വാഹത് അല് കറാമ രക്തസാക്ഷി സ്മാരകം
രാജ്യത്തിന് വേണ്ടി ജീവന് ത്യജിച്ച ധീരപോരാളികളുടെ ഓര്മ സൂര്യചന്ദ്രന്മാര് നിലനില്ക്കുവോളം കാത്തുസൂക്ഷിക്കുക എന്ന ലക്ഷ്യത്തോടെ പണിതുയര്ത്തിയ വാഹത് അല് കറാമ രക്തസാക്ഷി സ്മാരകം നാടിനായി സമര്പ്പിച്ചു. രക്തസാക്ഷികളുടെ കുടുംബാംഗങ്ങളും യു.എ.ഇ ഭരണാധികാരികളും ഉന്നതരും ഉള്പ്പെട്ട പ്രൗഡഗംഭീര ചടങ്ങില് സമ്പൂര്ണ ദേശീയസൈനിക ബഹുമതികളോടെ സ്മാരകം ഉദ്ഘാടനം ചെയ്തു. യു.എ.ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന് റാശിദ് ആല് മക്തൂം,അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാന്ഡറുമായ ജനറല് ശൈഖ് മുഹമ്മദ് ബിന് സായിദ് ആല് നഹ്യാന് തുടങ്ങിയവര് രക്തസാക്ഷി സ്മാരകത്തില് പുഷ്പചക്രങ്ങളര്പ്പിച്ചു. വിദേശകാര്യ അന്താരാഷ്ട്ര സഹകരണ മന്ത്രി ശൈഖ് അബ്ദുല്ല ബിന് സായിദ് ആല് നഹ്യാന് സംസാരിച്ചു. രക്തസാക്ഷികള്ക്കുള്ള രാഷ്ട്രത്തിന്റെ ബഹുമതികള് കുടൂംബാംഗങ്ങള് എറ്റുവാങ്ങി.
അബൂദബി ശൈഖ് സാഇദ് ഗ്രാന്റ് മോസ്കിനും സായുധ സേനാ കേന്ദ്ര ആസ്ഥാനത്തിനുമിടയിലായി നാല്പത്തിയാറായിരം സ്ക്വയര്ഫീറ്റ് വിസ്തൃതിയില് തീര്ത്ത വാഹത് അല് കറാമ രാജ്യത്തിന്റെ അഭിമാനത്തിന്റെയും ആദരവിന്റെയും ഐക്യബോധത്തിന്റെയും പ്രതീകമാണ്. ഏഴ് എമിറേറ്റുകളെയും രാജ്യത്തിന്റെ ധീരനായകരെയും പ്രതിനിധീകരിക്കുന്ന എട്ട് കൂറ്റന് ഗ്ളാസ് പാനലുകളാണ് മുഖ്യ സ്മാരകത്തിനുളളത്. 31 ലോഹ പാനലുകള് രക്തസാക്ഷികളുടെ പ്രതീകമായി അവരുടെ പേരെഴുതി ഉയര്ത്തിയിട്ടുണ്ട്. യു.എ.ഇയുടെ രാഷ്ട്രപിതാവ് ശൈഖ് സായിദ് ബിന് സുല്ത്താന് അല് നഹ്യാന് എഴുതിയ കവിതകളും പാനലുകളില് ആലേഖനം ചെയ്തിട്ടുണ്ട്. യു.എ.ഇയും ധീരരക്തസാക്ഷികളും പ്രതിനിധാനം ചെയ്യുന്ന മൂല്യങ്ങളുടെയും സംസ്കാരത്തിന്റെയും ചിഹ്നങ്ങളാണ് സ്മാരകത്തില് ഒരുക്കിയിരിക്കുന്നത്.
https://www.facebook.com/Malayalivartha
