നിര്‍മാണ മേഖലയില്‍ പൊതുവിസ വേണം
നിര്‍മാണ മേഖലയില്‍ പ്രത്യേക വിഭാഗത്തിന് പ്രത്യേക വിസയെന്ന നിലവിലെ സമ്പ്രദായം മാറ്റി നിര്‍മാണ മേഖലയില്‍ പ്രവര്‍ത്തിക്കുന്നവര്‍ക്കെല്ലാം ഒറ്റവിഭാഗം വിസ നല്‍കണമെന്ന് ഒമാനിലെ കെട്ടിട നിര്‍മാതാക്കള്‍ ആവശ്യമുന്നയിച്ചു. ഈ ആവശ്യമുന്നയിച്ച് മാനവ വിഭവശേഷി മന്ത്രാലയത്തെ സമീപിച്ചതായി ഒമാന്‍ കോണ്‍ട്രാക്ടേഴ്‌സ് സൊസൈറ്റി അധികൃതര്‍ പറയുന്നു. ഈ ആവശ്യം ഉടന്‍തന്നെ പരിഗണിക്കുമെന്നാണ് പ്രത്യാശിക്കുന്നതെന്ന് നിര്‍മാണ കമ്പനി ഉടമകള്‍ പറഞ്ഞു. നിലവില്‍ ആശാരിക്കും പടവുകാരനും മെക്കാനിക്കിനുമൊക്കെ പ്രത്യേകം പ്രത്യേകം വിസകള്‍ നല്‍കുന്നത് നിരവധി പ്രതിസന്ധികളുണ്ടാക്കുന്നുണ്ടെന്നാണ് അവര്‍ പറയുന്ന്ത്.
നിലവിലെ തൊഴില്‍ നിയമ പ്രകാരം ചെയ്യാന്‍ കഴിയുന്നത് വിസ ക്‌ളിയറന്‍സില്‍ രേഖപ്പെടുത്തിയ ജോലി മാത്രമാണ്്. തൊഴില്‍ കാര്‍ഡില്‍ രേഖപ്പെടുത്തിയതല്ലാത്ത ജോലികള്‍ ചെയ്യുന്നത് ശിക്ഷാര്‍ഹവുമാണ്. പൊതുവിസ അനുവദിക്കുന്നതോടെ നിര്‍മാണ മേഖലയിലെ എല്ലാ ജോലിയും എല്ലാവര്‍ക്കും ചെയ്യാന്‍ കഴിയും. പൊതുവിസ അനുവദിക്കുന്നത് ഒമാന്‍ തൊഴില്‍ നിയമത്തിന്റെ ലംഘനമാവില്ലെന്നാണ് കമ്പനി ഉടമകള്‍ പറയുന്നത്. നിരവധി നിര്‍മാണ കമ്പനികള്‍ പിടിച്ചുനില്‍ക്കാന്‍ പാടുപെടുന്ന സാഹചര്യത്തില്‍ പുതിയ വിസ നിലവില്‍ വരുന്നാല്‍ വ്യത്യസ്ത കഴിവുള്ളവരെ ജോലിക്ക് നിയമിക്കാന്‍ കഴിയുമെന്നും ഇവരെക്കൊണ്ട് വ്യത്യസ്ത ജോലികള്‍ ചെയ്യിക്കാന്‍ കഴിയുമെന്നും കോണ്‍ട്രാക്ടര്‍മാര്‍ പറയുന്നു. എണ്ണവില കുറഞ്ഞത് മൂലമുണ്ടായ സാമ്പത്തിക പ്രതിസന്ധികള്‍ നിര്‍മാണ മേഖലയെയാണ് ഏറ്റവും കുടുതല്‍ ബാധിച്ചത്.
സാമ്പത്തിക പ്രതിസന്ധി വന്നതോടെ പുതിയ നിര്‍മാണ പദ്ധതികള്‍ വളരെ കുറച്ച് മാത്രമാണുള്ളത്. ആരംഭിച്ച പദ്ധതികള്‍ പോലും പലര്‍ക്കും പൂര്‍ത്തീകരിക്കാന്‍ കഴിയുന്നില്ല. അതിനാല്‍ പല നിര്‍മാണ കമ്പനികളും സാമ്പത്തിക പ്രതിസന്ധിയിലാണ്. പുതിയ പദ്ധതികള്‍ കിട്ടാതെ വന്നതോടെ നിരവധി കമ്പനികള്‍ ജീവനക്കാര്‍ക്ക് ശമ്പളം നല്‍കാന്‍ കഴിയാതെ വിഷമിക്കുന്നുണ്ട്. ചിലത് അടച്ചുപൂട്ടല്‍ ഭീഷണിയിലുമാണ്. നിലവിലെ അവസ്ഥക്ക് ഒരു പരിധിവരെ പരിഹാരം കാണാന്‍ പൊതുവിസക്കാവുമെന്നാണ് കണക്കാക്കുന്നത്. രാജ്യത്തെ ഏറ്റവും വലിയ തൊഴില്‍ മേഖല കൂടിയാണിത്.
https://www.facebook.com/Malayalivartha
