ജീവനക്കാരന്റെ താമസ വിസ റദ്ദാക്കിയാലും കുടുംബാംഗങ്ങളുടെ വിസ റദ്ദാക്കില്ല
യുഎഇയില് ജീവനക്കാരന്റെ താമസ വിസ റദ്ദാക്കിയാലും ഒപ്പമുള്ള കുടുംബാംഗങ്ങളുടെ വിസ റദ്ദാകാത്ത രീതിയില് യുഎഇയില് വിസ നിയമ മാറ്റം. ഇതിനായി 5000 ദിര്ഹം (ഏകദേശം 80,000 രൂപ) കെട്ടിവയ്ക്കണം. ജീവനക്കാരന് പുതിയ വിസ നേടി താമസാനുമതി ശരിയാക്കുമ്പോള് തുക തിരികെ ലഭിക്കും. നാളെ പ്രാബല്യത്തിലാകുന്ന വിസാ പരിഷ്കാരങ്ങളുടെ കൂട്ടത്തിലാണ് ഈ വ്യവസ്ഥയും ഉള്പ്പെടുത്തിയിരിക്കുന്നത്.
വനിതാ നിക്ഷേപകരുടെ കുടുംബാംഗങ്ങള്ക്ക് ഓരോരുത്തര്ക്കും 3000 ദിര്ഹം (ഏകദേശം 48,000 രൂപ) വീതം കെട്ടിവച്ചാല് വിസ ലഭിക്കും. ഈ തുകയും തിരികെ ലഭിക്കും.
ജോലിക്കും സന്ദര്ശനത്തിനും മള്ട്ടിപ്പിള് എന്ട്രി പെര്മിറ്റ്, സ്റ്റഡി വീസ, ചികില്സയ്ക്കും കോണ്ഫറന്സുകളില് പങ്കെടുക്കാനും പ്രത്യേക എന്ട്രി പെര്മിറ്റ് തുടങ്ങിയവ പുതുതായി ഏര്പ്പെടുത്തും. വ്യാജരേഖ ചമച്ചു താമസ വിസയ്ക്ക് അപേക്ഷ നല്കിയാല് പിഴ 5000 ദിര്ഹമാകും. ഒരു വര്ഷത്തിനകം തന്നെ വീണ്ടും വ്യാജരേഖ നല്കുന്നവരുടെ പിഴ അരലക്ഷം ദിര്ഹം (ഏകദേശം എട്ടുലക്ഷം രൂപ) വരെയാക്കും. താമസ വിസയില്ലാതെ അനധികൃതമായി കഴിയുന്നവരെ സ്വദേശത്തേക്ക് അയയ്ക്കാന് പ്രത്യേക ഫണ്ട് രൂപീകരിക്കും.
റസിഡന്സി ഡിപ്പാര്ട്മെന്റിന്റെ പോര്ട്ടല് ഉപയോഗിക്കുന്നവര് വിവരങ്ങള് കൃത്യമായി നല്കിയില്ലെങ്കില് 100 ദിര്ഹം (ഏകദേശം 1600 രൂപ) പിഴ ഈടാക്കാം. ജീവനക്കാരുമായി ബന്ധപ്പെട്ട വിവരങ്ങള് കൃത്യസമയത്തു നല്കാത്ത കമ്പനികള് ജീവനക്കാരുടെ എണ്ണം അനുസരിച്ച് 1000 ദിര്ഹം വീതം പിഴ നല്കേണ്ടിവരും. കമ്പനിയുടെ വിശദാംശങ്ങളില് വരുന്ന മാറ്റങ്ങള് മന്ത്രാലയത്തെ നിര്ദിഷ്ട സമയത്ത് അറിയിച്ചില്ലെങ്കിലും 1000 ദിര്ഹം പിഴ നല്കണം.
https://www.facebook.com/Malayalivartha