ഗോത്രവർഗ്ഗ ജനവിഭാഗങ്ങൾ ഉൽപ്പാദിപ്പിക്കുന്ന ഉൽപ്പന്നങ്ങൾ പുറംലോകത്തേക്ക് എത്തിക്കാനും, അതിന്റെ പൂർണ്ണ പ്രയോജനം അവർക്ക് ലഭ്യമാക്കാനും വനംവകുപ്പ് മുന്നിട്ടിറങ്ങുമെന്ന് വനം വകുപ്പ് മന്ത്രി ഷിബു ബേബിജോൺ. 'ഊരുണർവ്' പദ്ധതിയുടെ ഭാഗമായി പറമ്പിക്കുളം പൂപ്പാറ ഉന്നതി സന്ദർശിച്ച് ഊരുവാസികളോട് സംസാരിക്കുകയായിരുന്നു അദ്ദേഹം.

വിപണിയിൽ ലഭ്യമാകുന്ന മറ്റ് പ്രമുഖ ബ്രാൻഡുകളേക്കാൾ ഗുണനിലവാരം ഗോത്രമേഖലയിലെ കാർഷിക ഉൽപ്പന്നങ്ങൾക്കുണ്ടെന്ന് മന്ത്രി ചൂണ്ടിക്കാട്ടി. നിലവിൽ പ്രാദേശികമായി മാത്രം വിറ്റഴിക്കപ്പെടുന്ന ഈ ഉൽപ്പന്നങ്ങൾക്ക് വിശാലമായ വിപണന സൗകര്യം ഒരുക്കും.

പൂപ്പാറയുടെ കുരുമുളക് കൃഷിയിലെ പഴയകാല പ്രതാപം വീണ്ടെടുക്കുന്നതിനായി കൃഷിവകുപ്പുമായി ചേർന്ന് പ്രത്യേക പദ്ധതി നടപ്പിലാക്കും. പൂപ്പാറയിലെ ഗതാഗത, വൈദ്യുതി പ്രതിസന്ധികൾക്കും അതാത് വകുപ്പുകളുമായി സഹകരിച്ച് ഉടൻ പരിഹാരം കാണുമെന്നും മന്ത്രി ഉറപ്പുനൽകി. പൂപ്പാറയിൽ സജ്ജമാക്കിയ സോളാർ ഹാങ്ങിങ് ഫെൻസിങ്ങിന്റെ ഉദ്ഘാടനവും സ്നേഹ ഹസ്തം മെഡിക്കൽ ക്യാമ്പിന്റെ സംസ്ഥാനതല ഉദ്ഘാടനവും മന്ത്രി നിർവ്വഹിച്ചു.