഡന്റുമായ റൗള്‍ കാസ്‌ട്രോയാണ് പുറത്തുവിട്ടത്.
ക്യൂബന്‍ ഏകാധിപതി ഫുല്‍ജെന്‍ഷ്യോ ബാറ്റിസ്റ്റയ്‌ക്കെതിരെ ഫിദലിന്റെ നേതൃത്വത്തില്‍ വര്‍ഷങ്ങള്‍ നീണ്ട സായുധ പോരാട്ടങ്ങള്‍ക്കൊടുവിലാണ് ക്യൂബയില്‍ ജനകീയ ഭരണകൂടം വരുന്നത്. ഫിദലും ചെഗുവേരയും നടത്തിയ ത്രസിപ്പിക്കുന്ന ആ പോരാട്ടം ലോക വിപ്ലവ ചരിത്രത്തിലെ സുവര്‍ണ ഏടുകളാണ്. ബാറ്റിസ്റ്റയുടെ പതനശേഷം 1959 ല്‍ അധികാരത്തിലെത്തുമ്‌ബോള്‍ 32കാരനായ ഫിദല്‍ ലാറ്റിനമേരിക്കയിലെ ഏറ്റവും പ്രായം കുറഞ്ഞ ഭരണാധികാരിയായിരുന്നു.
https://www.facebook.com/Malayalivartha
