ശമ്പളം മുടങ്ങിയതിനെതുടര്ന്ന് ജി.പി.സെഡിലെ തൊഴിലാളികള് സംഘടിതമായി ഇന്ത്യന് എംബസിയിലെത്തി
വിവിധ ലേബര് ക്യാമ്പുകളില് നിന്നുള്ള 75 ഓളം തൊഴിലാളികളാണ് ഇന്നലെ സംഘടിതമായി ഇന്ത്യന് എംബസിയിലെത്തിയത്. തൊഴിലാളികളില് ചെറുപ്പക്കാര് മുതല് 50 വയസിനുമുകളില് പ്രായമായവര് വരെയുണ്ട്. കമ്പനി ഇപ്പോഴും ജോലിക്ക് പോകാന് ആവശ്യപ്പെടുന്നുണ്ടെന്നും എന്നാല്, മുടങ്ങിയ ശമ്പളത്തിെന്റ കാര്യത്തില് തീരുമാനമായ ശേഷമേ ജോലിക്കു പോകൂ എന്നാണ് തങ്ങളുടെ നിലപാടെന്നും അവര് പറഞ്ഞു. ശമ്പളം മുടങ്ങിയതിന് പുറമെ, വിസ കാലാവധി തീര്ന്ന പ്രശ്നവും പലരും നേരിടുന്നുണ്ട്. പാസ്പോര്ട്ട് കമ്പനിയുടെ പക്കലാണുള്ളതെന്ന് തൊഴിലാളികള് പറഞ്ഞു. കമ്പനിയുടെ ആസ്തി വിറ്റിട്ടാണെങ്കിലും തങ്ങളുടെ ശമ്പള കുടിശ്ശിക തന്ന് നാട്ടിലേക്ക് തിരിച്ചയക്കണമെന്നാണ് തൊഴിലാളികളുടെ ആവശ്യം. ഉയര്ന്ന പോസ്റ്റിലുള്ള പലരും നേരത്തെ തന്നെ ആനുകൂല്യങ്ങള് വാങ്ങി മടങ്ങിയതായി ഇവര് പറഞ്ഞു.
നിലവില് തൊഴിലാളികള് ഒറ്റക്കെട്ടാണെങ്കിലും അവര്ക്കിടയില് ചേരിതിരിവുണ്ടാക്കാനുള്ള ശ്രമം നടക്കുന്നുണ്ട്. ചില തൊഴിലാളികള് ഇതിനകം ആനുകൂല്യമൊന്നും കൈപ്പറ്റാതെ നാട്ടിലേക്ക് മടങ്ങിയിട്ടുണ്ട്. ബാക്കിയുള്ളവര് എംബസിയിലും,ലേബര് കോടതിയിലും പരാതി നല്കി കാത്തിരിക്കുകയാണ്. തൊഴിലാളികളുടെ പ്രശ്നത്തെക്കുറിച്ച് പ്രതികരിക്കാന് എംബസി അധികൃതര് തയ്യാറായില്ല. ദുരിതമനുഭവിക്കുന്ന ജി.പി.സെഡ് കമ്പനിയിലെ തൊഴിലാളികളെ സഹായിക്കാന് നടപടി സ്വീകരിക്കണമെന്ന് ഇന്ത്യന് വിദേശകാര്യ മന്ത്രി സുഷമ സ്വരാജ് എംബസി അധികൃതരോട് കഴിഞ്ഞ ദിവസം ആവശ്യപ്പെട്ടിരുന്നു. ശമ്പളം മുടങ്ങിയതിനെ തുടര്ന്ന് നിരവധി തൊഴിലാളികള് പ്രശ്നത്തില് ഇടപെടണമെന്നാവശ്യപ്പെട്ട് വിദേശകാര്യ വകുപ്പിനെ സമീപിച്ചിരുന്നു. തെന്റ ട്വിറ്റര് എക്കൗണ്ട് വഴിയാണ് സുഷമ ഈ വിവരം അറിയിച്ചത്. പ്രശ്നം എംബസിയുടെ ശ്രദ്ധയില്വന്നിട്ടുണ്ടെന്നും അവര് തൊഴിലാളികളെ സഹായിക്കുമെന്നുമാണ് സുഷമ പറഞ്ഞത്.
ജി.പി.സെഡിലെ തൊഴിലാളികള്ക്ക് ഇന്ത്യന് എംബസിയുടെ കീഴില് പ്രവര്ത്തിക്കുന്ന ഇന്ത്യന് കമ്മ്യൂണിറ്റി റിലീഫ് ഫണ്ടിെന്റ (െഎ.സി.ആര്.എഫ്) നേതൃത്വത്തില് കഴിഞ്ഞ ദിവസം സഹായമെത്തിച്ചിരുന്നു. അരി, പഞ്ചസാര, തേയില, എണ്ണ, പച്ചക്കറി തുടങ്ങിയ സാധനങ്ങളാണ് െഎ.സി.ആര്.എഫ് വളണ്ടിയര്മാരുടെ നേതൃത്വത്തില് എക്കര്, സിത്ര, റിഫ എന്നിവിടങ്ങളിലെ ലേബര് ക്യാമ്പുകളില് എത്തിച്ചത്. തൊഴിലാളികള്ക്ക് ഒരാഴ്ച കഴിയാനുള്ള സാധനങ്ങളാണ് നല്കിയത്. മാസങ്ങളായി ശമ്പളം മുടങ്ങിയതില് പ്രതിഷേധിച്ച് 140ഓളം തൊഴിലാളികള് ഒരാഴ്ച മുമ്പ് തൊഴില്, സാമൂഹിക വികസന മന്ത്രാലയത്തിനുമുന്നില് സംഘടിച്ചിരുന്നു.ഒരു മാസത്തിനിടെ രണ്ടാം തവണയാണ് തൊഴിലാളികള് സമാന രീതിയില് സംഘടിച്ചത്.
നുവൈദ്രാതിലെ അക്കമഡേഷനില് നിന്ന് ഇവര് കൂട്ടമായി സായിദ് ടൗണിലേക്ക് നടന്നെത്തുകയായിരുന്നു.നവംബര് മുതല് തങ്ങള്ക്ക് കിട്ടാനുള്ള പണം കിട്ടാത്തതാണ് ശമ്പളം മുടങ്ങാനുള്ള കാരണമെന്ന നിലപാടിലാണ് കമ്പനി അധികൃതര്. പ്രശ്നം ഉടന് പരിഹരിക്കാമെന്ന മന്ത്രാലയ അധികൃതരുടെ ഉറപ്പിനെ തുടര്ന്നാണ് തൊഴിലാളികള് പിരിഞ്ഞുപോയത്.
ഇവരുടെ ഏക വരുമാനത്തെ ആശ്രയിച്ച് കഴിയുന്ന നാട്ടിലെ കുടുംബങ്ങളും പ്രതിസന്ധിയിലാണ്. തൊഴിലാളികള് ഭക്ഷണം പോലും കഴിക്കുന്നത് സന്നദ്ധ സംഘടകളുടെയും മറ്റും സഹായം കൊണ്ടാണ്. മൈഗ്രന്റ് വര്ക്കേഴ്സ് പ്രൊട്ടക്ഷന് സൊസൈറ്റി (എം.ഡബ്ല്യു.പി.എസ്) പല തവണയായി ഇവര്ക്ക് ഭക്ഷണസാധനങ്ങളും മറ്റും വിതരണം ചെയ്തിട്ടുണ്ട്. കഴിഞ്ഞ മാസം എം.ഡബ്ല്യു. പി.എസ് ഫേസ്ബുക്ക് വഴി തൊഴിലാളികള്ക്കായി നടത്തിയ അഭ്യര്ഥനയെ തുടര്ന്ന് നിരവധി പേരാണ് സഹായങ്ങള് നല്കിയത്.
https://www.facebook.com/Malayalivartha
