മലയാളികള്‍ക്ക് തിരിച്ചടിയാകുന്നു... വീടുകള്‍ തോറും കയറിയിറങ്ങിയുള്ള കച്ചവടത്തിന് നിരോധനം. മസ്‌ക്കറ്റില്‍ ഡോര്‍ ടു ഡോര്‍ സെയില്‍സ് നിരോധിച്ച് ഉപഭോക്തൃ സംരക്ഷണ അതോറിറ്റി ഉത്തരവ് പുറപ്പെടുവിച്ചു. ഉപഭോക്താവ് ആവശ്യപ്പെടാതെ തന്നെ സാധനങ്ങളും സേവനങ്ങളും നല്‍കുന്നതിന് വീടുകളും താമസ സമുച്ചയങ്ങളും സന്ദര്‍ശിക്കുന്നത് നിയമ വിരുദ്ധമാണെന്ന് അതോറിറ്റി ചെയര്‍മാന്‍ ഡോ. സൈദ് ബിന്‍ ഖാമിസ് അല്‍ ഖാബി പുറപ്പെടുവിച്ച 10/2019ാം നമ്പര്‍ ഉത്തരവിന്റെ ആദ്യ വകുപ്പ് പറയുന്നു.

നിയമലംഘകരില്‍ നിന്ന് പിഴ ഈടാക്കുമെന്ന് നിയമത്തിന്റെ രണ്ടാം വകുപ്പില്‍ ചൂണ്ടികാണിക്കുന്നു. കുറഞ്ഞ പിഴ 200 റിയാലും പരമാവധി പിഴ ആയിരം റിയാലുമാണെന്ന് ഉത്തരവ് പറയുന്നു.

നേരത്തേ നിലവിലുണ്ടായിരുന്ന 258/2015ാം നമ്പര്‍ ഉത്തരവ് റദ്ദാക്കിയാണ് പുതിയ ഉത്തരവ് പ്രാബല്യത്തില്‍ വന്നത്. പുതിയതായി ഇറക്കിയ ഈ ഉത്തരവ് മലയാളികളടക്കമുള്ളവരെ ഏറെ ബാധിക്കാനിടയുണ്ട്. മത്രയിലും മറ്റും വീടുകള്‍ കയറിയിറങ്ങി കച്ചവടം നടത്തുന്ന മലയാളികള്‍ നിരവധിയാണ്.

ഇതില്‍ പലരും ചെയ്യുന്നത് മത്സ്യക്കച്ചവടമാണ് . പ്രധാനമായും ഫ്രീ വിസയില്‍ ജോലി ചെയ്യുന്നവരാണ് ഏറെയും. പെര്‍ഫ്യൂമുകള്‍, വാച്ചുകള്‍ തുടങ്ങിയവ കച്ചവടം ചെയ്യുന്നവരും ഉണ്ട്. മലയാളികള്‍ക്ക് പുറമെ പാകിസ്താന്‍, ബംഗ്ലാദേശ് സ്വദേശികളും ഈ രംഗത്തുണ്ട്.